和合石墳場
和合石墳場（英文：Wo Hop Shek Cemetery）係香港一個喺新界和合石嘅公眾墳場，由香港政府管理，係香港最大嘅墳場。和合石墳場起喺山上面，山係北大刀岃東北一支，遍及和合石谷地，山腳到山頂。和合石墳場喺粉嶺西南，可以由粉嶺火車站經華明邨過去。
史
[編輯]和合石村喺二十世紀初立村，寓意和諧好合[1]。地名、墳場名，亦由此而來。
一九四一年，香港政府就有起和合石墳場嘅念頭[1]。當時唐人葬喺九龍七號墳場，即係而家嘅順利邨。政府認為呢個地方，經濟價值好高，就提出搬墓到和合石，騰出土地，發展城市[1]。一九五零年，和合石墳場正式啟用[1]。和合石雖然地點偏遠，但勝在近九廣鐵路，同羅湖嘅沙嶺墳場，有同工之妙。一九五一年開咗和合石支線，方便運載棺木，亦喺清明、重陽，載客拜山[1]。所以今日紅磡火車站側邊，殯儀館林立，絕非偶然。支線喺一九八三年，九廣鐵路全線電氣化後作廢[1]。
和合石墳場，原本得棺地，一九五七年加金塔地[1]。
分佈
[編輯]和合石墳場分棺地同金塔地兩部份[1]按發年期分。後尾墳場位極之缺乏，於是乎，香港政府喺和合石火化場附近，開闢靈灰安置所，安骨灰位之用。另外喺山腳，亦預有大片墓地，留來畀大災難，好似地震、瘟疫、水災等，可以即刻安葬死者。所以叫災難預留用地，係全香港唯一有預留墓地。現時墳埸嘅浩園同景仰園，原來亦係災難預留地。另外和合石墳場時時潮濕，場內留有小片墓地，留畀山泥傾瀉而墓地倒塌，遷葬補償之用。除此之後，亦有公墓、重整棺木地、西安墓園、同鄉墓地[1]
和合石墳場棺地，用來擺棺木，一般只安葬五年，但後尾稍爲放寬，比其他墳場長，但棺木唔留得過八年，否則會強行火化。棺地除咗按年而分，有啲亦按籍貫同宗敎[1]。而金塔地，係永久墓地[1]，用來擺金塔，面積得三英尺乘四英尺，只有重用墓地，再無新地，極爲之逼。和合石墳場，山勢平坦，墓段廣闊，喺同一墓段，墓位好多，唔似其他段段得一兩行。所以墓段中央，出入都有困難。而部份偏遠墓段，行石級都有啲危。墓地蚊患，亦好嚴重。
西安墓園，葬咗客輪西安號大火嘅死者。一九四七年大火，死咗約莫二百人[1]。
交通
[編輯]和合石墳場有車路上，方便送殯上山。之不過，清明時節，拜山人多，年年都封路。後人拜山，要行上山。