Friedrich Nietzsche
![](http://upload.wikimedia.org/wikipedia/commons/thumb/2/23/Nietzsche1882.jpg/200px-Nietzsche1882.jpg)
Friedrich Wilhelm Nietzsche (Röcken, 15 d'otubri 1844 – Weimar, 25 d'agostu 1900) hue un filósofu, pueta, músicu i filólogu alemán, considerau unu los pensaoris modernus mas enfluyentis del sigru XIX. Es unu los tres maestrus la sospecha, unta Karl Marx i Sigmund Freud.
Pensaeru
[Edital | Editá'l códigu]Nietzsche realizó una prohunda crítica a los valoris la cultura ociental, ya que pensaba qu'estus valoris bian negau la realiá i la via. El origin d'estu es el platonismu, que bia deviiu la realiá en dos mundus, el que mosotrus percibimus i algotru considerau comu verdaeru, perfetu, sin movicion. El judaísmu i el cristianismu huerun los continuaoris desta tendencia.
Izi que la moral s'á basau nunus valoris contra la via (compasión, umildá...). La huchea la moral d'esclavus ya qu'es la moral de los débilis. Peru á dessestiu algotra, la moral de señoris, propia de los antiguus griegus, enantis la filosofia de Sócrati i Platón. Los señoris son huertis, puderosus, i aman la via en tolas dimensionis. Peru los débilis realizarun una rebelión, la rebelión de los esclavus, i empusierun los sus valoris a los huertis.
Nesti sentiu provien las sus críticas acia la religion i la filosofia. El cristianismu á enventau un sel perfetu, Dios, despreciandu assina al ombri. Pa Nietzsche, el concetu Dios contraizi a la via, i la religion á repremiu los enstintus del ombri, entrouciendu el concetu pecau i curpa, hiziendu qu'el ombri non aceti las sus pasionis i non landee satisfacel las sus anbicionis i placeris. Mentris, la filosofia traicional á centrau el su campu estuyu nel mundu perfetu, negandu la realiá. El concetu realiá de Nietzsche es el mesmu qu'el d'Eráclitu (tó es movicion).