Ísland, 1974. Kvöld eitt í janúar hverfur átján ára strákur sporlaust. Síðar sama ár hverfur eiginmaður og tveggja barna faðir. Lögreglan er ráðþrota, það er eins og jörðin hafi gleypt mennina. Þeir koma aldrei í leitirnar og lík þeirra finnast aldrei. Engu að síður eru sex ungmenni handtekin og dæmd fyrir aðild að mannshvörfum og manndrápum. Engin dæmi í heiminum eru um jafn langa einangrunarvist sakborninga. Fjörutíu árum síðar eru ungmennin sýknuð, frá fyrstu tíð sek uns saklaus fundin. Öll nema eina konan í hópnum.

Þetta er saga af réttarmorði sem skók íslenskt samfélag svo hrikt hefur í stoðum réttarkerfisins í hartnær hálfa öld. Í hljóðseríunni Réttarmorð hverfur Sigursteinn Másson aftur til ársins 1974 og sökkvir sér að nýju í Guðmundar- og Geirfinnsmálin. Á sinn einstaka hátt dregur maðurinn á bakvið Sönn íslensk sakamál fram í dagsbirtuna þessi dularfullu mannshvörf og rannsókn lögreglunnar á þeim, réttarmorðið á ungmennunum sex og baráttu þeirra fyrir réttlætinu. Um leið beinir hann sérstöku ljósi á sögu Erlu Bolladóttur, Sævars Cieselski og sína eigin sem fléttast óvænt og ógleymanlega saman við Guðmundar- og Geirfinnsmálin á tíunda áratug síðustu aldar.

Í fyrsta þættinum heyrum við af örlagaríku kvöldi árið 1996 þegar óvænt er bankað á dyrnar hjá ungum blaðamanni. Skyndilega stígur ókunnugur maður, sem dæmdur hefur verið fyrir tvö morð, inn fyrir þröskuldinn. Hann hefur alla tíð haldið fram sakleysi sínu og meðferðis hefur hann fjöldann allan af skjölum máli sínu til stuðnings. Eftir þetta verður ekki aftur snúið fyrir blaðamanninn unga.

© 2023 Storytel Original (Hljóðbók): 9789180350693

Útgáfudagur

Hljóðbók: 2 oktober 2023