Íslensk erfðagreining
![](http://upload.wikimedia.org/wikipedia/commons/thumb/c/cc/%C3%8Dslensk_Erf%C3%B0agreining_%2831027920356%29.jpg/220px-%C3%8Dslensk_Erf%C3%B0agreining_%2831027920356%29.jpg)
Íslensk erfðagreining (skammstafað ÍE, heiti á ensku: DeCode genetics, stílfært deCODE) er íslenskt líftæknifyrirtæki sem var stofnað árið 1996. Forstjóri þess frá upphafi hefur verið Kári Stefánsson. Fyrirtækið stundar rannsóknir í mannerfðafræði í því markmiði að finna lausnir til forvarna gegn og til meðferðar og lækninga á sjúkdómum.[1]
Í ársbyrjun 2017 höfðu yfir 175.000 Íslendingar tekið þátt í rannsóknum ÍE með því að gefa lífsýni og samþykki til að upplýsingar um arfgerðir þeirra og heilsufar séu notaðar til rannsókna. Vísindamenn ÍE hafa birt yfir 400 vísindagreinar í alþjóðlegum tímaritum og hafa fundið erfðabreytileika sem tengjast tugum sjúkdóma; krabbameinum, tauga- og geðsjúkdómum, hjarta- og æðasjúkdómum o.fl. Niðurstöður ÍE nýtast þegar til þróunar nýrra lyfja, t.d gegn hjarta- og æðasjúkdómum og Alzheimer.
Íslensk erfðagreining á samstarf við fjölmargar heilbrigðis- og rannsóknastofnanir á Íslandi og erlendis.
Árið 2003 opnaði fyrirtækið, í samvinnu við Friðrik Skúlason, endurgjaldslausan aðgang að Íslendingabók, gagnagrunni með ættfræðilegar upplýsingar um alla þá Íslendinga sem heimildir eru um. Í febrúar 2017 voru notendur rúmlega 221.000.
Frá 2012 hefur Íslensk erfðagreinig verið í eigu lyfjafyrirtækisins Amgen, en lýtur alfarið íslenskri stjórn og starfar samkvæmt íslenskum lögum og reglugerðum.
Í árslok 2016 störfuðu um 200 manns hjá ÍE.
Neðanmálsgreinar
[breyta | breyta frumkóða]- ↑ Fyrirtækið http://www.decode.is