無綫電視管理商標版權嘅爭議

無綫電視發展多年，製作唔少影視作品，對香港社會發展有一定角色，亦不時成為公眾討論嘅對象。連同佢哋嘅唔同商標，無綫電視因而持有同管理唔少版權。不過，喺涉及第三方使用呢啲商標或者影視作品嘅問題上，無綫嘅做法就俾一啲人批評。有啲人批評，無綫就連坊間非牟利使用佢哋作品做二次創作都打壓，反而自己就唔尊重他人版權。亦有人認為，無綫透過管理呢啲版權商標嘅手段，去打壓外間對無綫嘅批評。

部分非牟利使用無綫持版權作品嘅爭議

「觀眾在民間電視大獎2021」爭議

喺2022年頭，電視評論家方以文舉辦「觀眾在民間電視大獎2021」，但去到三月初，方以文就透露，話Facebook有幾個民間電視大獎嘅貼文都被無綫電視投訴侵權，連埋Instagram幾個post都無咗，懷疑係因為當中有部分相包含TVB嘅角色造型照。

無綫回應嘅時候就話，專頁舉辦嘅電視大獎，唔代表必須使用佢哋嘅劇照。

歐錦棠網上分享亞視劇《精武門》片段被無綫投訴

2021年3月，歐錦棠喺自己嘅YouTube頻道《乜乜棠水舖》入面分享自己喺1995年拍攝亞視劇集《精武門》（版權後來被無綫買咗）嘅經歷同幕後花絮，但片段上載唔夠1天時間，歐錦棠就收到無綫投訴，要求佢立即下架。之後歐錦棠就暗指無綫大細超，質疑其他YouTube Channel點解冇事。

被部分人視為借版權手段打壓異見批評嘅手段

網民教人刪台教學被無綫電視告侵權

喺2019年底，有網民因應收費電視、網絡媒體同埋串流影音平臺嘅興起，教人點樣喺電視中刪除唔需要嘅電視頻道，當中有無綫電視節目畫面嘅片段只係佔整體內容嘅好少部分。不過，無綫電視嘅法律部就警告有關網民，話佢侵權。Facebook專頁「抵制tvb運動，請即讚好」形容無綫咁做係蝕到發癲，博網民唔識法律而縮沙。亦有評論就認為，無綫係希望透過有關警告，阻止有關教學嘅分發。

游大東評論無綫財政表現被打壓

2022年3月，專欄作家游大東喺社交媒體刊登「無綫電視發盈警料2021年至少蝕6.4億」嘅報道，分析無綫蝕錢嘅原因，結果被無線電視而當中附圖有無綫台徽為理由檢舉，最後游大東重新製作一張附圖再上載有關報道。游大東批評，文章並無將台徽牟利，事件反映無綫管理層欠缺接受批評嘅胸襟，期望管理層認真反省，與其花時間去理會負評，加以反擊，倒不如做好內容。

關於Facebook專頁「思思TVB的二三事」

自香港反送中運動起，有網民開設facebook專頁「思思TVB的二三事」，對無綫電視一直持批判態度。

喺2022年3月，無綫電視被揭發旗下子公司「Zennora Group Limited」申請註冊「SayNo4TVB」同埋「CCTVB」商標，而咁啱專頁英文名稱同埋Instagram帳號就係「SayNo4TVB」，思思TVB的二三事嘅團隊之後表示，「除咗想趕盡殺絕我哋，諗唔到其他原因」，但就未打算改名。無綫回應註冊商標爭議嘅時候，就話呢啲係每家企業最基本嘅責任，但就冇解釋點解註冊呢兩個商標。

之後，專頁多次比無綫指控侵犯版權，搞到專頁被Facebook停權。事前，專頁曾經批評無綫節目《學是疫學非》唔應該搞人用霧化槍噴人，以及介紹無綫唔同節目嘅贊助商等。專頁團隊質疑Facebook嘅做法，亦認為無綫係因為不滿自己被批評，先至向Facebook舉報，做法唔尊重言論自由，又提醒唔同Facebook專頁使用TVB節目嘅截圖時要留意。

無綫作出有爭議嘅版權聲稱

指摘「myAV SUPER」成人網站侵權

無綫推出旗下業務「myTVSUPER」後，向成人網站「myAV SUPER」發出警告，話佢刻意抄襲、致使有公眾被誤導」，但「myAV SUPER」就話「My」、「Super」都係極普通嘅字，紅綠藍更係平常不過，冇理由只係由無綫專用，反擊要求無綫道歉。

關於無綫行動嘅法律依據

根據本港《版權條例》，只有當某項作品嘅實質部分被人採用嗰陣先算侵犯版權。《版權條例》第 38 同 39 條指研究、私人研習、批評、評論、新聞報導某一作品，只要附有足夠嘅確認聲明，就唔算侵犯版權，而就已發表版本嚟講，亦唔算侵犯其排印編排嘅版權。