西鐵綫
| ||||||||||||||||||||||
↓路綫圖 ↑西鐵綫朗屏站1號月台 | ||||||||||||||||||||||
![]() | ||||||||||||||||||||||
| ||||||||||||||||||||||
|
西鐵綫(粵拼:sai1 tit3 sin3),兩鐵合併前叫九廣西鐵,簡稱西鐵,或者叫西部鐵路,係香港鐵路有限公司以前嘅一條鐵路綫,長35.7公里。由紅磡灣(紅磡站)開始,經西九龍填海區、新界南,穿山入新界西北:元朗同屯門,以屯門站做總站。依家有車站十二個,其中轉車站八個:紅磡站、尖東站(出閘去尖沙咀站轉荃灣綫)、南昌站、美孚站、元朗站、天水圍站、兆康站、屯門站。除咗荃灣西站、柯士甸站(可以行去香港西九龍站搭高速鐵路)同埋尖東站呢三個站完全起喺地底之外,其他站都起喺地面或者高架橋上面。合併之前,西鐵喺路線圖上以粉紅色代表,合併之後,西鐵綫喺路綫圖入面以紫紅色代表。
2021年6月27號起,西鐵綫併入屯馬綫運作。
歷史
[編輯]提議起
[編輯]起連接新界西北同市區鐵路嘅提議早喺1970年代出現,當時屯門新市鎮重發展緊,元朗新市鎮亦開始發展,但三個早期嘅新市鎮之中得屯門冇鐵路。1980年代,社會討論過多個鐵路走線方案,總括當時有三大方案:第一係由荃灣經元朗入屯門,第二係由荃灣沿青山公路經屯門入元朗,第三係將重起緊嘅輕便鐵路(家下輕鐵)由元朗站延伸至太和站接駁九廣鐵路。當中第一個方案最貴,第二個方案比較難搞,第三個方案雖然平,但路程太長,唔適宜用輕鐵行。1988年,當時輕便鐵路通車,被視為會起大型鐵路嘅前奏。但呢個計劃連研究都延遲到1991年至開始。
1991年底,香港政府研究交通,開始咗「鐵路發展研究」,其中肯定九廣鐵路對新界東嘅發展影響深遠。1994年12月,香港政府發表「鐵路發展策略」,建議起一條連接九龍西同埋新界西嘅鐵路。呢條鐵路包含本地客運、跨境客運同埋貨運三重角色,被稱為「西部走廊鐵路」(或西部鐵路走廊)。
兩鐵競逐
[編輯]1995年,政府邀請地下鐵路公司同埋九廣鐵路公司提交計劃書,兩者都有提交。當中地鐵方案嘅優勢係客運段可以同嗰時起緊嘅機場鐵路嘅東涌綫整合,令列車可以直接來往新界西北同香港島。而九鐵方案嘅優勢,就係客運段可以配合九鐵經營嘅九廣輕鐵(家下輕鐵)作為接駁交通工具,加上九鐵公司喺貨運鐵路經營方面上已經有唔少經驗。
可見呢個時期政府有意準備起西部走廊鐵路,但時間上正處於香港嘅過渡期(臨近1997年主權移交),中英正處於膠著狀態,中方對機場核心工程後再大量投資建設表示憂慮,因此當時政府冇積極進行。然而喺同一年,屯門公路發生大石磧死人嘅意外,導致屯門公路全線封閉,引致新界西北交通大癱瘓,電視台甚至派人現場報導由荃灣用超過1個鐘嘅時間入屯門嘅情況。呢件事終於迫使政府更積極研究呢條鐵路嘅可行性,後來政府為咗加快本地客運鐵路嘅進度,將呢一段獨立出來起咗先,即西鐵第一期。跨境鐵路就留待第二期再處理(目前第二期重未有定案)。
1996年尾,行政局正式將西鐵興建權批畀九廣鐵路公司。主權移交後,喺香港特區政府大力推動基建嘅政策下,經走線重組同埋處理財務安排,政府終於喺1998年正式授權九鐵公司起西鐵。原先路線喺節省成本嘅前提下,只連接天水圍新市鎮至深水埗新填海區嘅新車站,而延至屯門嘅鐵路,當局認為喺輕鐵輔助下,可以押後至第二期再研究。然而,喺屯門區居民強烈反對之下,最終政府同意將第一期計劃南延至屯門市中心。1998年9月15號,行政會議正式通過起西鐵工程第一期,即係起連接屯門至南昌站嘅鐵路系統。嗰段鐵路系統已喺2003年12月20號正式通車。
建造過程
[編輯]- 1996年12月,行政局原則上批准九廣鐵路公司起西鐵第一期。
- 1998年9月15號,行政會議正式通過起西鐵嘅決定。
- 1998年10月26號,九廣西鐵正式動工。
- 2001年7月9號,西鐵嘅隧道挖掘工程完工,自2000年3月31號起進行嘅包括葵青隧道、大欖隧道以及青荃隧道嘅挖掘工程正式完工。
- 2002年4月,首趟列車抵港。
- 2002年8月,完成鋪設路軌。
- 2003年12月20號,九廣西鐵正式通車。
爭議
[編輯]![](http://upload.wikimedia.org/wikipedia/commons/thumb/9/93/Tin_Shui_Wai_Station_Windows_barrier_not_allow_people_seat_202104.jpg/220px-Tin_Shui_Wai_Station_Windows_barrier_not_allow_people_seat_202104.jpg)
西鐵起緊嗰時曾經引起唔少爭議,包括荃灣保華、華基工業中心因為喺鐵路沿線上,喺未傾好賠償嘅情況下俾人夾硬拆咗;順基工業大廈俾人拆嚟起大欖隧道嘅通風樓;荔枝角公園大部份土地亦被徵用。而開通之後,雖然大堂空間非常大,但港鐵一直無設置座位畀市民休息。有市民仲會在坐喺走廊玻璃幕牆地台休息;夏天嘅時候,亦有市民因為天氣炎熱坐喺大堂入口涼冷氣。不過由2021年3月開始,港鐵聲稱有人投訴會對車站環境造成影響,喺天水圍站、元朗站及朗屏站大堂近玻璃幕牆位置加裝鐵鍊,唔畀市民坐低。市民批評港鐵無人性,認為鐵鍊亦好樣衰。[1]
爭客
[編輯]西鐵通車時九鐵曾經預期每日載客達20萬人次,但由於經濟不景,而且面對巴士競爭,鐵路唔方便而車費又偏高,因此西鐵通車初期平均只得10萬人次搭。由於市區車站唔喺心臟地段,亦令西鐵好耐都達唔到佢最初營運目標,而且經常要依賴巴士接駁,競爭形勢一直不利。除此之外,西鐵通車初期成日故障,九鐵公司主席田北辰曾經公開承諾若果西鐵故障情況再冇改善,佢會考慮唔撈。及後西鐵喺2004年8月1號推出月票計劃同埋同年12月20號推出節日通日票計劃,至令每日載客量喺2005年12月達到九鐵公司定下每日20萬人次搭嘅目標。
西鐵綫嘅延伸九龍南綫喺2009年8月16號通車之後,西鐵綫可以直出尖沙咀商業區同紅磡以及接駁其他交通工具,令西鐵綫多咗人搭。
軼事
[編輯]- 2001年12月13號,由錦上路站至屯門站之間嘅高架橋舉行落成典禮,象徵呢條13.4公里,全港最長嘅高架橋由1999年7月起用30個月就起好。
- 2003年12月16號,九廣鐵路公司喺朝早10點正開始一連3日嘅西鐵慈善試搭日,以港幣15元嘅成人票價或7.5元嘅小童或長者票價,畀公眾人士試搭,冇出閘時限兼可以同時享用輕鐵或九鐵巴士嘅八達通免費轉乘優惠。
- 2004年7月23號,學生日票計劃,「西鐵學生全日通」推出,至到同年8月31號。
- 2004年8月1號,月票計劃,「西鐵全月通」推出,並一路用到而家。
- 2004年12月20號,日票計劃,「西鐵節日通」推出。
- 2005年9月1號,日票計劃,「西鐵自悠通」推出,取代之前嘅「西鐵節日通」。計劃一直延用至今。
- 2006年12月10號,九鐵公司為慶祝西鐵通車3週年,舉辦九鐵車廠開放日,開放咗八鄉維修中心畀公眾參觀。
- 2007年2月14號,一列下行SP1900列車(列車編號D306-D305)駛經大欖隧道時,因車頂電壓交感器過熱引致絕緣油出現氣化並爆炸着火。
- 2007年12月2號,兩鐵合併,西鐵改名同埋改路線顏色。
- 2009年8月16號,九龍南綫通車,西鐵綫南行總站由南昌延伸至紅磡,連接東鐵綫,南昌至紅磡沿途增設柯士甸站以及尖東站。
- 2021年6月20號,西鐵綫嘅紅磡站月台搬咗去因應沙田至中環綫發展而起嘅新月台。
兩鐵合併
[編輯]2007年12月2號,九鐵同地鐵租賃式合併,原本九廣西鐵嘅路線、設施同埋車一齊租畀香港鐵路有限公司營運(港鐵公司),員工就過渡到港鐵公司。西鐵改咗名,路線顏色都改埋。原來接駁地鐵嘅美孚站以及南昌站都改造咗好多,其中西鐵美孚站同地鐵嘅美孚站合併,而美孚同南昌兩站嘅分隔閘機亦喺2008年夏秋期間拆咗。西鐵綫嘅票務,除咗部分優惠取消咗同部分車費減價之外,基本上同合併前一樣。合併帶來嘅重要改變如下:
- 西鐵改名西鐵綫
- 路綫色彩變咗
- 沿線同列車上嘅九鐵標誌被更換為港鐵標誌
- 西鐵自悠通畀西鐵綫全日通取代
- 西鐵全月通畀西鐵綫全月通取代
- 西鐵轉乘新巴701、702線嘅免費優惠同埋971線嘅減價優惠取消(實際落實日期係2007年12月1號,即係合併前一日,但普遍認為原因係兩鐵合併)
- 車費減免(包括西鐵綫內車程同埋轉乘第啲港鐵路綫,包括部分單程票車程)
- 位於南昌站嘅西鐵綫1號月台及東涌綫4號月台之間嘅牆被局部拆除
屯馬綫
[編輯]2021年6月27號,沙田至中環綫嘅啟德至紅磡路段通車,西鐵綫被併入屯馬綫。
用車
[編輯]![](http://upload.wikimedia.org/wikipedia/commons/thumb/1/1d/MTR_West_Rail_Line_Train.jpg/250px-MTR_West_Rail_Line_Train.jpg)
全線採用日本製造嘅列車SP1900型共28列(合約編號SP1900),全部向九鐵公司租用。西鐵設計列車最長9卡,現時只係用7至8卡行。
- D(設有駕駛室嘅冇動力車卡)
- C(冇動力嘅車卡)
- P(設有集電弓嘅動力車卡)
- M(動力車卡)
加卡
[編輯]2015年開始,港鐵陸續改裝列車,响2016年1月2號開始投入服務。到時除咗每列會加一卡車(7卡變8卡)之外,都會加裝液晶體顯示屏用嚟顯示動態路線圖同埋電子報站。改裝需時廿八個月,到時載客量會加一成四,預計人流會喺2016年第三季開始舒緩到。[2][3]
2018年5月27號開始,西鐵綫行嗮8卡車[4]。
車站一覽‧接駁路線
[編輯]車站套色同埋名稱 | 喺邊區 | 車站接駁 | 啟用日期 |
---|---|---|---|
西鐵綫 | |||
紅磡 | 油尖旺區 | 東鐵綫、城際直通車 | 1975年11月30號 |
尖東 | 荃灣綫(尖沙咀站) | 2004年10月24號 | |
柯士甸 | 可以行去九龍站 轉東涌綫或 機場快綫 亦可以行去 西九龍站轉高鐵 |
2009年8月16號 | |
南昌 | 深水埗區 | 東涌綫 | 2003年12月20號 |
美孚 | 荃灣綫 | ||
荃灣西 | 荃灣區 | [TSW] | |
錦上路 | 元朗區 | 北環綫[NOL] | |
元朗 | 輕鐵(元朗總站) | ||
朗屏 | |||
天水圍 | 輕鐵(天水圍站、天耀站) | ||
兆康 | 屯門區 | 輕鐵(兆康站) | |
屯門 | 輕鐵(屯門站、河田站) | ||
附註 | |||
KOW 柯士甸站並唔係接駁東涌綫嘅車站,但可以經佐敦道行人天橋行大約10分鐘去九龍站,或者喺南昌站轉車,柯士甸站乘客行去九龍站轉東涌綫,會當兩程車計算。 TSW 荃灣西站並唔係接駁荃灣綫荃灣站嘅車站,但可以用八達通免費轉專線小巴95K或者行大概15至20分鐘去車站。 NOL 北環綫將會連接錦上路站同古洞站,預計喺2025年動工,2034年通車;原本連接新田站同落馬洲站嘅支線將暫緩興建,等到跨境運輸需求有增加嗰陣先起。 |
參考
[編輯]- ↑ 〈西鐵線3站大堂加鐵鍊禁坐 港鐵:確保車站暢通〉. 眾新聞. 2021-04-15. 原先內容歸檔喺2022-01-03. 喺2021-04-16搵到.
- ↑ https://www.facebook.com/mtrhk/photos/pb.396454395150.-2207520000.1451482794./10156378993830151/?type=3&source=42
- ↑ 〈存档副本〉. 原著喺2015年12月12號歸檔. 喺2015年12月30號搵到.
- ↑ 〈西鐵綫全面以八卡列車行駛〉 (PDF). 港鐵公司 新聞稿. 2018年5月25日. 原先內容歸檔 (PDF)喺2018年5月26日. 喺2018年5月25日搵到.