劏房
劏房（分間樓宇單位，又叫房中房）係香港出租房嘅一種，多數喺唐樓或舊樓出現。即係業主或者二房東將一個普通住宅單位再分間成幾個細嘅獨立房[1]，每個大概只有幾十平方呎，再以每間房每個月幾百至兩三千蚊租金租畀人住，吸引草根階層或者新來港人士租住，租客多數都係未等到公屋嘅家庭。
實施劏房租務管制嘅《業主與租客（綜合）條例》第IVA部已經喺2022年1月22日開始生效。差餉物業估價署負責條例嘅執行工作。政府經已委託非政府機構設立6支區域服務隊[2][3][4][5][6][7]，協助差餉物業估價署（差估署）喺地區層面推廣新法例，提高公眾對新規管制度嘅認識同處理一般查詢等。政府亦都委託一間非政府機構，設立同管理「劏房」租務管制資訊平台[8] (網址: www.sdu-info.org.hk)，以分享劏房租務管制嘅資訊做宣傳同教育用途。
名
[編輯]「劏」意思係劏開，好似「劏豬」、「劏雞」噉，劏完之後再將佢哋斬件，「劏房」即係將住宅單位分割成幾個更細部分嘅行為。
劏房未必係套房，因為套房係指一個可以住嘅房間或空間，通常都有獨立嘅廁所同浴室，劏房所有租戶要共用廁所同浴室。套房式劏房可以有獨立浴室，未必有獨立廚房[9]。
安全問題
[編輯]由於劏房多數都係未有向建築署申請改建，有啲甚至拆咗主力牆，或將地台升高，用來鋪設排水系統，令到樓宇嘅結構出現問題。由於單位內有多個房間，同屋住戶人數多過原本圖則預設，日常人流較多，通道會比較狹窄，容易出現消防等安全問題[10]。
影響
[編輯]由於過往政府曾經長期壓低房屋供應，造成房屋短缺而推高樓價同租金，唔少市民因為負擔唔起高昂嘅租金，被迫入住居住環境比較差嘅劏房，認為係造成佢哋對政府失去信心嘅原因[11]。
相關事件
[編輯]睇埋
[編輯]參考
[編輯]- ↑ 〈分間單位(劏房)〉。原著喺2017年10月1號歸檔。喺2017年10月19號搵到。
- ↑ 〈新家園協會香港島服務處〉。劏房租務管制資訊平台。喺2022-09-08搵到。
- ↑ 〈油尖旺民生關注會〉。劏房租務管制資訊平台。喺2022-09-08搵到。
- ↑ 〈香港單親協會〉。劏房租務管制資訊平台。喺2022-09-08搵到。
- ↑ 〈新家園協會九龍西服務處〉。劏房租務管制資訊平台。喺2022-09-08搵到。
- ↑ 〈新界社團聯會社會服務基金〉。劏房租務管制資訊平台。喺2022-09-08搵到。
- ↑ 〈沙田居民協會〉。劏房租務管制資訊平台。喺2022-09-08搵到。
- ↑ 〈關於網上資訊平台〉。劏房租務管制資訊平台。喺2022-09-08搵到。
- ↑ 就私人處所內違例改建工程而進行的執法行動
- ↑ 社會問題: 劏房
- ↑ 〈房屋 私樓價高公屋不足〉。東方日報。2014-07-07。