Леанід Ібрагімавіч Друян

Леанід Ібрагімавіч Друян
Дата нараджэння	ліпень 1944 (80 гадоў)
Месца нараджэння	Каменец, Камянецкі раён, Брэсцкая вобласць, БССР, СССР
Бацька	Ібрагім Леанідавіч Друян
Род дзейнасці	урач, пульманолаг, медыцынскі адміністратар
Месца працы	Гомельскі абласны клінічны шпіталь інвалідаў Вялікай Айчыннай вайны Беларускі гандлёва-эканамічны ўніверсітэт спажывецкай кааперацыі
Навуковая ступень	кандыдат медыцынскіх навук
Альма-матар	БДМУ
Узнагароды	Медаль «За воінскую доблесць»

Леанід Ібрагімавіч Друян (нар. 1944, Каменец) — беларускі ўрач-пульманолаг. Кандыдат медыцынскіх навук (1974), дацэнт. Заслужаны ўрач Рэспублікі Беларусь (2001).

Біяграфія

Паходжанне і дзяцінства

Нарадзіўся ў сям’і партызанскага ўрача Ібрагіма Друяна і яго жонкі Марыі Лявонцьеўны, партызанскай медыцынскай сястры, ў ліпені 1944, калі яго бацькі з групай былых партызанаў былі адпраўлены ў Камянецкі раён для аднаўлення разбуранай гаспадаркі. Па дарозе вырашана было заначаваць у адной з вёсак, дзе засталося некалькі хат, але яшчэ ў дарозе пачаліся роды, якія прыняў сам малады бацька.

З 1952 года сям’я пераехала з Камянецкага раёна ў Гомель. Леанід вучыўся ў школе № 2, дзе і пазнаёміўся з будучай жонкай Ганнай.

Прафесійная дзейнасць

Скончыў Мінскі медыцынскі інстытут, пасля якога Л. Друян служыў ва Узброеных сілах СССР. Там лейтэнант Друян абагульніў клінічныя назіранні па купіраванні прыступаў параксізмальнай тахікардыі ў палявых умовах. Намаганні афіцэра заўважылі і ўзнагародзілі медалём «За воінскую доблесць», а яго даследаванні апублікавалі ў «Ваенна-медыцынскім часопісе».

Пасля заканчэння аспірантуры абараніў кандыдацкую дысертацыю «Рэаграфічны метад даследавання ў ацэнцы кравазвароту і дыхання ў хворых вострай пнеўманіяй».

Заняў пасаду старшага выкладчыка, а пазней — загадчыка кафедры медыцынскай падрыхтоўкі Гомельскага кааператыўнага інстытута. У той жа самы час працаваў па сумяшчальніцтве лекарам-тэрапеўтам ў шпіталі.

Вышэйшая атэстацыйная камісія СССР прысвоіла яму навуковае званне дацэнт, а міністр аховы здароўя СССР узнагародзіў значком «Выдатнік аховы здароўя».

З 1990 года Л. Друян стаў галоўным урачом Гомельскага абласнога шпіталя інвалідаў Айчыннай вайны, які некалі 20 гадоў узначальваў яго бацька. З прыходам Леаніда Ібрагімавіча шпіталь стаў інтэнсіўна развівацца, былі пабудаваны новыя карпусы, адчынены новыя аддзяленні і кабінеты. Пры ім — у 2006 годзе — 2006 — шпіталь стаў срэбным прызёрам міжнароднага конкурсу сярод шпіталёў СНД.

Сям’я

• жонка Ганна Іванаўна Друян — урач-лабарант і кіраўнік хімічнай лабараторыі Гомельскай абласной санітарна-эпідэміялагічнай станцыі
  • сын Аляксандр (нар. 1974) — урач-рэаніматолаг, арганізатар аховы здароўя
  • сын Андрэй (нар. 1968) — эканаміст, бізнесмен, кандыдат эканамічных навук

Навуковая дзейнасць

Леанід Друян — аўтар дзесяткаў навуковых і метадычных работ, апублікаваных у беларускіх і замежных выданнях. Так, «Вышэйшая школа» ў 1992 годзе выпусціла яго кнігу «Кароткі тэрміналагічны слоўнік для медыцынскіх сясцёр», дзе медыцынскія тэрміны ўпершыню выкладзены на беларускай мове.

Грамадская дзейнасць

Быў дэпутатам Гомельскага абласнога Савета дэпутатаў 24-га склікання, старшынёй Гомельскага аддзялення Беларускай асацыяцыі ўрачоў-арганізатараў аховы здароўя, членам прэзідыума Гомельскага абкама прафсаюза работнікаў аховы здароўя, членам вучонага савета Гомельскага медыцынскага універсітэта, членам прэзідыума абласной ветэранскай арганізацыі.