ადის-აბება
![]()
|
ადის-აბება (ამჰ. አዲስ አበባ - ახალი პიოლი) – ეთიოპიაშ ნანანოღა დო უდიდაში ნოღა. 2008 წანაშ მუნაჩემეფით, ნოღას ოხორანდჷ 3384569 კოჩი. ადის-აბებას ეთიოპიას გიშაკერზაფილი სტატუსი უღჷ. ზუსტას თე ნოღა რე აფრიკაშ რსხუშ ადმინისტრაციაშ დგჷმილი (შტაბ-ორენი), კინე თაქ 2002 წანაშახ არსებენდჷ აფრიკაშ ართობაშ შტაბ-ორენი ხოლო. ზუსტას თეშენ შხირას ადის-აბებაშა „აფრიკაშ პოლიტიკურ ნანანოღა“ ხოლო უჯოხონა.
ნოღაქ დირსხუ 1886 წანას, იმპერატორ მენელიკ II-იშ მართუალაშ პერიოდის.
1936 წანაშ 5 მესის, იტალიაქ ეთიოპიაწკჷმა ლჷმაშ უკული შილებუ ნოღაშ ეჭოფუა. 1936 - 1941 წანეფს, ადის-აბება წჷმარინუანდჷ იტალიაშ ბჟაეიოლ აფრიკაშ ადმინისტრაციულ ცენტრის. 1941 წანას, ნოღაშ გოდუდიშულაფაქ მოხვადჷ, თიმ ბორჯის ქიანაშ მამართუალი რდჷ იმპერატორ ჰაილე სელასიე I.
ადის-აბება წჷმარინუანს ეთიოპიაშ ადმინისტრაციულ, პოლიტიკურ დო კულტურულ ცენტრის. ნოღას გოვითარაფილი რე ტრანსპორტი, 2008 წანას გინწყჷ ტროლეიბუსიშ ღოზიქ. ნოღაშ გოხოლუას რე ბოლეშ ოერეფოშქაშე აეროპორტი, ნამუთ არსულენს ანდა ოერეფოშქაშე რეისის. თე აეროპორტიშ მოხ, ეიოშინალი რე ლიდეტიშ აეროპორტი ხოლო, ნამუთ ასე გიმირინუაფუ ოურდუმე ღანკეფშო. ადის-აბება რკინაშარაშ ღოზით ქიანაშ შხვადოშხვა კუნთხუს მითმიარსხუ. რკინაშარაშ ღოზიშ მეშქაშობათ მითმიარსხუ ჯიბუტის.
ეთიოპიაშ ნანანორაშ ტერიტორიას იდვალუადუ ქიანაშ ერუანული მუზეუმი, თაქ ამდღარშახ მოსოფელს მეგორაფილი უჯვეშაშ ადამიერიშ ფრაგმენტეფი იჩუალუაფუ. თაშნეშე ეიოშინალი რე ეთიოპიაშ ერუანული ბიბლიოთეკა დო ადის-აბებაშ უნივერსიტეტი. ნოღა გიშაკერზაფილი არქიტექტურული სტილით გიშეგორუაფუ, ეიოშინალი რე ნოღაშ ტერიტორიას რინელი ანდა ოხიდა.
ადის-აბება რე მოსოფელს ართ-ართი არძოშე მაღალას მადვალუ ნანანოღა. ოხორუეშ არძოშე დაბალი ჭურჭული ნოღაშ ობჟათშე რე დო თიში სიმაღალე აკმადგინანს, ზუღაშ დონეშე - 2.326 მეტრას, თაქ იდვალუაფუ ბოლეშ აეროპორტი. უმაღალაში ჭურჭული რე, გვალა ენტოტო, ნამუთ დოხორელი პუნქტიშ ოორუეშე რე დო თიში სიმაღალე 3000 მეტრას აკამდგინანს.
თაშნეშე ქოძირით
[რედაქტირაფა | წყუშ რედაქტირაფა]რესურსეფი ინტერნეტის
[რედაქტირაფა | წყუშ რედაქტირაფა]![](http://upload.wikimedia.org/wikipedia/commons/thumb/4/4a/Commons-logo.svg/35px-Commons-logo.svg.png)
- ნოღა ადის-აბებაშ ადმინისტრაცია
- Addis Ababa City Council
- Global Integrity Report: Ethiopia[ღურელი რსხილი]
- Introduction to Addis Ababa Archived 2007-02-09 ვებ-ხასჷლას Wayback Machine.
- Hotels in Addis Ababa Archived 2012-06-15 ვებ-ხასჷლას Wayback Machine.
- Support for Mayor's overhaul of Addis Ababa
- Dawn in Addis Archived 2008-12-09 ვებ-ხასჷლას Wayback Machine.
- Interactive City Map and Business Finder
![]() |
ათე სტატია მერკე რე. თქვა შეგილებუნა ქიმეხვარათ ვიკიპედიას დო გაგშათინათ დო გახვეიანათინ. |
|