Alkitab/Pangentasan/30

^30:1 ꦢꦮꦸꦃꦲꦺꦒꦸꦱ꧀ꦠꦶꦄꦭ꧀ꦭꦃꦩꦼꦤꦺꦃꦩꦫꦁ꧊ꦩꦸꦱ꧈​"ꦒꦮꦺꦪꦩꦼꦱ꧀ꦧꦺꦃꦱꦏꦏꦪꦸꦲꦏꦱꦶꦪꦏꦁꦒꦺꦴꦔꦺꦴꦧꦺꦴꦁꦢꦸꦥ꧉​

^30:2 ꦮꦸꦗꦸꦢ꧀ꦢꦺꦥꦼꦱꦒꦶ꧈​ꦲꦩ꧀ꦧꦭꦤ꧀ꦢꦮꦤꦺꦥꦝ45ꦱꦺꦤ꧀ꦠꦶꦩꦺꦠꦼꦂ꧈​ꦱꦂꦠꦝꦸꦮꦸꦂꦫꦺ90ꦱꦺꦤ꧀ꦠꦶꦩꦺꦠꦼꦂ꧉​ꦱꦸꦔꦸꦱꦸꦔꦸꦲꦶꦁꦥꦺꦴꦗꦺꦴꦏ꧀ꦥꦥꦠ꧀ꦢꦢꦶꦱꦶꦗꦶꦏꦫꦺꦴꦩꦼꦱ꧀ꦧꦺꦃꦩꦲꦸ꧉​

^30:3 ꦲꦶꦁꦱꦶꦱꦶꦃꦤ꧀ꦝꦸꦮꦸꦂ꧈​ꦥꦶꦁꦒꦶꦂꦫꦤ꧀ꦩꦸꦧꦼꦁꦭꦤ꧀ꦱꦸꦔꦸꦱꦸꦔꦸꦤꦺꦏꦸꦢꦸꦢꦶꦭꦥꦶꦱ꧀ꦔꦁꦒꦺꦴꦩꦱ꧀ꦩꦸꦂꦤꦶ꧈​ꦱꦂꦠꦮꦺꦤꦺꦃꦲꦤꦮꦼꦁꦏꦸꦩꦱ꧀ꦩꦸꦧꦼꦁ꧉​

^30:4 ꦒꦮꦺꦪꦒꦼꦭꦁꦔꦤ꧀ꦥꦶꦏꦸꦭ꧀ꦭꦤ꧀ꦭꦺꦴꦫꦺꦴ꧈​ꦥꦱꦁꦔꦼꦤ꧀ꦲꦶꦁꦱꦔꦶꦱꦺꦴꦂꦫꦶꦁꦮꦼꦁꦏꦸꦏꦶꦮꦠꦼꦔꦼꦤ꧀ꦏꦁꦒꦺꦴꦚ꧀ꦭꦺꦴꦧꦺꦴꦏ꧀ꦏꦏꦺꦥꦶꦏꦸꦭ꧀ꦭꦤ꧀ꦱꦩꦱꦩꦼꦱ꧀ꦧꦺꦃꦲꦺꦢꦶꦥꦶꦏꦸꦭ꧀꧉​

^30:5 ꦥꦶꦏꦸꦭ꧀ꦭꦤ꧀ꦩꦲꦸꦏꦸꦢꦸꦢꦶꦒꦮꦺꦱꦏꦏꦪꦸꦲꦏꦱꦶꦪꦱꦂꦠꦢꦶꦭꦥꦶꦱ꧀ꦩꦱ꧀꧉​

^30:6 ꦩꦼꦱ꧀ꦧꦺꦃꦏꦸꦮꦶꦱꦺꦭꦺꦃꦤꦲꦶꦁꦱꦚ꧀ꦗꦧꦤꦶꦁꦒꦺꦴꦂꦝꦺꦤ꧀ꦱꦶꦁꦲꦤꦲꦶꦁꦱꦔꦉꦥ꧀ꦥꦶꦁꦥꦼꦛꦶꦥꦽꦗꦚ꧀ꦗꦶꦪꦤ꧀꧉​ꦲꦶꦁꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦲꦏꦸꦧꦏꦭ꧀ꦩꦁꦒꦶꦃꦲꦶꦏꦺꦴꦮꦺ꧉​

^30:7 ꦱꦧꦼꦤ꧀ꦲꦺꦱꦸꦏ꧀ꦱꦩꦱꦲꦫꦸꦤ꧀ꦠꦼꦏꦲꦉꦥ꧀ꦔꦽꦱꦶꦏ꧀ꦏꦶꦢꦩꦂꦢꦩꦂ꧈​ꦏꦸꦢꦸꦔꦺꦴꦧꦺꦴꦁꦢꦸꦥꦱꦶꦁꦒꦤ꧀ꦢꦤꦺꦲꦫꦸꦩ꧀ꦲꦶꦁꦱꦤ꧀ꦝꦸꦮꦸꦂꦫꦶꦁꦩꦼꦱ꧀ꦧꦺꦃꦩꦲꦸ꧉​

^30:8 ꦩꦼꦁꦏꦺꦴꦤꦺꦴꦲꦸꦒꦱꦩꦱꦲꦉꦥ꧀ꦚꦸꦩꦼꦢ꧀ꦢꦩꦂꦢꦩꦂꦲꦶꦁꦮꦪꦃꦱꦸꦫꦸꦥ꧀꧉​ꦥꦔꦺꦴꦧꦺꦴꦁꦔꦺꦢꦸꦥꦲꦶꦏꦸꦏꦸꦢꦸꦲꦗꦼꦒ꧀ꦢꦶꦠꦶꦤ꧀ꦢꦏ꧀ꦏꦏꦺꦲꦶꦁꦱꦼꦭꦮꦱ꧀ꦱꦺ꧉​

^30:9 ꦲꦗꦚꦲꦺꦴꦱ꧀ꦱꦏꦺꦢꦸꦥꦭꦶꦪꦤꦺꦲꦶꦁꦩꦼꦱ꧀ꦧꦺꦃꦲꦶꦏꦶ꧉​ꦲꦶꦪꦲꦗꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦲꦺꦴꦧꦂꦫꦤ꧀ꦲꦸꦠꦮꦏꦸꦂꦧꦤ꧀ꦝꦲꦂꦫꦤ꧀꧈​ꦩꦼꦁꦏꦺꦴꦤꦺꦴꦲꦸꦒꦲꦗꦔꦼꦱꦺꦴꦏ꧀ꦏꦏꦺꦏꦸꦂꦧꦤ꧀ꦲꦸꦚ꧀ꦗꦸꦏ꧀ꦏꦤ꧀ꦲꦶꦁꦱꦤ꧀ꦝꦸꦮꦸꦂꦫꦶꦁꦩꦼꦱ꧀ꦧꦺꦃꦲꦶꦏꦶ꧉​

^30:10 ꦱꦼꦠꦲꦸꦤ꧀ꦱꦼꦥꦶꦱ꧀ꦱꦤ꧀ꦲꦫꦸꦤ꧀ꦏꦸꦢꦸꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦤꦸꦕꦺꦏ꧀ꦏꦏꦺꦩꦼꦱ꧀ꦧꦺꦃꦱꦿꦤꦔꦼꦥꦾꦸꦂꦫꦶꦱꦸꦔꦸꦥꦥꦠ꧀ꦩꦲꦸꦔꦁꦒꦺꦴꦒꦼꦠꦶꦃꦲꦶꦁꦏꦺꦮꦤ꧀ꦱꦶꦁꦢꦶꦏꦸꦂꦧꦤ꧀ꦤꦏꦺꦏꦁꦒꦺꦴꦥꦔꦿꦸꦮꦠ꧀ꦠꦶꦁꦢꦺꦴꦱ꧉​ꦥꦽꦏꦫꦲꦶꦏꦶꦏꦸꦢꦸꦲꦗꦼꦒ꧀ꦢꦶꦠꦶꦤ꧀ꦢꦏ꧀ꦏꦏꦺꦱꦼꦠꦲꦸꦤ꧀ꦱꦼꦥꦶꦱ꧀ꦱꦤ꧀꧉​ꦩꦼꦱ꧀ꦧꦺꦃꦲꦶꦏꦶꦱꦼꦭꦮꦱ꧀ꦱꦺꦏꦸꦢꦸꦱꦸꦕꦶꦱꦂꦠꦢꦶꦕꦮꦶꦱ꧀ꦱꦏꦺꦏꦒꦼꦩ꧀ꦲꦏꦸ꧈​ꦥꦔꦺꦫꦤ꧀ꦲꦭ꧀ꦭꦃꦩꦸ꧉"​

^30:11 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈​

^30:12 "ꦱꦩꦱꦔꦺꦠꦸꦁꦧꦁꦱ꧊ꦆꦱꦿꦲꦺꦭ꧀꧈​ꦱꦧꦼꦤ꧀ꦮꦺꦴꦁꦏꦸꦢꦸꦩ꧀ꦧꦪꦂꦩꦫꦁꦲꦏꦸꦝꦸꦮꦶꦠ꧀ꦠꦼꦧꦸꦱ꧀ꦱꦤ꧀ꦤꦺꦚꦮꦤꦺ꧈​ꦱꦸꦥꦪꦱꦗꦿꦺꦴꦤꦺꦥꦝꦢꦶꦕꦕꦃꦲꦏꦺꦲꦺꦴꦫꦏꦼꦤꦲꦶꦁꦮꦼꦮꦼꦭꦏ꧀꧉​

^30:13 ꦱꦥꦮꦲꦺꦱꦶꦁꦢꦶꦲꦺꦠꦸꦁꦩꦲꦸꦏꦸꦢꦸꦩ꧀ꦧꦪꦂꦝꦸꦮꦶꦠ꧀ꦩꦤꦸꦠ꧀ꦏꦠꦼꦩ꧀ꦠꦸꦮꦤ꧀ꦤꦶꦁꦉꦒ꧉​ꦝꦸꦮꦶꦠ꧀ꦩꦲꦸꦏꦸꦢꦸꦢꦶꦧꦪꦂꦢꦢꦶꦥꦶꦱꦸꦁꦱꦸꦁꦏꦒꦼꦩ꧀ꦲꦏꦸ꧉​

^30:14 ꦱꦶꦁꦢꦶꦲꦺꦠꦸꦁꦪꦏꦸꦮꦶꦱꦧꦼꦤ꧀ꦮꦺꦴꦁꦱꦶꦁꦮꦶꦱ꧀ꦲꦸꦩꦸꦂꦫꦺꦴꦁꦥꦸꦭꦸꦃꦠꦲꦸꦤ꧀ꦲꦸꦠꦮꦭꦸꦮꦶꦃ;ꦮꦺꦴꦁꦲꦶꦏꦸꦱꦶꦁꦏꦸꦢꦸꦩ꧀ꦧꦪꦂꦝꦸꦮꦶꦠ꧀ꦩꦲꦸ꧉​

^30:15 ꦮꦺꦴꦁꦱꦸꦒꦶꦃꦲꦺꦴꦫꦏꦼꦤꦩ꧀ꦧꦪꦂꦭꦸꦮꦶꦃꦱꦏꦱꦼꦩꦺꦴꦤꦺꦴ꧈​ꦢꦺꦤꦺꦮꦺꦴꦁꦩꦶꦱ꧀ꦏꦶꦤ꧀ꦲꦺꦴꦫꦏꦼꦤꦩ꧀ꦧꦪꦂꦏꦸꦫꦁ꧉​

^30:16 ꦝꦸꦮꦶꦠ꧀ꦱꦏꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦩꦲꦸꦏ꧀ꦭꦸꦩ꧀ꦥꦸꦏ꧀ꦤ꧈​ꦲꦼꦁꦒꦺꦴꦤ꧀ꦤꦼꦤ꧀ꦩꦶꦪꦂꦫꦏꦺꦩꦃꦥꦊꦁꦒꦃꦲꦤ꧀ꦏꦸ꧉​ꦥꦗꦼꦒ꧀ꦲꦶꦏꦶꦏꦁꦒꦺꦴꦠꦼꦧꦸꦱ꧀ꦱꦤ꧀ꦤꦺꦚꦮꦤꦺ꧈​ꦱꦂꦠꦲꦏꦸꦧꦏꦭ꧀ꦠꦤ꧀ꦱꦃꦲꦺꦔꦼꦠ꧀ꦭꦤ꧀ꦔꦪꦺꦴꦩ꧀ꦩꦶꦮꦺꦴꦁꦮꦺꦴꦁꦩꦲꦸ꧉"​

^30:17 ꦥꦔꦤ꧀ꦢꦶꦏꦤꦺꦄꦭ꧀ꦭꦃꦩꦫꦁ꧊ꦩꦸꦱ꧈​

^30:18 "ꦒꦮꦺꦪꦥꦢꦱ꧀ꦱꦤ꧀ꦱꦏꦥꦿꦸꦁꦒꦸ꧈​ꦝꦱꦂꦫꦺꦲꦶꦪꦱꦏꦥꦿꦸꦁꦒꦸ꧉​ꦧꦏ꧀ꦩꦲꦸꦥꦽꦤꦃꦤꦲꦶꦁꦲꦤ꧀ꦠꦫꦤꦺꦏꦺꦩꦃꦭꦤ꧀ꦩꦼꦱ꧀ꦧꦺꦃ꧈​ꦧꦚ꧀ꦗꦸꦂꦲꦶꦱꦺꦤ꧀ꦤꦤꦧꦚꦸ꧉​

^30:19 ꦧꦚꦸꦩꦲꦸꦏꦁꦒꦺꦴꦲꦫꦸꦤ꧀ꦭꦤ꧀ꦲꦤꦏ꧀ꦲꦤꦏ꧀ꦏꦺꦱꦸꦥꦪꦥꦝꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦱꦼꦱꦸꦕꦶ꧈​

^30:20 (30:20-21)ꦱꦢꦸꦫꦸꦁꦔꦺꦥꦝꦩ꧀ꦭꦼꦧꦸꦲꦶꦁꦏꦺꦩꦃꦲꦸꦠꦮꦚꦼꦝꦏ꧀ꦏꦶꦩꦼꦱ꧀ꦧꦺꦃꦥꦽꦭꦸꦱꦲꦺꦴꦱ꧀ꦏꦸꦂꦧꦤ꧀ꦝꦲꦂꦫꦤ꧀꧉​ꦮꦺꦴꦁꦮꦺꦴꦁꦩꦲꦸꦮꦗꦶꦧ꧀ꦮꦶꦱꦸꦃꦠꦔꦤ꧀ꦭꦤ꧀ꦱꦶꦏꦶꦭ꧀ꦝꦶꦱꦶꦏ꧀꧈​ꦱꦸꦥꦪꦲꦺꦴꦫꦥꦝꦩꦠꦶ꧉​ꦥꦽꦤꦠꦤ꧀ꦲꦶꦏꦶꦏꦸꦢꦸꦢꦶꦠꦶꦤ꧀ꦢꦏ꧀ꦏꦏꦺꦢꦺꦤꦶꦁꦲꦫꦸꦤ꧀ꦭꦤ꧀ꦲꦤꦏ꧀ꦠꦸꦫꦸꦤꦺꦲꦶꦁꦱꦼꦭꦮꦱ꧀ꦱꦺ꧉"​

^30:21 (30:20)

^30:22 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈​

^30:23 "ꦚ꧀ꦗꦸꦥꦸꦏ꧀ꦏꦧꦸꦩ꧀ꦧꦸꦧꦸꦩ꧀ꦧꦸꦱꦶꦁꦧꦼꦕꦶꦏ꧀ꦝꦺꦮꦺ꧈​ꦧ꧀ꦭꦼꦤ꧀ꦢꦺꦴꦏ꧀ꦩꦸꦂꦤꦼꦩ꧀ꦏꦶꦭꦺꦴꦒꦿꦩ꧀꧈​ꦏꦪꦸꦩꦤꦶꦱ꧀ꦠꦼꦭꦸꦁꦏꦶꦭꦺꦴꦒꦿꦩ꧀꧈​ꦠꦼꦧꦸꦲꦫꦸꦩ꧀ꦠꦼꦭꦸꦁꦏꦶꦭꦺꦴꦒꦿꦩ꧀꧈​

^30:24 ꦱꦂꦠꦏꦪꦸꦠꦺꦗꦤꦼꦩ꧀ꦏꦶꦭꦺꦴꦒꦿꦩ꧀꧈​ꦏꦧꦺꦃꦢꦶꦠꦶꦩ꧀ꦧꦁꦩꦤꦸꦠ꧀ꦠꦶꦩ꧀ꦧꦁꦔꦤ꧀ꦱꦶꦁꦉꦱ꧀ꦩꦶ꧉​ꦠꦩ꧀ꦧꦃꦲꦤꦊꦔꦗ꦳ꦲꦶꦠꦸꦤ꧀ꦥꦠꦁꦭꦶꦠꦼꦂ꧈​

^30:25 ꦭꦤ꧀ꦒꦮꦺꦪꦊꦔꦲꦸꦥꦕꦫ꧈​ꦱꦶꦁꦢꦶꦕꦩ꧀ꦥꦸꦂꦏꦪꦊꦔꦗꦼꦧꦢ꧀꧉​

^30:26 ꦕꦩ꧀ꦥꦸꦂꦫꦤ꧀ꦩꦲꦸꦲꦼꦁꦒꦺꦴꦤ꧀ꦤꦼꦤ꧀ꦚ꧀ꦗꦼꦧꦢ꧀ꦢꦶꦏꦺꦩꦃꦥꦊꦁꦒꦃꦲꦤ꧀ꦏꦸ꧈​ꦥꦼꦛꦶꦥꦽꦗꦚ꧀ꦗꦶꦪꦤ꧀꧈​

^30:27 ꦩꦺꦗꦭꦤ꧀ꦱꦥꦶꦫꦤ꧀ꦠꦶꦤꦺꦏꦧꦺꦃ꧈​ꦥꦼꦢꦩꦂꦫꦤ꧀ꦭꦤ꧀ꦥꦶꦫꦤ꧀ꦠꦶꦤꦺ꧈​ꦩꦼꦱ꧀ꦧꦺꦃꦏꦁꦒꦺꦴꦔꦺꦴꦧꦺꦴꦁꦢꦸꦥ꧈​

^30:28 ꦩꦼꦱ꧀ꦧꦺꦃꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦭꦤ꧀ꦱꦥꦶꦫꦤ꧀ꦠꦶꦤꦺꦏꦧꦺꦃ꧈​ꦱꦂꦠꦥꦢꦱ꧀ꦱꦤ꧀ꦭꦤ꧀ꦝꦱꦂꦫꦺ꧉​

^30:29 ꦧꦫꦁꦧꦫꦁꦩꦲꦸꦝꦺꦮꦺꦏ꧀ꦤꦏꦒꦼꦩ꧀ꦲꦏꦸ;ꦱꦿꦤꦥꦠꦿꦥ꧀ꦩꦼꦁꦏꦺꦴꦤꦺꦴꦏꦧꦺꦃꦢꦢꦶꦱꦸꦕꦶ꧉​ꦱꦥꦮꦲꦺꦱꦂꦠꦲꦥꦮꦲꦺꦱꦶꦁꦚꦺꦁꦒꦺꦴꦭ꧀ꦧꦏꦭ꧀ꦤꦼꦩꦃꦲꦶꦕꦶꦭꦏꦩꦼꦂꦒꦢꦪꦤꦶꦁꦏꦱꦸꦕꦺꦤ꧀ꦤꦺ꧉​

^30:30 ꦱꦮꦶꦱ꧀ꦱꦺꦏꦸꦮꦶꦲꦫꦸꦤ꧀ꦭꦤ꧀ꦲꦤꦏ꧀ꦲꦤꦏ꧀ꦏꦺꦗꦼꦧꦢ꧀ꦢꦤꦱꦂꦠꦠꦼꦠꦼꦥ꧀ꦤꦢꦢꦶꦲꦶꦩꦩ꧀ꦔ꧀ꦭꦢꦺꦤ꧀ꦤꦶꦲꦏꦸ꧉​

^30:31 ꦏꦤ꧀ꦝꦏ꧀ꦤꦩꦫꦁꦧꦁꦱ꧊ꦆꦱꦿꦲꦺꦭ꧀꧈​ꦊꦔꦗꦼꦧꦢ꧀ꦲꦶꦏꦸꦱꦼꦧꦚ꧀ꦗꦸꦂꦫꦺꦩꦸꦁꦏꦸꦢꦸꦢꦶꦲꦼꦁꦒꦺꦴꦱꦗꦿꦺꦴꦤꦶꦁꦊꦭꦢꦶꦩꦫꦁꦲꦏꦸ꧉​

^30:32 ꦊꦔꦩꦲꦸꦲꦺꦴꦫꦏꦼꦤꦢꦶꦲꦼꦁꦒꦺꦴꦮꦺꦴꦁꦮꦺꦴꦁꦭꦸꦩꦿꦃ꧈​ꦱꦂꦠꦏꦺꦴꦮꦺꦏꦧꦺꦃꦥꦝꦲꦺꦴꦫꦏꦼꦤꦔꦁꦒꦺꦴꦧꦸꦩ꧀ꦧꦸꦧꦸꦩ꧀ꦧꦸꦏꦪꦩꦼꦁꦏꦺꦴꦤꦺꦴꦩꦲꦸ꧉​ꦊꦔꦏꦸꦮꦶꦱꦸꦕꦶ꧈​ꦭꦤ꧀ꦏꦺꦴꦮꦺꦏꦧꦺꦃꦏꦸꦢꦸꦥꦝꦔꦁꦒꦼꦥ꧀ꦱꦸꦕꦶ꧉​

^30:33 ꦱꦥꦮꦲꦺꦱꦶꦁꦒꦮꦺꦊꦔꦏꦪꦩꦼꦁꦏꦺꦴꦤꦺꦴꦩꦲꦸ꧈​ꦲꦸꦠꦮꦔꦁꦒꦺꦴꦏꦁꦒꦺꦴꦱꦥꦮꦲꦺꦱꦶꦁꦢꦸꦢꦸꦲꦶꦩꦩ꧀꧈​ꦧꦏꦭ꧀ꦲꦺꦴꦫꦢꦏ꧀ꦲꦁꦒꦼꦥ꧀ꦢꦢꦶꦲꦸꦩꦠ꧀ꦏꦸ꧉’"​

^30:34 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦚ꧀ꦗꦸꦥꦸꦏ꧀ꦏꦧꦸꦩ꧀ꦧꦸꦧꦸꦩ꧀ꦧꦸꦲꦶꦏꦶꦲꦏꦺꦃꦲꦺꦥꦝꦧ꧀ꦭꦼꦤ꧀ꦢꦺꦴꦏ꧀ꦩꦸꦂ꧈​ꦏꦸꦭꦶꦠ꧀ꦭꦺꦴꦏ꧀ꦏꦤ꧀꧈​ꦧ꧀ꦭꦼꦤ꧀ꦢꦺꦴꦏ꧀ꦫꦱꦩꦭꦱꦂꦠꦩꦼꦚꦤ꧀ꦠꦸꦭꦺꦤ꧀꧉​

^30:35 ꦏꦧꦺꦃꦩꦲꦸꦲꦼꦁꦒꦺꦴꦤ꧀ꦤꦼꦤ꧀ꦒꦮꦺꦢꦸꦥ꧈​ꦏꦕꦩ꧀ꦥꦸꦂꦏꦪꦊꦔꦗꦼꦧꦢ꧀꧉​ꦠꦩ꧀ꦧꦃꦲꦤꦲꦸꦪꦃꦱꦸꦥꦪꦠꦼꦠꦼꦥ꧀ꦩꦸꦂꦤꦶꦭꦤ꧀ꦱꦸꦕꦶ꧉​

^30:36 (30:36-37)ꦢꦸꦥꦩꦲꦸꦱꦭꦺꦴꦁꦝꦼꦥ꧀ꦭꦺꦴꦏ꧀ꦏꦼꦤ꧀ꦔꦤ꧀ꦠꦶꦲꦭꦸꦱ꧀꧉​ꦒꦮꦤꦼꦤ꧀ꦲꦶꦁꦏꦺꦩꦃꦥꦊꦁꦒꦃꦲꦤ꧀ꦏꦸꦭꦤ꧀ꦱꦮꦸꦂꦤꦲꦶꦁꦱꦔꦉꦥ꧀ꦥꦶꦁꦥꦼꦛꦶꦥꦽꦗꦚ꧀ꦗꦶꦪꦤ꧀꧉​ꦢꦸꦥꦩꦲꦸꦲꦁꦒꦼꦥ꧀ꦥꦼꦤ꧀ꦧꦫꦁꦱꦶꦁꦱꦸꦕꦶꦧꦔꦼꦠ꧀꧈​ꦱꦶꦁꦢꦶꦱꦼꦝꦶꦪꦏ꧀ꦏꦏꦺꦩꦸꦁꦏꦒꦼꦩ꧀ꦲꦏꦸꦝꦺꦮꦺ꧉​ꦲꦗꦲꦤꦱꦶꦁꦒꦮꦺꦕꦩ꧀ꦥꦸꦂꦫꦤ꧀ꦏꦪꦩꦼꦁꦏꦺꦴꦤꦺꦴꦩꦲꦸꦏꦁꦒꦺꦴꦲꦮꦏ꧀ꦏꦺꦝꦺꦮꦺ꧉​

^30:37 (30:36)

^30:38 ꦱꦥꦮꦲꦺꦱꦶꦁꦒꦮꦺꦕꦩ꧀ꦥꦸꦂꦫꦤ꧀ꦏꦪꦩꦼꦁꦏꦺꦴꦤꦺꦴ꧈​ꦧꦏꦭ꧀ꦲꦺꦴꦫꦢꦏ꧀ꦲꦁꦒꦼꦥ꧀ꦢꦢꦶꦲꦸꦩꦠ꧀ꦏꦸ꧉"​