小食

華北風格麵食小食店

香港銅鑼灣嘅街上小食

小食係一種口味上具有獨特風格嘢食總稱，可以作為正餐以外之間嘅零食，亦可以係早餐、宵夜嘅主要嘢食。世界各地都有當地特色嘅風味小食，鮮明特色往往亦係當地觀光行銷嘅重點，以及所有遊子對於家鄉思念嘅「主要對象」。小食價錢平，一般人都買得起。有啲學者更將小食作為一種文化嘅現象研究。

有啲小食講求製作時間短或者可以儲存比較長時間，隨時都可以食，唔使好似煮正餐咁蹝時間。有啲中式小食由於取材比較普遍，好快流行到其他地區；但有啲小食由於口味獨特或者只係用當地材料，只可以局限喺一個地區。現代由於人口流動大，材料運輸方便，好多原本局限喺一個地區嘅小食，迅速向各地擴散。著名小食就靠口耳相傳而同大眾文化緊密交纏，甚至可能成為當地代表嘅飲食。

但係，小食發展到而家，喺一啲地區已經有咗另一種意思。雖然一樣係講究採用當地新鮮嘅食材，但喺製作方法繁複、作工講究，比講究飽肚嘅正餐更為繁瑣，係追求利潤嘅餐廳未必會賣。呢種小食，已經係一種地道飲食文化，絕非只係喺三餐之間填飽個肚，追求醫餓肚嘅層次。

點解會有小食

小食就地取材，通常能夠突出反映當地嘅物質同社會生活風貌；現代人食小食通常唔止為咗要食飽，而係因為貪食。遊客食小食除咗品嘗異地風味以外，重可以藉此了解當地風情。有啲人胃口細，或由於某啲疾病唔可以一次食太多嘢，三餐唔足以供應必要嘅營養，喺正餐以外需要以小食補充。

小食對生活嘅影響

小食代表住人類文化生活嘅精緻化。隨住經濟發展，人類生活水平提高，食嘢喺日常生活中佔嘅比例越來越細，再加上工作緊張，啲人開始厭棄正餐青睐小食。因為小食唔使講究禮儀，隨時方便咁解決肚餓問題。但由於小食嘅營養唔全面，好容易得到，幾時要都得，好容易食得太多，所以小食可能亦係而家造成肥胖比較普遍嘅一種原因。