Kasteel van Mey
![](http://upload.wikimedia.org/wikipedia/commons/thumb/3/3a/Castle_of_Mey_-Caithness_-Scotland-6July2006.jpg/250px-Castle_of_Mey_-Caithness_-Scotland-6July2006.jpg)
Die Kasteel van Mey (Engels: Castle of Mey; voorheen Barrogill-kasteel, Barrogill Castle) is in Caithness aan die noordkus van Skotland geleë, sowat 10 km wes van die dorpie John o' Groats. As dit mooiweer is, is daar ’n pragtige uitsig op die Orkney-eilande.
Geskiedenis
[wysig | wysig bron]Die grond van Mey behoort aan die biskoppe van Caithness. Die kasteel is tussen 1566 en 1572 deur George Sinclair, die 4de Graaf van Caithness, laat bou, moontlik op die plek van ’n vroeëre fort.[1] Dit is geërf deur die graaf se jongste seun, William, stigter van die Sinclairs van Mey, hoewel dit later die woning van die grawe geword het.[2]
Die kasteel se naam is na Barrogill verander en dit is verskeie kere in die 17de en 18de eeu vergroot, en weer in 1821. In 1928 is dit deur ’n kaptein gekoop wat die kasteel tydens die Tweede Wêreldoorlog as ’n rusplek vir soldate gebruik het. In 1950 is die grond verkoop.[3]
Koninklike woning
[wysig | wysig bron]Die kasteel was in ’n verwaarloosde toestand toe Elizabeth, die koninginmoeder en weduwee van George VI, in 1952 die kasteel en grond koop. Die koninginmoeder het die kasteel laat restoureer om as ’n vakansiehuis te gebruik en dit weer sy ou naam gegee.[2] Sy het dit gereeld in Augustus en Oktober besoek, van 1955 tot met haar dood in Maart 2002.
In Julie 1996 het sy die eiendom oorgedra aan ’n trust, wat die kasteel ná haar dood gereeld vir die publiek oopstel.[4] Dit is einde Julie, begin Augustus tien dae lank gesluit wanneer Charles III en sy vrou, Camilla, daar bly.
Verwysings
[wysig | wysig bron]- ↑ "Castle of Mey, NMRS Number: ND27SE 1.00". Canmore. RCAHMS. Besoek op 25 November 2008.[dooie skakel]
- ↑ 2,0 2,1 "Castle of Mey, Listed Building Report". Historic Scotland. Besoek op 25 November 2008.
- ↑ "Castle of Mey (Barrogill Castle)". An Inventory of Gardens and Designed Landscapes in Scotland. Historic Scotland. Besoek op 25 November 2008.
- ↑ "Castle of Mey". Gazetteer for Scotland (in Engels). Geargiveer vanaf die oorspronklike op 4 Julie 2019. Besoek op 25 November 2008.
Eksterne skakels
[wysig | wysig bron]- kasteel en tuin van Mey Geargiveer 10 Maart 2016 op Wayback Machine
Hierdie artikel is vertaal uit die Engelse Wikipedia
Wikimedia Commons het meer media in die kategorie Kasteel van Mey.