水族館
![](http://upload.wikimedia.org/wikipedia/commons/thumb/2/23/Georgia_Aquarium_-_Giant_Grouper_edit.jpg/204px-Georgia_Aquarium_-_Giant_Grouper_edit.jpg)
水族館係用來展出同陳列各種魚類嘅場館。大部份嘅公眾水族館都有數個較細嘅水族箱,同一個或幾個大型水族箱。大型水族箱嘅水容量有成幾千,甚至一萬立方米,可以養大型嘅動物,例如海豚、鯊魚、白鯨。水陸兩棲動物好似水獺、企鵝亦可以喺水族館度養。水族館通常都有專門研究人員,研究園內動物生境同生活規律。
水族館運作上同動物園及博物館相似。一座良好水族館應有特別嘅展覽,包括佢長駐嘅物種,以吸引遊客再次光臨。近年,大型水族館都嘗試取得及育養多個品種嘅海洋魚類,甚至水母。亦有部份水族館設有動物互動園(petting zoo),例如,蒙特利海灣水族館有一個淺水水族箱,養一啲鰩魚,遊客可以摸鰩魚似皮革嘅皮膚。
質素好嘅水族館通常都附設有重要嘅海洋學研究機構,自行進行研究計劃,此外,水族館亦會推行好多同環境,物種保育有關嘅工作。
歷史
[編輯]![](http://upload.wikimedia.org/wikipedia/commons/thumb/3/3e/Detroit_aquarium_1890-1910.jpg/220px-Detroit_aquarium_1890-1910.jpg)
全球第一座水族館係1853年5月喺倫敦動物園麗晶公園(Regent's Park)開幕。馬戲大師費尼爾司·泰勒·巴納姆(P.T. Barnum)亦隨即響紐約百老匯建成美國第一間座水族館。佢參照底特律、紐約、舊金山嘅例子,美國主要城市嘅公眾水族館亦陸續開幕。
水族館之最
[編輯]![](http://upload.wikimedia.org/wikipedia/commons/thumb/2/2b/Okinawa_Churaumi_Aquarium.jpg/350px-Okinawa_Churaumi_Aquarium.jpg)
美國芝加哥嘅謝德水族館(Shedd Aquarium)有容量 19,000 立方米嘅巨型水族箱,養咗兩萬條魚,做過全球最大嘅水族館。
但呢個紀錄隨後俾美國亞特蘭大佐治亞州嘅佐治亞水族館(Georgia Aquarium)破咗。佐治亞水族館內有容量達約30,000立方米,養咗500種物種,一共十萬隻動物。而杜拜購物中心取代佐治亞水族館嘅地位。水族館嘅水族箱有幾大,通常基於成本考慮。
蒙特瑞灣水族館(Monterey Bay Aquarium)入面有一個以阿加力建造嘅觀察窗,可以觀賞水族館嘅主箱,觀察窗長17米、高5米、厚33厘米,曾經係全世界最大嘅水族觀察窗。而最大嘅觀察窗就設於日本國頭郡本部町海洋博公園內嘅沖繩美麗海水族館(Okinawa Churaumi Aquarium),長22.5米、高8.2米、厚60厘米,而個水族館更係現時全球第二大水族館。
1985年1月,奧克蘭嘉利塔頓水底世界(Kelly Tarlton's Underwater World)起咗全球首個透明水底隧道。隧道壁用阿加力整,110米長,用咗十個月,花咗三百萬新西蘭元。家下全球最長嘅水底隧道喺中國上海海洋水族館,155米長。
2006年,香港海洋公園用幾百萬港元興建全亞洲最大嘅水母館,展出超過15種水母,超過1,500隻水母。水母好難喺封閉空間度養嘅,原因係水母喺天然環境中從未遇過牆呢啲障礙物,亦冇避開障礙嘅本能,用箱養水母,水母只會係咁撞牆,水母展覽要用水流配合。
供水方面
[編輯]大多數水族館都接近海洋,以確保天然海水嘅穩定供應。而謝德水族館則係開創先河嘅內陸水族館,靠特別嘅槽車以鐵路運送海水。相反,佐治亞水族館就從城市供水系統中攞水,並喺水度加入鹽及礦物質調製成海水,做法同好多家居水族箱一樣。
人工繁殖同保育工作
[編輯]水族館通常都附設有海洋學研究團隊,甚至係重要嘅海洋學研究機構,自行進行研究計劃。人工繁殖計劃係其中重要嘅一環,人工繁殖一方面可以增加對相關物種嘅認識,而且可減少於野外捕捉物種。2001年5月,香港海洋公園內2條雌性樽鼻海豚各誕下2條小海豚,係世界首項人工受孕繁殖樽鼻海豚。
水族館亦會進行好多環境及物種保育工作,並提高公眾嘅保育意識。
睇埋
[編輯]出面網頁
[編輯]拎
[編輯]![](http://upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)