ნოღა
![](http://upload.wikimedia.org/wikipedia/commons/thumb/1/1f/Street_in_Valetta%2C_Malta.jpeg/200px-Street_in_Valetta%2C_Malta.jpeg)
![](http://upload.wikimedia.org/wikipedia/commons/thumb/b/b6/Edinburgh06.jpg/200px-Edinburgh06.jpg)
![](http://upload.wikimedia.org/wikipedia/commons/thumb/f/fb/Turkish.town.cesme.jpg/200px-Turkish.town.cesme.jpg)
![](http://upload.wikimedia.org/wikipedia/commons/thumb/1/10/Luftbild_Davos2.jpg/200px-Luftbild_Davos2.jpg)
ნოღა — შხუ დოხორინელი პუნქტი, ნამუთ მეთხოზჷ ოხერეჭე, ოტრანსპორტე, ომეურნე, კულტურული, პოლიტიკური, ადმინისტრაციული ორგანიზაციაშ ფუნქციეფს. ნოღაშ კატეგორია აბანობური მუშობურობეფით იხურგუ გეჸვენჯი შანეფიშ მეჯინათ: მახორობაშ მუდანობა დო საქვარუა, დოხორინელი პუნქტიშ ეკონომიკური დო კულტურული შანულობა. ნოღას ახასიათენს დოხორინიშ კაბეტი მეჭედალა დო დოხორაფაშ კომპაქტურალა.
ნოღაშ გოჭყაფა
[რედაქტირაფა | წყუშ რედაქტირაფა]ნოღაქ გორჩქინდჷ ისტორიული გოვითარაფაშ თი ოკუჩხურს, მუჟამცჷთ ჯარალუას მითმიშჷ ხანდაშ ჯარალუობური დორთუალაშ დო სოციალური დიფერენციაციაშ პროცესეფი დო თეშ გეშა ოფუტური-ომეურნული სამუშეფწკჷმა მერსხილი მახორობაშ ჯინჯიერი მასაშე გიშმერთუ შხვა სოციალური ბუნეფი (მადუდე კლასი, მოხელეეფი, ვაჭარეფი დო შხვა), ნამუეფიშ კონცენტრაციას მუსხირენი დოხორინელი პუნქტეფშა მეპუნთ ნოღური ტიპიშ დოხორინიშ დორსხუაფაშახ.
მაართა ნოღეფქ, მუჭოთ ადმინისტრაციული დო რელიგიური, ვაჭარუაშ დო ხელუაშ ცენტრეფი, ჯვ. წ. IV—III ანთასწანურას გორჩქინდჷ. ნოღეფიშ დორსხუაფაქ დიდი გაულა მახვამილუ ჯარალუაშ გოვითარაფას. თინეფქ გჷნირთეს სახენწჷფო ხეშუულაფაშ დო კულტურაშ გოვითარაფაშ ორგანიზაციული, კერზოთ ოკიდანჯური საქვარუაშ დო არქიტექტურაშ გოვითარაფაშ ცენტრო, ხე აკუნწყუეს ხელუაშ დო ვაჭარუაშ (თინეფს შქას ოერეფოშქაშე ვაჭარუაშ) გოვითარაფას. თაქ გიჭყჷ ოვაჭარე დო ოვახშე კაპიტალქ. ნოღაშ ხელუაწკჷმა რდჷ მებუნაფილი ტექნიკაშ პროგრესი.
ნოღაშ ფუნქციეფი
[რედაქტირაფა | წყუშ რედაქტირაფა]ნოღეფიშ დორსხუაფა დო გოვითარაფა ტომბა რსხუს რე ხანდაშ გეოგრაფიული დორთუალაწკჷმა. ნოღეფიშ უმენტაშობას გოვითარაფაშ ჯინჯიერი ფაქტორიე ოჯარალუ წარმებაშ ფუნქცია, მორო რსებენს ნოღაგუმაჭყაფუ შხვა ფაქტორეფით, სამანგათ:
- ადმინისტრაციული (რჩქვანელობურო, შხვა ფაქტორეფწკჷმა ართო)
- ოურდუმე-სტრატეგიული (ჯიხა-ნოღა)
- მასვანჯებელი და ომკურნალებერი (ოკურორტე ნოღეფი)
- ომენცარე-ოუნივერსიტეტე
- რელიგიური
ამდრარხანურ პიჯალეფს ბრელი ნოღაქ აკიძინჷ შვა მეშანილობა ხოლო: ტურისტულ-ომუზეუმე, ოფესტივალე, სპორტული დო შხვა. კაკალ-კაკალო არძა ნოღაშ ფუნქციური ტიპი დიდო გჷთმიხურგუ მუში გეოგრაფიული დვალათ დო თი რსხუეფით, ნამუეფით რსებენს ნოღაშ დო თიშა მეზინდილ ტერიტორიაშ შქას.
ნოღაშ სიდიდა
[რედაქტირაფა | წყუშ რედაქტირაფა]მახორობაშ მუდანობაშ მეჯინათ გიშმაგორჷნა: ჭიჭე, ოშქაშე, კაბეტი, შხუ დო უშხუაში (ვარა "მილიონამი") ნოღეფს. ედომუშამო მოსოფელს რე 1700 შხუ ნოღა, სოდეთ მახორობა 100 ვითოშიშ უმოს რენ დო 220 ონოღე აგლომერაცია 1 მილიონიშ უმოსი მახორუთ.
ნოღაშ სახე
[რედაქტირაფა | წყუშ რედაქტირაფა]ნოღაშ ზოხოიანი ზონეფი - ცენტრი, ოხორინალი, ორეწუალე დო შხვა რაიონეფი ირსხუაფუ ისტორიულო ვარა გეგმაშ მეჯინათ. ცენტრი მეჸუნც ოჯარალუ, იდეოლოგიური დო წჷმმარინაფალური ფუნქციას. თექ გონწყილი რე ოჯარალუ ნოდგჷმეფი, ადმინისტრაციული დო კულტურული დოწესაფილეფი, ოვაჭარე რანწკეფი დო შხვა. ათეშენ ცენტრის ბრელი რე არქიტექტურაშ ანსამბლეფი, ნამუეფით ჯინჯიერო გუთმოხურგუნა ედომუშამ ნოღაშ კომპოზიციური ეგაფილობას.
ნოღაშ ინდივიდუალურობას შილებე აკმოქიმინუნდას თაშნეშე მუშ ოწარმეეფი ტექნიკური-ოინჟინერე ნოდგჷმეფით, ნჭაფიერი მაგისტრალეფი, ავტოსადგჷმეფი, სპორტული კომპლექსეფი. ნოღაშ ანგარიაშ აკოქიმინუას შანულამი აბანი უკჷნებჷ მუშ აბანდვალას, რელიეფის, პარკეფს, სკვერეფს, ბულვარეფს, ოხვამეეფს, ჸორშეფს, ანძეფს დო შხვა ობიექტეფს.
ნოღაშ დუდალა
[რედაქტირაფა | წყუშ რედაქტირაფა]ნოღეფს აბანობური მუშითდუდალაშ დო სახენწჷფო დუდალაშ შხვადოშხვა ფორმეფიე გოფაჩილი. ონოღური დუდალაშ ტიპიური ორგანოეფიე: გიშნაგორა მუნიციპალური სხუნუ (მუნიციპალიტეტი), ნოღაშ ასამბლეა, ნოღაშ ოკათუეში, ონოღური სხუნუ. თე ორგანოეფიშით ვარა ნოღაშ მახორობაშით გჷშაგორილი ონოღური ადმინისტრაციაშ მადუდური, მერი, ბურგომისტრი, ნოღაშ დუდი დო თიშა მებუნაფილი ომოინალეეფი. დიდი ნოღეფს გჷშაგორუობური ორგანოეფი ეშმეგორჷნა მუნეფიშ ემაჸონაფალი დო ზოჯუაშ გინმაჩამალი ორგანოეფს: ნოღაშ თარობას, ემაჸონაფალ კომიტეტის დო შხვა. ნანანოღეფს შხირას დუდალაშ გიშაკერძაფილ ფორმეფიე დოდგინელი.
ქოძირით თაშნეშე
[რედაქტირაფა | წყუშ რედაქტირაფა]- ნოღეფი საქორთუოს
- საქორთუოშ ნოღეფი
- მოსოფელიშ უდიდაში ნოღეფი
- მოსოფელიშ უდიდაში აგლომერაციეფი
- ნოღეფიშ ეპითეტეფი
- ნანანოღეფი
- დიდი ნოღა
- მოსოფელიშ ქიანეფიშ ნანანოღეფი
- დაბა
- ოფუტე
რესურსეფი ინტერნეტის
[რედაქტირაფა | წყუშ რედაქტირაფა]- Open-Site Regional Archived 2021-01-29 ვებ-ხასჷლას Wayback Machine. — იკათუანც შხვადოშხვა ქიანეფიშ ნოღეფშენ ინფორმაციას.