銅鑼灣
![](http://upload.wikimedia.org/wikipedia/commons/thumb/5/5f/Disambig_gray.svg/25px-Disambig_gray.svg.png)
![](http://upload.wikimedia.org/wikipedia/commons/thumb/a/a3/HongKongCitizens.jpg/300px-HongKongCitizens.jpg)
![](http://upload.wikimedia.org/wikipedia/commons/thumb/8/8d/Causeway_Bay_View_from_ICC_201105.jpg/300px-Causeway_Bay_View_from_ICC_201105.jpg)
銅鑼灣(粵拼:tung4 lo4 waan1/waan4;英文:Causeway Bay)係香港島北岸一個填平咗嘅大海灣,而佢周圍嘅地方就叫做銅鑼灣。以前銅鑼灣係水上聚居港,屯兵地,鄉村地方,今日就係個繁華鬧市。係維多利亞港側邊嘅市區一部份。原海灣𢽚(音篤)就係大坑同掃桿埔。
歷史
[編輯]要睇返舊時海灣規模,睇下銅鑼灣道就知。成個布袋噉。
1819年(清朝嘉慶二十四年)版《新安縣志》未有銅鑼灣嘅記載,所以之前嘅歷史唔係咁清楚。
初時講銅鑼灣主要係講今日天后一帶,即係灣嘅東面,因為嗰邊有天后廟,係靠海為生嘅水上人、潮州人、福建人集中嘅地方。因為未填海前銅鑼灣西面地方好似一隻角咁,被稱為東角。香港早期嘅繁榮市區係五環三角,但東角唔係市區東邊嘅盡頭,最東邊嘅盡頭係北角,而響西環嘅West Point,即係西角,北角(North point)都係因為好似隻角咁而命名。渣甸洋行首先響呢度大興土木,起港口倉庫。香港政府亦沿住海岸綫,起咗條筲箕灣道去筲箕灣,其中部份就係今日銅鑼灣道同英皇道嘅前身。
後尾響今日高士威道,呢度起咗條海堤,所以英國人叫個灣做Causeway Bay,意思係堤灣。高士威道嘅高士威,正正係英文海堤Causeway嘅音譯。因為呢條路係由海堤變成。而中文名就冇變,一直叫銅鑼灣。東角呢個名只係流行響英語社羣,唐人一直就用返個銅鑼灣來叫呢塊市區地。
至於填海,政府首先將海堤以內填平,變成各式公園運動場。後尾變成今日皇仁書院,香港中央圖書館等等。之後連堤外個灣都填平,變成維多利亞公園。銅鑼灣家下重有銅鑼灣避風塘,但係舶嘅已經唔係漁船,而係遊艇。
開頭東角係指而家成個銅鑼灣,但後尾好多人用銅鑼灣來講銅鑼灣東邊形象似銅鑼嘅地方,銅鑼灣西面就叫東角。到咗地鐵起好港島綫,銅鑼灣因為夠大,總共有兩個地鐵站,一個銅鑼灣站喺東角嗰邊,同灣仔為鄰。而銅鑼灣東面,南邊最盡起咗另一個地鐵站響銅鑼灣天后廟嗰邊,叫天后站,北面最盡嘅銅鑼灣社區中心附近又起咗個炮台山站,不過呢個地鐵站屬北角。因為香港人習慣響地鐵站匯合,所以天后站叫叫下,呢一帶就畀人叫天后喇。但每個人心中嘅天后都唔同,有時會包埋部份天后廟道上面嘅北角地區,有時會包括成個銅鑼灣東住宅區、維多利亞公園同埋香港中央圖書館。
經濟
[編輯]銅鑼灣係香港最旺嘅地方之一,亦係2012、2013兩年全世界舖租最貴嘅地方[1]。
參考
[編輯]- ↑ 〈銅鑼灣舖租蟬聯全球最貴〉。《大公網》。大公報社。2013-11-15。原著喺2017-03-22歸檔。喺2014-01-23搵到。
![](http://upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)