Стресот им помагал на луѓето да преживеат илјадници години. Но современиот начин на живот може да ни го одржи нивото на стрес на високо ниво толку долго време поради што почнува да ни страда здравјето. За некои луѓе, јадењето вкусна и високоенергетска храна претставува начин за справување со стресот. Тоа може да доведе до зголемување нa телесната тежина и ризикот од дебелеење.

Ова не е невообичаено. Според извештајот „Stress in America“ („Стресот во Америка“) од 2017 година, 43 проценти од Американците се прејадуваат кога се под стрес.

Проблемот е што стресот често го предизвикуваат работи што сè уште не се случиле. Се грижиме за состаноци, промена на работното место или можеби за иднината на нашата врска. Тешко е да се контролира она што ќе се случи во иднина. Но може да го контролирате начинот на којшто одговарате на чувствата кога сте под стрес.

Некои симптоми на благ стрес вклучуваат проблеми со спиењето, немир или „пеперутки“ во стомакот. Ако ова ви звучи познато, во продолжение се наведени осум начини што може да ви помогнат да си воспоставите контрола и да останете смирени.

Обидете се да ги препознаете дразбите. Дали постојат одредени ситуации или проблеми што може да ви предизвикаат стрес? Размислете дали можете да преземете нешто во врска со тоа. Ако можете, направете план и запишете го. На пример, ако сте под стрес затоа што имате многу работа, може да закажете состанок со вашиот претпоставен и да разговарате за обемот на работата. 

Добрата вест е дека можеме да научиме нови начини на кои можеме да одговориме на стресот. Идејата е да утврдиме како реагираме и да научиме нов, поздрав начин на справување со стресот.

Вежбањето може да ни помогне да се чувствуваме добро и да ни го подобри расположението. Пробајте активности во кои ќе уживате и ги сметате за корисни.

Медитацијата ни помага да се сосредоточиме на сегашноста наместо да се грижиме што може да се случи во иднина. Може да почнете со вежби за дишење за да се смирите или да слушате релаксирачка музика. Постојат голем број апликации за концентрација и медитација, како што е Headspace, коишто се направени специјално за оваа намена.

Нормално е да не спиете добро кога сте под стрес. Но за здравјето на возрасните луѓе важно е да спијат меѓу седум и девет часа секоја ноќ. Размислете дали постои начин да ги подобрите навиките за спиење. Ако ви треба помош, прочитајте ги нашите препораки за добар сон во текот на ноќта.

Се чини дека јадењето станува механизам за справување со стресот, иако сакаме да останеме здрави и да јадеме умерено. На крајот на краиштата, знаеме дека вкусната храна сите нè расположува. Но за некои луѓе тоа може да стане маѓепсан круг на зависност од кој нема излез. Обидете се да забележите кога ви се јавува стресот и притоа како реагирате во стресни ситуации. Потоа потрудете се да пронајдете здрав одговор така што ќе правите нешто во што навистина уживате.

Разговор со пријател или близината на членови од семејството што ве поддржуваат може да помогне да се намали стресот. Но истражувањата покажале дека давањето социјална поддршка на други луѓе, исто така, може да ве ослободи од стресот. 

Понекогаш справувањето со стресот не е едноставно. Погоре предложените стратегии може да влијаат само на благите симптоми на стрес. Ако се симптомите посериозни, вклучувајќи агресивност, заборавеност или необјаснива болка, проблеми со спиењето и помала желба за дружење, важно е да побарате стручна помош. Во ваков случај здравствен работник може да ви помогне да пронајдете здрави механизми за справување со стресот.