Emission e walon
Ene emission e walon, c' est ene emission al radio u al tévé la k' on cåze e walon. On î radjoute eto les emissions k' on î cåze do walon, mins e francès.
![](http://upload.wikimedia.org/wikipedia/wa/thumb/7/75/Radio-Quartz.jpg/400px-Radio-Quartz.jpg)
![](http://upload.wikimedia.org/wikipedia/commons/thumb/7/7c/Jean_Goffart_radio_quartz.jpg/220px-Jean_Goffart_radio_quartz.jpg)
![](http://upload.wikimedia.org/wikipedia/commons/thumb/4/41/Mahin_Sarachaga_emission_900000_Walons.jpg/220px-Mahin_Sarachaga_emission_900000_Walons.jpg)
Sacwants emissions e walon dins l' posse
[candjî | candjî l’ côde wiki]Les emissions e walon sol RTBF ont-st ataké diviè les anêyes 1960 al radio. A Nameur, ça a stî 900.000 Walons, ki l' prumî mwaisse adjinçneu fourit Gilbert Renson. Paul Gilles î a bouté lontins, come tecnicyin, pu come prezinteu. Avou Charles Massaux et Jean Bauduin.
A Lidje, li "Shijhe walone" est l' pindant di "900.000 Walons". Les deus emissions continouwnut disk' å djoû d' ouy (avou Jany Paquay a Nameur eyet Jacques Warnier a Lidje).
Mins do côp après, gn a yeu des emissions e walon so les libès radios. Inte di zels, "Jumet 600" a Djumet eyet totes sôres d' emissions prezintêyes di Jean Goffart. Si dierinne, "El tchant d' nosse cok" so Radio-Quartz a Sombrefe, a stî ene des prumire a-z esse evoyeye so les fis.
Après Lidje, gn a yeu lontins les "Mots walons" da Guy Fontaine. Asteure, gn a eto les biyets d' oumeur walons da Paul-Henri Thomsin (Liège-matin).
Do costé d' Nameur, gn a des emissions da Bernard Louis et sol Walonreye di France da Charles Massaux.
E 2020, li libe radio crustinne di Nameur, RCF, a fwait des emissions e walon avou Bernard Van Vynckt. Les mots del prumire anêye ont stî eplaidîs dins on live «Rastrind, saiss».
Sacwants emissions e walon al tévé
[candjî | candjî l’ côde wiki]Al tévé, gn a yeu ene clapante emission so Lidje, "Radjoû", la ki totafwait esteut e walon, les kesses, et sovint les responses des priyîs. Li prezinteu-dmandeu, c' esteut Claude Balthazar. Elle a stî shuvowe di "Wallons-nous", produte å cmince pa Guy Fontaine, pu pa Ludovic Bastin. Mins, pitchote a midjote, les kesses (et, dabôrd, les responses) ont stî dmandêyes e francès. Wice alans dj' ?
Les tévés coinreces emantchèt eto des emissions e walon. Gn a yeu so "Canalzoom" Kè diss ? adjinçnêye pa Yves Paquet. Sol Hinnot, gn a Berdelaedjes, la k' on-z a prezinté li prumî tévéfime e walon (da Albert Volral).
E 2019, gn ava Foû des rays so Tévélux (Libråmont). Adonpwis, e 2022, Choûtoz one miète so Matélé (Rotchfoirt). Dins les deus cas, les emissions sont riveyåves sol Daegntoele.
Emissions e walon sol Daegntoele
[candjî | candjî l’ côde wiki]Li prumire k' a stî redjiblêye sol Daegntoele fourit l' emission "Li tchant d' nosse cok" da Jean Goffart (so Radio-quartz, di Sombrefe, dispu 2005).
E 2007 ey après, gn aveut eto deus emissions da Bernard Louis (« Eshonne » Emission walone et francesse avou èn årmonak walon, del literateure, des spots et des ratourneures eyet « Vive Nameur po tot » avou des tchansons e walon) ki passént so Cyclone-RCF di Sint-Mår et ki rpassént après sol Toele.
E 2020, l' les biyets walons da Bernard Van Vynckt (radio RCF-Wallonie) ont yeu on nouzome succès, aprume tins des recloymints di cåze del minêye di corona.
Dispu 2019, sacwants emissions tévé e walon sont eto wårdêyes so les fis.
Hårdêyes difoûtrinnes
[candjî | candjî l’ côde wiki]- Pådje so les emissions e walon (so l' Aberteke, dedja ene viye modêye, nén rapontieye)
- Waibe di Radioquartz, la k' gn a ene emission e walon li dimegne di 8 eures a 10 eures bedje (7 eures a 9 eures å matén ECG di l' ivier, eyet 6 eures a 8 eures å matén GMT di l' esté)
- Waibe Musicadeon, la k' gn a ene emission e walon les londi & mårdi a 6 e. et dmeye al nute, eure di Walonreye (4 eures et dmey di l' après-nonne ECG di l'ivier, eyet 5 e. 30 di l' esté)