友情
![](http://upload.wikimedia.org/wikipedia/commons/thumb/5/5f/Disambig_gray.svg/25px-Disambig_gray.svg.png)
![](http://upload.wikimedia.org/wikipedia/commons/thumb/f/fb/Confusion_grey.svg/24px-Confusion_grey.svg.png)
![](http://upload.wikimedia.org/wikipedia/commons/thumb/5/5f/Disambig_gray.svg/25px-Disambig_gray.svg.png)
![]() 人倫同人際關係 |
---|
![](http://upload.wikimedia.org/wikipedia/commons/thumb/4/4a/Hands_4_Holding.jpg/200px-Hands_4_Holding.jpg)
友情(粵拼:jau5 cing4)係一種人類感情,亦係一種人倫關係,係社會範疇嘅事物,呢種情感關係建基於相互之間嘅信賴、共情、以及對對方嘅肯定同尊重,有呢種感情嘅人,會關心、幫助對方,會關注對方嘅感受。友情關係唔限人數,可以係兩個人之間嘅友情,亦可以係一大班人之間都有友情;友情維持嘅時間亦有長有短,可以係素昧平生嘅一面之緣,亦可以係成世老友乃至世交。有呢種感情關係嘅人互相稱之爲朋友,朋友之間通常無血緣關係,不過記掛、友愛、相處方面唔輸蝕過親人。不過唔係所有嘅朋友都會有友情,有時朋友關係出於利益交換,又或者單純係唔覺對方乞人憎,真正嘅友情係要有足夠嘅自我犧牲、爲對方着想、互相幫助、互相安慰、共同進步。
概念
[編輯]透過友情而結成嘅朋友,會將對方睇做有個人價値嘅人,會願意爲對方好。一般友情以相互之間嘅好感、信任、以及相同或接近嘅價值觀、諗法做基礎,有時各人嘅背景亦影響到友情發展。而特別親嘅友誼,啲人可以唔計較利益、收益而爲對方自我犧牲。
「友情」呢個詞,通常係講無近親關係嘅人。不過時至今日,呢個詞亦可以用喺家庭成員之間。雖然可以噉用,不過實際上除咗夫妻之間可能有友情式愛情之外,長輩同後輩之間更多重係一種基於血緣嘅親情,只不過有啲親情能夠以朋友嘅方式相處。除咗人類外,人同其他動物、同埋動物之間都可以群埋一齊、形成相互照應嘅友情。
「友情」「友誼」「友好」呢啲詞亦派生出其他用法,比如喺外交場合會用呢個詞,來表示民族之間、或者國家之間嘅良好政治關係。比如話「中日友好」係中國同日本關係良好時先講嘅;「德法友誼」係德國同法國唔再記過往恩怨時先講嘅。
日常語境
[編輯]喺日常講嘢,「朋友」呢個詞係好模糊嘅,無講清彼此之間關係嘅深度,實際上有好多詞分別描述唔同程度嘅友情關係。關係最淺嘅講法就係「我識得佢、點頭之交、見過嘅」,而關係最深係「做咗一世老友、知己、世交」。對於後一種咁深嘅關係,就算好耐無見、無互通音訊,就算彼此之間離得好遠都好,佢哋嘅關係都唔會變差變淡,無論幾時見都重係老友,呢種關係有個特點就係雙方都係無條件信賴對方。當友情增強到噉嘅程度,往往都會願意爲對方奉獻,而唔計較得失。
雖然話高尚嘅友情唔計犧牲,不過畢竟同愛情唔同。原則上認爲友情係喺人需要團結互助時至體現到,比如話士兵、救火隊、童軍、爬山隊、比賽隊、乃至活動社團、工會等等。呢啲都叫友情,不過同嗰種入心嘅自發友情唔同,喺噉嘅時候,友情出自於人需要彼此協作、喺信得過對方嘅情況下一齊組織行動。
所以友情同合作意識有好大嘅關聯。按照心理學家恰·戈堡嘅講法,友情分爲三個層次。按佢嘅講法,合作意識係友情嘅前提。
- 第一層次,可以稱之爲「有功利目的嘅同夥」。喺呢個階段,無論出於咩目的,只要雙方有共同嘅利益,佢哋就會行埋一齊,合作去達到共同嘅目標,呢種關係好易散,一有利益衝突就散夥。
- 第二層次,可以嗌做「趣味相投嘅同伴」。呢種關係出於彼此都有某種特定嘅 、唔涉及利害嘅目的,比如得閒時湊幾個人來打場波、釣下魚、或者因爲啲共同喜好樂趣而喺埋一齊。
- 第三層次,就係比較純粹嘅友情。呢種關係唔依賴於某啲特定嘅目標、目的、相互利用,利害計較少,維持關係嘅目的就在於關係本身,在於因爲遇到個啱嘅人,彼此之間好熟又好值得信賴。
「友情」呢個詞經常用喺其他嘅關係度,所以有引申意思。比如話同事之間亦會話係朋友,噉呢個時候,可能真係有朋友關係,但亦都可能只係單純嘅同僚關係,所以呢個詞會變得好曖昧,具體係點,噉就要睇雙方之間係真係彼此有好感,定浄係上班時先見。類似嘅重有網友,可能就淨係網上見,亦可能有現實中嘅關係。
而對同性戀,友情亦同其他群體一樣,相對來講,會同異性相處得好老友。比較典型嘅係一啲男同志同女性朋友嘅關係。大抵上男同志可以同女性友人傾好多女人比較關注、乃至比較私密嘅話題,同時雙方之間嘅交流好密切、好流暢,而一般來講,好少有男人可以同女人傾到咁埋,除非嗰個係自己嘅配偶。而對男同志來講,佢同女性嘅友誼無咩性方面嘅吸引,正因爲噉,佢好多時可以做到女性嘅閨密。
社會學上嘅概念規定同說明
[編輯]喺社會學上,斐迪南·滕尼斯將友情歸爲「精神共同體」呢個範疇。雖然係共同體,友情之中嘅亦有啲社會學研究喺裏頭。一般來講,好親嘅朋友,佢哋之間嘅衝突詏撟多過相識嘅熟人。心理學家、社會學家畀嘅解釋係,相比識得嘅熟人,親朋戚友會多份互相信任,於是乎相比會留番個面嘅熟人,對親友講嘢會直腸直肚啲,無心之間就將真正諗法講咗出口,加之因爲親,相處接觸嘅機會多啲,於是摩擦、衝突嘅機會亦都多啲。
基鄂·贍繆喺佢嘅《友情社會學》度提出友情係有各種唔同嘅方式、程度分化而成。佢反對亞里士多德,因爲佢見到友情有唔同嘅層次、階段。佢認爲,兩個人之間嘅友情開始於佢哋嘅相識,換句話講,相對於自身嘅對方於自己係個未知存在,噉喺呢個基礎之上,兩個人開始彼此滲透、關涉對方嘅生活領域。呢種他人對自己生活嘅涉入深度、廣度在於自己嘅意願以及開放程度,所以友情係有限界嘅,即係話自己有啲生活內容唔係對方可以隨便干涉嘅。舉個可能唔係好啱雅嘅例,波友一齊喺睇波呢個生活內容上有偈傾,不過除非係交往得深,一般都唔會同人講起自己近排離咗婚嘅事,而同佢一齊嘅人就算發覺佢唔開心亦都唔會去特別關心佢出咩事,呢啲私事就係佢哋友誼嘅界限。
贍繆話,呢種限界唔係絕對嘅,佢可以隨住關係進展而超越。呢種關係進展帶來正反面嘅結果。反面來講,爲咗深化呢份關係,要開放個人更多嘅生活領域畀對方,允許對方更大程度噉干預自己,同時亦比之前更多噉關注對方嘅感受、諗法,於雙方來講,佢哋都要爲呢份關係付出得多過之前,噉本身就係種犧牲;正面來講,由於雙方嘅坦誠開放,亦就收穫咗份更加真誠可靠嘅友情。不過,友情嘅深化唔一定就在於雙方界限嘅退縮,唔係話深厚嘅友情就一定會開放好多私人事務畀對方知、參與,友情亦可以通過生活領域涉入廣度來深化,換言之,就係有幾項共同興趣嘅朋友,佢哋嘅關係會深過只有一項共同興趣嘅朋友。
贍繆重認爲,婚姻係一種特殊友誼。噉係因爲既然友誼係逐步開放個人領域畀對方、彼此融合成精神共同體,噉婚姻亦就有友情嘅特徵。喺舊時,直到蒙田嘅時代,婚姻重係利益交換嘅一種,到近代之後,愛情先成爲婚姻區別於其他關係嘅特徵。不過雖然結婚係一種愛情關係,佢入面重係有友情嘅特點。贍繆警告話,唔好以爲一結咗婚就應該自動自覺交曬個底畀配偶,實際上噉會衝擊婚姻關係。佢認爲,結婚時未必就認清自己嘅配偶,結婚嘅價値在於日久知人心,就好似朋友嘅相知相惜噉,一開始都笑騎騎,但坦誠可靠嘅關係要靠長時間嘅關係探索、磨合。之所以會認唔清自己嘅配偶,係因爲個人領域嘅開放與否全在於佢自己嘅意願,可能有時講嘢、做嘢嘅細節會無意透露,但畢竟坦誠可靠嘅關係唔係靠「讀心術」來維持,更何況,呢啲估估下其實唔可靠,於是婚姻關係入面係有「盲點」嘅。既然有啲嘢係睇唔清,噉亦就無理由一上來就交曬底畀人,要交幾多嘢畀人,都係睇關係進展、對眼前人嘅評價判斷,同時對方亦睇唔清自己,可能未做好準備去接受自己完全真實嘅面目,如果一結婚就完全顯示本性,噉可能會導致婚姻嘅幻滅。
溝通、互助、群體意識
[編輯]據日本廣島大學研究生院嘅實驗報告[1],佢研究出唔同人群度,溝通良好與否以及有無敵對人群,會對啲人嘅群體意識有影響,得出:①同朋友仔嘅溝通聯繫、良好關係有利於形成、促進群體意識,②不過呢個唔係唯一途徑,一個組織高效嘅優秀團隊亦有團結作用,③尤其係溝通聯繫唔順暢時,團隊嘅組織效率會直接影響團員嘅群體意識。
友情關係嘅類型
[編輯]註
[編輯]- ↑ 《「仲間意識」に関する研究結果の報告》,中島健一郎(広島大学大学院博士後期1年)
睇埋
[編輯]出面網頁
[編輯]![](http://upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)
- "Friendship" (英文). 史丹福哲學百科全書.