化合物
![](http://upload.wikimedia.org/wikipedia/commons/thumb/c/c6/3D_model_hydrogen_bonds_in_water.svg/220px-3D_model_hydrogen_bonds_in_water.svg.png)
化合物(粵拼:faa3 hap6 mat6)係由兩種或以上嘅元素經化學反應結合而成。佢亦可以同元素組成混合物。化合物同佢哋本身元素嘅性質唔一定相同,結合過程亦都會釋放能量,好似氫氣易燃,氧氣助燃,但氫同氧組成嘅水就無爾啲特性。
直至而家,除咗特別唔活潑嘅氖[1]之外,其他所有穩定元素都已經製成咗化合物。
同混合物嘅分別
[編輯]化合物同混合物毋同,兩樣嘢溝出來嘅混合物一般都有返兩樣嘢本身各有嘅特性;好似鹽溶喺水度溝成混合物,混合物依然有鹽嘅鹹味同水本身嘅特性;化合出來嘅化合物就未必有返原本兩樣嘢嘅特性,好似氯係有毒嘅黃綠色氣體、鈉係有金屬光澤嘅固體,二者好易反應,但組成嘅氯化鈉(鹽)係無色或者白色晶體,變咗穩定嘅化合物。爾樣係化合物同混合物嘅主要差異。
另一樣區分化合物同混合物嘅方式係混合物嘅成份可以用簡單嘅物理方式分離,例如過濾、蒸發、磁力或者其他方式分離,好似鹽溶入水之後只要蒸發走啲水就可以提取返鹽。但係化合物嘅組合成份只可以用化學反應先至可以分離。相對咁,混合物用物理方式就可以生成,但整化合物要將組成元素反應,或者將其他化合物反應先整得出。
除咗金屬互化物之外嘅合金都係混合物。合金係將組成嘅金屬加熱到液態,溝埋之後再冷卻整成,屬於用物理方法混合。
無機同有機化合物
[編輯]化合物有分無機同有機兩類:
- 無碳嘅化合物都係無機化合物,但有啲有碳化合物都係無機,例如氰酸鹽、碳酸、碳酸鹽、碳酸氫鹽、氫氰酸同埋一啲碳氧化物[2]。
- 有機化合物係多數有碳嘅化合物,多數有埋氫,有時有埋氧、氮等嘅元素;但兩者間嘅界線幾模糊。
原子結構
[編輯]連接化合物各原子嘅化學鍵亦可以分幾類。
共價化合物
[編輯]共價化合物就係用共價鍵結合嘅化合物[3]。兩粒原子共用電子,就係共價鍵。好似氨、水、氯化氫都算,仲有甲烷等等有機化合物都係。
離子化合物
[編輯]原子唔見咗或者得到電子,就會變成離子。陰離子同陽離子正負電荷相吸而結合埋一齊就會出離子化合物;好似日常用到嘅食鹽(氯化鈉)都算離子化合物,仲有其他化學鹽(硝酸鹽、硫酸鹽、氯化物等)都算。
化學式
[編輯]化學式可以用來表示化合物嘅成分,用物理方式構成嘅混合物就無。佢哋可以分做分子式、化學式、電子式、結構式、實驗式、鍵線式等等。若果化合物係以分子形式存在,一般會用分子式做化學式,若果係礦物、金屬氧化物或者鹽類,一般會用實驗式。化學式入面元素嘅順序一般會按照希爾體系排列。一般碳原子會放喺化學式嘅最前面,後面係氫原子,其他元素就依照字母順序排列。若果化合物入面冇碳,咁所有元素都會依照字母順序排列。
氧化態
[編輯]氧化態係化合物入面量度氧化程度嘅標準,化合物嘅元素氧化態都可以咁計:
- 大多數化合物入面,氫嘅氧化態係1,氧嘅氧化態係負2
- 但氧喺過氧化物嘅氧化態係-1
睇埋
[編輯]攷
[編輯]- ↑ 〈稀有气体(图)*〉. web.archive.org. 2015-09-23. 歸檔時間2015-09-23. 喺2021-09-15搵到.
{{cite web}}
: CS1 maint: bot: original URL status unknown (link) - ↑ "organic compound | Definition". Encyclopedia Britannica (英文). 喺2021-09-15搵到.
- ↑ "Biology: Exploring Life". web.archive.org. 2014-11-02. 歸檔時間2014-11-02. 喺2021-09-15搵到.
{{cite web}}
: CS1 maint: bot: original URL status unknown (link)