Alkitab/Pangentasan/4

^4:1 ꧊ꦩꦸꦱꦤꦸꦭꦶꦩꦠꦸꦂ꧈​"ꦤꦁꦔꦶꦁꦏꦢꦺꦴꦱ꧀ꦥꦸꦤ꧀ꦢꦶꦩꦼꦤꦮꦶꦠꦶꦪꦁꦠꦶꦪꦁ꧊ꦆꦱꦿꦲꦺꦭ꧀ꦩ꧀ꦧꦺꦴꦠꦼꦤ꧀ꦥꦶꦠꦢꦺꦴꦱ꧀ꦝꦠꦼꦁꦏꦮꦸꦭꦱꦲꦩ꧀ꦧꦺꦴꦠꦼꦤ꧀ꦥꦸꦫꦸꦤ꧀ꦩꦶꦉꦁꦔꦏꦼꦤ꧀ꦠꦼꦩ꧀ꦧꦸꦁꦏꦮꦸꦭ?ꦩꦼꦤꦥꦲꦶꦁꦏꦁꦧꦝꦺꦏꦮꦸꦭꦠꦶꦤ꧀ꦢꦏ꧀ꦏꦏꦼꦤ꧀꧈​ꦩꦼꦤꦮꦶꦠꦶꦪꦁꦠꦶꦪꦁꦩꦼꦤꦶꦏꦮꦶꦕꦤ꧀ꦠꦼꦤ꧀꧈​ꦧꦶꦭꦶꦃꦒꦸꦱ꧀ꦠꦶꦄꦭ꧀ꦭꦃꦩ꧀ꦧꦺꦴꦠꦼꦤ꧀ꦔꦿꦮꦸꦃꦲꦶꦏꦮꦸꦭ?"

^4:2 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦤ꧀ꦢꦔꦸꦩꦫꦁ꧊ꦩꦸꦱ꧈​"ꦲꦥꦱꦶꦁꦲꦤꦲꦶꦁꦠꦔꦤ꧀ꦩꦸꦏꦸꦮꦶ?""ꦩꦼꦤꦶꦏꦠꦼꦏꦼꦤ꧀꧈"​ꦲꦠꦸꦂꦫꦺ꧊ꦩꦸꦱ꧉​

^4:3 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦤ꧀ꦢꦶꦏ꧈​"ꦠꦼꦏꦼꦤ꧀ꦲꦶꦏꦸꦲꦸꦚ꧀ꦕꦭ꧀ꦤ!"꧊ꦩꦸꦱꦧꦚ꧀ꦗꦸꦂꦔꦸꦚ꧀ꦕꦭ꧀ꦭꦏꦺꦠꦼꦏꦼꦤꦺ꧉​ꦠꦼꦏꦼꦤ꧀ꦩꦲꦸꦩꦭꦶꦃꦢꦢꦶꦲꦸꦭ꧉​꧊ꦩꦸꦱꦩ꧀ꦭꦪꦸꦔꦼꦢꦺꦴꦃꦲꦶ꧈​

^4:4 ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦤ꧀ꦢꦮꦸꦃꦲꦶ꧈​"ꦧꦸꦤ꧀ꦠꦸꦠ꧀ꦠꦺꦲꦸꦭꦏꦸꦮꦶꦫꦁꦒꦺꦃꦲꦼꦤ꧀ꦭꦤ꧀ꦕꦼꦏꦼꦊꦤ꧀꧉"​꧊ꦩꦸꦱꦧꦚ꧀ꦗꦸꦂꦔꦿꦁꦒꦺꦃꦱꦂꦠꦚꦼꦏꦼꦭ꧀ꦧꦸꦤ꧀ꦠꦸꦠ꧀ꦠꦺꦲꦸꦭꦩꦲꦸ;ꦲꦸꦭꦤꦺꦩꦭꦶꦃꦢꦢꦶꦠꦼꦏꦼꦤ꧀ꦩꦼꦤꦺꦃꦲꦤꦲꦶꦁꦠꦔꦤ꧀ꦤꦺ꧊ꦩꦸꦱ꧉​

^4:5 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦼꦤꦺꦃ꧈​"ꦏꦸꦮꦶꦠꦶꦤ꧀ꦢꦏ꧀ꦤ꧈​ꦏꦁꦒꦺꦴꦩ꧀ꦧꦸꦏ꧀ꦠꦺꦏ꧀ꦏꦏꦺꦩꦫꦁꦲꦸꦩꦠ꧀꧊ꦆꦱꦿꦲꦺꦭ꧀꧈​ꦪꦺꦤ꧀ꦲꦏꦸ꧈​ꦄꦭ꧀ꦭꦃꦱꦼꦱꦼꦩ꧀ꦧꦃꦲꦤ꧀ꦤꦺꦊꦭꦸꦲꦸꦂꦫꦺ꧈​ꦲꦭ꧀ꦭꦃꦲꦺ꧊ꦄꦧꦿꦲꦩ꧀꧈​꧊ꦆꦱ꧀ꦏꦏ꧀ꦭꦤ꧀꧊ꦪꦏꦸꦧ꧀꧈​ꦮꦶꦱ꧀ꦔꦿꦮꦸꦃꦲꦶꦏꦺꦴꦮꦺ꧉"​

^4:6 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦼꦤꦺꦃꦩꦫꦁ꧊ꦩꦸꦱ꧈​"ꦠꦔꦤ꧀ꦩꦸꦊꦧꦺꦴꦏ꧀ꦤꦲꦶꦁꦏ꧀ꦭꦩ꧀ꦧꦶꦩꦸ꧉"​꧊ꦩꦸꦱꦩꦤꦸꦠ꧀;ꦧꦉꦁꦠꦔꦤ꧀ꦤꦺꦢꦶꦢꦸꦢꦸꦠ꧀ꦢꦢꦶꦧꦸꦝꦸꦒꦤ꧀꧈​ꦥꦸꦠꦶꦃꦏꦪꦏꦥꦱ꧀꧉​

^4:7 ꦄꦭ꧀ꦭꦃꦤꦸꦭꦶꦔꦤ꧀ꦢꦶꦏ꧈​"ꦠꦔꦤ꧀ꦩꦸꦊꦧꦺꦴꦏ꧀ꦤꦩꦼꦤꦺꦃꦲꦶꦁꦏ꧀ꦭꦩ꧀ꦧꦶꦩꦸ꧉"​꧊ꦩꦸꦱꦤꦶꦤ꧀ꦢꦏ꧀ꦏꦏꦺꦩꦼꦁꦏꦺꦴꦤꦺꦴ꧈​ꦱꦂꦠꦧꦉꦁꦢꦶꦢꦸꦢꦸꦠ꧀ꦠꦔꦤ꧀ꦤꦺꦮꦶꦱ꧀ꦮꦫꦱ꧀ꦏꦪꦱꦶꦗꦶꦤꦺ꧉​

^4:8 ꦥꦔꦤ꧀ꦢꦶꦏꦤꦺꦄꦭ꧀ꦭꦃ꧈​"ꦪꦺꦤ꧀ꦮꦺꦴꦁꦮꦺꦴꦁꦲꦺꦴꦫꦥꦽꦕꦪꦏꦫꦺꦴꦏꦺꦴꦮꦺ꧈​ꦱꦂꦠꦲꦺꦴꦫꦔꦤ꧀ꦢꦼꦭ꧀ꦏꦫꦺꦴꦩꦸꦗꦶꦗꦠ꧀ꦏꦁꦏꦥꦶꦱꦤ꧀꧈​ꦧꦏꦭ꧀ꦥꦝꦔꦤ꧀ꦢꦼꦭ꧀ꦱꦩꦱꦮꦼꦫꦸꦃꦩꦸꦗꦶꦗꦠ꧀ꦏꦁꦏꦥꦶꦤ꧀ꦝꦺꦴ꧉​

^4:9 ꦪꦺꦤ꧀ꦥꦚ꧀ꦕꦺꦤ꧀ꦢꦸꦫꦸꦁꦒꦼꦊꦩ꧀ꦥꦽꦕꦪꦩꦫꦁꦏꦺꦴꦮꦺ꧈​ꦱꦼꦤꦗꦤ꧀ꦮꦶꦱ꧀ꦚꦶꦥꦠ꧀ꦠꦶꦩꦸꦗꦶꦗꦠ꧀ꦫꦺꦴꦁꦮꦼꦂꦤꦩꦲꦸ꧈​ꦭꦤ꧀ꦲꦺꦴꦫꦥꦝꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦩꦸ꧈​ꦚ꧀ꦗꦸꦥꦸꦏ꧀ꦏꦧꦚꦸꦱꦏꦲꦶꦁꦧꦼꦔꦮꦤ꧀꧊ꦤꦶꦭ꧀ꦱꦼꦛꦶꦛꦶꦏ꧀ꦭꦤ꧀ꦲꦼꦱꦺꦴꦏ꧀ꦤꦲꦶꦁꦊꦩꦃ꧉​ꦧꦚꦸꦩꦲꦸꦧꦏꦭ꧀ꦩꦭꦶꦃꦢꦢꦶꦒꦼꦠꦶꦃ꧉"​

^4:10 ꦤꦁꦔꦶꦁ꧊ꦩꦸꦱꦩꦠꦸꦂ꧈​"꧊ꦄꦝꦸꦃ꧈​ꦒꦸꦱ꧀ꦠꦶ꧈​ꦱꦩ꧀ꦥꦸꦤ꧀ꦠꦔꦸꦠꦸꦱ꧀ꦏꦮꦸꦭ꧈​ꦲꦮꦶꦠ꧀ꦏꦮꦸꦭꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦒꦶꦤꦼꦩ꧀ꦩꦤ꧀꧈​ꦫꦸꦩꦶꦪꦶꦤ꧀ꦩ꧀ꦧꦺꦴꦠꦼꦤ꧀ꦭꦤ꧀ꦩꦁꦏꦺꦱꦼꦱꦩ꧀ꦥꦸꦤꦶꦥꦸꦤ꧀ꦒꦸꦱ꧀ꦠꦶꦔꦤ꧀ꦢꦶꦏꦝꦠꦼꦁꦏꦮꦸꦭ꧈​ꦏꦮꦸꦭꦲꦶꦁꦒꦶꦃꦧꦝꦺꦠꦼꦠꦼꦥ꧀ꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦒꦶꦤꦼꦩ꧀ꦩꦤ꧀꧉​ꦲꦶꦭꦠ꧀ꦏꦮꦸꦭꦏꦏꦼꦤ꧀꧈​ꦒꦶꦤꦼꦩ꧀ꦩꦤ꧀ꦏꦮꦸꦭꦥ꧀ꦭꦼꦒꦏ꧀ꦥ꧀ꦭꦼꦒꦸꦏ꧀꧉"​

^4:11 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦼꦁꦏꦺꦤꦺ꧈​"ꦱꦥꦱꦶꦁꦤꦶꦠꦃꦲꦏꦺꦲꦶꦭꦠ꧀ꦠꦺꦩꦤꦸꦁꦱ?ꦱꦥꦱꦶꦁꦤꦶꦠꦃꦲꦏꦺꦮꦺꦴꦁꦧꦶꦱꦸꦭꦤ꧀ꦮꦺꦴꦁꦧꦸꦝꦼꦒ꧀?ꦱꦥꦱꦶꦁꦤꦶꦠꦃꦲꦏꦺꦮꦺꦴꦁꦩꦼꦭꦺꦏ꧀ꦭꦤ꧀ꦮꦺꦴꦁꦮꦸꦠ?ꦲꦥꦢꦸꦢꦸꦲꦏꦸ꧈​ꦄꦭ꧀ꦭꦃ?

^4:12 ꦱꦲꦶꦏꦶ꧈​ꦭꦸꦔꦲ꧈​ꦲꦏꦸꦧꦏꦭ꧀ꦔꦼꦫꦺꦃꦲꦶꦭꦠ꧀ꦩꦸꦱꦂꦠꦔꦤ꧀ꦝꦤ꧀ꦤꦶꦲꦥꦮꦲꦺꦱꦶꦁꦏꦸꦢꦸꦏꦺꦴꦏ꧀ꦲꦸꦕꦥ꧀ꦥꦏꦺ꧉"​

^4:13 ꧊ꦩꦸꦱꦩꦠꦸꦂ꧈​"ꦒꦸꦱ꧀ꦠꦶ꧈​ꦏꦮꦸꦭꦚꦸꦮꦸꦤ꧀꧈​ꦩꦸꦒꦶꦔꦸꦠꦸꦱ꧀ꦠꦶꦪꦁꦱꦤꦺꦱ꧀ꦏꦺꦩꦮꦺꦴꦤ꧀꧈​ꦱꦩ꧀ꦥꦸꦤ꧀ꦏꦮꦸꦭ꧉"​

^4:14 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦤ꧀ꦢꦸꦏꦤꦶ꧊ꦩꦸꦱꦱꦂꦠꦔꦤ꧀ꦢꦶꦏ꧈​"ꦏꦼꦥꦿꦶꦪꦺ!ꦲꦏꦸꦩꦶꦂꦱꦪꦺꦤ꧀ꦲꦫꦸꦤ꧀꧈​ꦱꦼꦢꦸꦭꦸꦂꦩꦸ꧈​ꦮꦺꦴꦁ꧊ꦭꦺꦮꦶꦏꦸꦮꦶ꧈​ꦥꦶꦤ꧀ꦠꦼꦂꦒꦸꦤꦼꦩ꧀ꦩꦤ꧀꧉​ꦲꦫꦸꦤ꧀ꦧꦏꦭ꧀ꦠꦼꦏꦤꦼꦩꦺꦴꦤ꧀ꦤꦶꦏꦺꦴꦮꦺ꧈​ꦭꦤ꧀ꦧꦏꦭ꧀ꦧꦸꦔꦃꦲꦠꦶꦤꦺꦢꦺꦤꦺꦧꦶꦱꦏꦼꦠꦼꦩꦸꦏꦺꦴꦮꦺ꧉​

^4:15 ꦏꦤ꧀ꦝꦏ꧀ꦤꦲꦥꦱꦶꦁꦏꦸꦢꦸꦢꦶꦲꦸꦕꦥ꧀ꦥꦏꦺ꧉​ꦲꦏꦸꦧꦏꦭ꧀ꦔꦼꦫꦺꦃꦲꦶꦭꦠ꧀ꦩꦸꦭꦤ꧀ꦲꦶꦭꦠ꧀ꦠꦺꦲꦫꦸꦤ꧀ꦱꦂꦠꦔꦤ꧀ꦝꦤ꧀ꦤꦶꦲꦥꦱꦶꦁꦏꦸꦢꦸꦏꦺꦴꦏ꧀ꦲꦸꦕꦥ꧀ꦥꦏꦺꦭꦤ꧀ꦏꦺꦴꦏ꧀ꦠꦶꦤ꧀ꦢꦏ꧀ꦏꦏꦺ꧉​

^4:16 ꦲꦫꦸꦤ꧀ꦱꦶꦁꦧꦏꦭ꧀ꦕꦠꦸꦂꦫꦤ꧀ꦏꦫꦺꦴꦲꦸꦩꦠ꧀ꦩꦶꦤꦁꦏꦮꦏꦶꦭ꧀ꦩꦸ꧉​ꦝꦺꦮꦺꦏ꧀ꦤꦺꦲꦶꦏꦸꦧꦏꦭ꧀ꦢꦢꦶꦭꦺꦱꦤ꧀ꦩꦸ꧈​ꦢꦺꦤꦺꦏꦺꦴꦮꦺꦏꦪꦢꦺꦤꦺꦭꦸꦫꦃꦲꦺꦏꦁꦧꦏꦭ꧀ꦏꦤ꧀ꦝꦲꦥꦱꦶꦁꦏꦸꦢꦸꦢꦶꦲꦸꦕꦥ꧀ꦥꦏꦺ꧉​

^4:17 ꦠꦼꦏꦼꦤ꧀ꦩꦸꦒꦮꦤꦼꦤ꧀꧉​ꦱꦿꦤꦠꦼꦏꦼꦤ꧀ꦏꦸꦮꦶꦏꦺꦴꦮꦺꦧꦏꦭ꧀ꦒꦮꦺꦥꦽꦠꦤ꧀ꦝꦥꦽꦠꦤ꧀ꦝꦱꦶꦁꦤꦺꦭꦏ꧀ꦏꦏꦺꦪꦺꦤ꧀ꦲꦏꦸꦱꦶꦁꦔꦸꦠꦸꦱ꧀ꦏꦺꦴꦮꦺ꧉"​

^4:18 ꧊ꦩꦸꦱꦩꦸꦭꦶꦃꦩꦼꦚꦁꦲꦺꦴꦩꦃꦲꦺ꧊ꦪꦶꦠꦿꦺꦴ꧈​ꦧꦥꦏ꧀ꦤꦺꦩꦫꦠꦸꦮ꧈​ꦱꦂꦠꦩꦠꦸꦂ꧈​"ꦏꦸꦭꦏꦼꦥꦉꦁꦔꦮꦁꦱꦸꦭ꧀ꦝꦠꦼꦁꦱꦼꦝꦺꦫꦺꦏ꧀ꦱꦼꦝꦺꦫꦺꦏ꧀ꦏꦸꦭꦲꦶꦁ꧊ꦩꦺꦱꦶꦂ꧈​ꦤꦸꦮꦺꦤ꧀ꦤꦶꦩꦼꦤꦥꦠꦏ꧀ꦱꦶꦃꦱꦩꦶꦮꦶꦭꦸꦗꦼꦁ꧉"​꧊ꦪꦶꦠꦿꦺꦴꦔ꧀ꦭꦶꦭꦤꦶꦱꦂꦠꦔꦸꦤ꧀ꦠꦥ꧀ꦥꦏꦺꦩꦁꦏꦠ꧀ꦠꦺ꧊ꦩꦸꦱ꧉​

^4:19 ꦤꦭꦶꦏ꧊ꦩꦸꦱꦲꦶꦱꦶꦃꦲꦤꦲꦶꦁꦠꦤꦃ꧊ꦩꦶꦢꦶꦪꦤ꧀꧈​ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦤꦶ꧈​"ꦧꦭꦶꦪꦩꦼꦚꦁ꧊ꦩꦺꦱꦶꦂ!ꦱꦏꦺꦃꦲꦺꦮꦺꦴꦁꦱꦶꦁꦲꦉꦥ꧀ꦩꦠꦺꦤ꧀ꦤꦶꦏꦺꦴꦮꦺꦮꦶꦱ꧀ꦲꦺꦴꦫꦲꦤ꧉"​

^4:20 ꦧꦺꦴꦗꦺꦴꦤꦺꦭꦤ꧀ꦲꦤꦏ꧀ꦲꦤꦏ꧀ꦏꦺꦢꦶꦠꦸꦁꦒꦁꦔꦏꦺꦲꦶꦁꦏꦸꦭ꧀ꦢꦶꦱꦂꦠꦧꦼꦧꦉꦁꦔꦤ꧀ꦩꦁꦏꦠ꧀ꦩꦼꦚꦁ꧊ꦩꦺꦱꦶꦂ꧉​ꦢꦺꦤꦺ꧊ꦩꦸꦱꦝꦺꦮꦺꦔ꧀ꦒꦮꦠꦼꦏꦼꦤ꧀ꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃ꧉​

^4:21 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦲꦏꦸꦮꦶꦱ꧀ꦥꦫꦶꦁꦥꦔ꧀ꦮꦱꦩꦫꦁꦏꦺꦴꦮꦺꦒꦮꦺꦏꦲꦺꦭꦺꦴꦏꦤ꧀ꦏꦲꦺꦭꦺꦴꦏꦤ꧀꧉​ꦢꦢꦶꦪꦺꦤ꧀ꦏꦺꦴꦮꦺꦮꦶꦱ꧀ꦠꦼꦏꦤ꧀꧊ꦩꦺꦱꦶꦂ꧈​ꦱꦏꦺꦃꦲꦶꦁꦏꦲꦺꦭꦺꦴꦏ꧀ꦏꦤ꧀ꦩꦲꦸꦠꦶꦤ꧀ꦢꦏ꧀ꦤꦲꦤꦲꦶꦁꦔꦉꦥ꧀ꦥꦺꦱꦁꦥꦿꦶꦔꦺꦴꦤ꧀꧉​ꦤꦁꦔꦶꦁꦲꦏꦸꦧꦏꦭ꧀ꦩꦁꦏꦺꦴꦠ꧀ꦠꦏꦺꦲꦠꦶꦤꦺ꧈​ꦩꦸꦭꦤꦺꦧꦏꦭ꧀ꦲꦺꦴꦫꦔ꧀ꦭꦶꦭꦤꦶꦭꦸꦔꦤꦺꦧꦁꦱ꧊ꦆꦱꦿꦲꦺꦭ꧀꧉​

^4:22 ꦤꦸꦭꦶꦩꦠꦸꦂꦫꦩꦫꦁꦱꦁꦥꦿꦶꦔꦺꦴꦤ꧀꧈​ꦪꦺꦤ꧀ꦲꦏꦸ꧈​ꦄꦭ꧀ꦭꦃ꧈​ꦝꦮꦸꦃꦩꦼꦁꦏꦺꦤꦺ꧈​‘꧊ꦆꦱꦿꦲꦺꦭ꧀ꦏꦸꦮꦶꦥꦸꦠꦿꦏꦸꦩ꧀ꦧꦉꦥ꧀;

^4:23 ꦏꦺꦴꦮꦺꦢꦏ꧀ꦝꦮꦸꦃꦲꦶꦱꦸꦥꦪꦔ꧀ꦭꦶꦭꦤꦶꦥꦸꦠꦿꦏꦸꦭꦸꦔ꧈​ꦠꦼꦩꦃꦧꦶꦱꦔꦧꦼꦏ꧀ꦠꦶꦩꦫꦁꦲꦏꦸ꧉​ꦤꦁꦔꦶꦁꦪꦺꦤ꧀ꦏꦺꦴꦮꦺꦲꦺꦴꦫꦔꦺꦴꦭꦺꦃꦲꦏꦺ꧈​ꦲꦏꦸꦧꦏꦭ꧀ꦩꦠꦺꦤ꧀ꦤꦶꦲꦤꦏ꧀ꦩꦸꦥꦼꦩ꧀ꦧꦉꦥ꧀!’"

^4:24 ꦲꦶꦁꦱꦮꦶꦗꦶꦤꦶꦁꦢꦶꦤ꧈​ꦤꦭꦶꦏꦭꦒꦶꦊꦭꦸꦁꦔꦤ꧀ꦩꦼꦚꦁ꧊ꦩꦺꦱꦶꦂꦲꦶꦁꦢꦭꦤ꧀꧈​ꦒꦸꦱ꧀ꦠꦶꦄꦭ꧀ꦭꦃꦫꦮꦸꦃꦲꦶꦁꦏꦺꦩꦃꦲꦺ꧊ꦩꦸꦱ;꧊ꦩꦸꦱꦲꦉꦥ꧀ꦢꦶꦥꦠꦺꦤ꧀ꦤꦶ꧉​

^4:25 ꧊ꦗ꦳ꦶꦥꦺꦴꦫꦧꦚ꧀ꦗꦸꦂꦚ꧀ꦗꦸꦥꦸꦏ꧀ꦭꦢꦶꦁꦮꦠꦸꦱꦶꦁꦭꦤ꧀ꦝꦼꦥ꧀ꦏꦁꦒꦺꦴꦤꦼꦠꦏ꧀ꦏꦶꦲꦤꦏ꧀ꦏꦺ꧈​ꦭꦤ꧀ꦲꦶꦏꦸꦠ꧀ꦠꦺꦢꦶꦒꦼꦥꦺꦴꦏ꧀ꦏꦏꦺꦲꦶꦁꦱꦶꦏꦶꦭ꧀ꦭꦺ꧊ꦩꦸꦱ꧉​ꦥꦔꦸꦕꦥ꧀ꦥꦺ꧊ꦗ꦳ꦶꦥꦺꦴꦫ꧈​"ꦥꦚ꧀ꦗꦼꦤꦼꦁꦔꦤ꧀ꦩꦼꦤꦶꦏꦥꦼꦔꦤ꧀ꦠꦺꦤ꧀ꦫꦃꦠꦸꦩꦿꦥ꧀ꦏꦸꦭ꧉"​

^4:26 ꦏꦤ꧀ꦝꦤꦺꦩꦼꦁꦏꦺꦴꦤꦺꦴꦩꦲꦸꦲꦤꦒꦤ꧀ꦝꦺꦁꦔꦺꦏꦫꦺꦴꦱꦸꦤꦠ꧀꧉​ꦩꦼꦂꦒꦱꦏꦏꦸꦮꦶꦒꦸꦱ꧀ꦠꦶꦄꦭ꧀ꦭꦃꦲꦺꦴꦫꦱꦶꦢꦩꦠꦺꦤ꧀ꦤꦶ꧊ꦩꦸꦱ꧉​

^4:27 ꦝꦺꦏ꧀ꦱꦼꦩꦤꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁꦲꦫꦸꦤ꧀꧈​"ꦭꦸꦔꦲꦩꦼꦚꦁꦲꦫꦲꦫꦱꦩꦸꦤ꧀ꦤꦼꦩꦺꦴꦤ꧀ꦤꦶ꧊ꦩꦸꦱ꧉"​ꦲꦫꦸꦤ꧀ꦧꦚ꧀ꦗꦸꦂꦭꦸꦔꦤꦼꦩꦺꦴꦤ꧀ꦤꦶꦱꦼꦢꦸꦭꦸꦂꦫꦺꦲꦶꦁꦒꦸꦤꦸꦁꦱꦸꦕꦶ꧉​ꦧꦉꦁꦲꦫꦸꦤ꧀ꦏꦼꦠꦼꦩꦸꦏꦫꦺꦴ꧊ꦩꦸꦱꦧꦚ꧀ꦗꦸꦂꦚꦭꦩ꧀ꦩꦶ꧉​

^4:28 ꧊ꦩꦸꦱꦏꦤ꧀ꦝꦏꦫꦺꦴꦲꦫꦸꦤ꧀ꦲꦥꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃ꧈​ꦤꦭꦶꦏꦤ꧀ꦝꦮꦸꦃꦲꦶꦧꦭꦶꦩꦼꦚꦁ꧊ꦩꦺꦱꦶꦂ꧈​ꦲꦸꦒꦱꦏꦺꦃꦲꦶꦁꦏꦲꦺꦭꦺꦴꦏ꧀ꦏꦤ꧀ꦱꦶꦁꦏꦸꦢꦸꦢꦶꦠꦶꦤ꧀ꦢꦏ꧀ꦏꦏꦺ꧉​

^4:29 ꧊ꦩꦸꦱꦭꦤ꧀ꦲꦫꦸꦤ꧀ꦧꦚ꧀ꦗꦸꦂꦥꦝꦭꦸꦔꦧꦼꦧꦉꦁꦔꦤ꧀ꦩꦼꦚꦁ꧊ꦩꦺꦱꦶꦂꦱꦂꦠꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦼꦁꦒꦼꦝꦺꦤꦺ꧊ꦆꦱꦿꦲꦺꦭ꧀ꦏꦧꦺꦃ꧉​

^4:30 ꦲꦫꦸꦤ꧀ꦚꦿꦶꦠꦏ꧀ꦏꦏꦺꦲꦥꦱꦶꦁꦮꦶꦱ꧀ꦢꦶꦝꦮꦸꦃꦲꦏꦺꦄꦭ꧀ꦭꦃꦩꦫꦁ꧊ꦩꦸꦱꦏꦧꦺꦃ꧈​ꦱꦂꦠ꧊ꦩꦸꦱꦤꦶꦤ꧀ꦢꦏ꧀ꦏꦏꦺꦱꦏꦺꦃꦲꦶꦁꦏꦲꦺꦭꦺꦴꦏ꧀ꦏꦤ꧀ꦲꦶꦁꦔꦉꦥ꧀ꦥꦺꦮꦺꦴꦁꦮꦺꦴꦁꦩꦲꦸ꧉​

^4:31 ꦮꦺꦴꦁꦮꦺꦴꦁꦧꦚ꧀ꦗꦸꦂꦥꦝꦔꦤ꧀ꦢꦼꦭ꧀꧉​ꦧꦉꦁꦏꦿꦸꦔꦸꦪꦺꦤ꧀ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦔꦿꦮꦸꦃꦲꦶꦭꦤ꧀ꦥꦶꦂꦱꦏꦱꦁꦱꦫꦤꦺꦮꦺꦴꦁ꧊ꦆꦱꦿꦲꦺꦭ꧀꧈​ꦧꦚ꧀ꦗꦸꦂꦥꦝꦱꦸꦗꦸꦢ꧀ꦚꦼꦩ꧀ꦧꦃ꧈​ꦩꦫꦁꦄꦭ꧀ꦭꦃ꧉​