Ижкар трамвай

Трамвайлэн сюресъёсыз кар карта вылын

Ижкар трамвай — Ижкарысь рельс мерлыко транспорт. Кивалтӥсь компания — «Ижгорэлектротранс» (ИжГЭТ) муниципал унитарной предприятие.

Ижкартӥ трамвай ветлыны кутскиз 1935 арын 18-тӥ шуркынмонэ. Та дырлы карын 11 маршрутъёсъя мынон-ветлон радъямын. Огпала мынон сылэ 29 манет (электрон картаен — 28 манет).

Историез

Кутскон

Нырысетӥ трамвайной вить километръем маршрут усьтӥськиз ӵукна 18-тӥ ноябре 1935-тӥ арын. Солэн сюресэз кыллиз Карл Маркс урамын Вятской переулокысен Воткае нуись чугун сюресозь. Ар улыса маршрут кузь каремын вал кыкнаысенызы пумъёсысен — Киров нимо паркозь но Кузон вуж вокзалозь («Хозяйственной база» туала дугдылонни ёрос). 1941-тӥ арын трамвайёс Ленин но Орджоникидзе урамъёстӥ ветлыны кутскизы — тазьы кыкетӥ маршрут кылдӥз. Вагонъёслэсь лыдзэс будэтӥзы витьысен дас укмысозь.

Ветлонэз усьтон дырысен 1943-тӥ ар пум дырозь вагонъёс тупатскылӥзы кулэ производственной базатэк пу боксын либо липеттэм канаваос вылын. Нош трамвай ветлонэз азьланьтэмен нырысетӥ депо усьтӥськиз. 1949-тӥ арын 2-тӥ номеро маршрутэз Киров урамтӥ кузь каризы. 1957 но 1958 аръёсын трамвайлэн сюресъёсыз лэсьтэмын вал Металлургъёслэн городоказы но Гагарин урам кузя — одӥгетӥ маршрут туалаез кадь луиз. Соин ӵош выль вагонъёсты уже кутыны кутскизы: КТМ/КТП-1 — 1955-тӥ арысен но КТМ/КТП-2 — сизьым ар ортчем бере.

Мыло-кыдо азинскон

1960-тӥ аръёсын трамвай сеть мылысь-кыдысь азинске: 1961-тӥ арын куинетӥ маршрутлэн трамвайёсаз мынон понна коньдонэз кондукторъёстэк октыны кутскизы; 1958-тӥ арысен трамвайёслэн сюресъёссы кык полэс луэ, 1964-тӥ арын выль сюресъёс Халтурин урам кузя лэсьтӥсько, Ленин урамын кыллись линия кузьгес луэ. Братской но Автономной урамъёстӥ сюресъёсты лэсьтыны кутско; 1966-тӥ арын Киров урамысь линия Буммашозь кузёме, апреле 1965-тӥ арын кыкетӥ депо ужаны кутске.

Озьы 1963-тӥ арысен 1970-тӥ арозь предприятие кык пол кадь бадӟымаз: сюресъёслэн кузьдалазы бадӟым луиз 36-ысен 64-озь километр, ужасьёслэн лыдзы — вить сюысен сюрсозь, трамвайёслэн лыдзы — 104-ысен 152-озь но арскын нуэм-ваем пассажиръёслэн лыдзы куинь пол кадь бадӟымаз — 38,6 миллионысен 100 миллионозь.

Будэмлэн калленамез

Троллейбус мынон-ветлон лэземен (1968) трамвай сеть калленгес азинске. 1982-тӥ арын ӝог (скоростной) трамвай лэземын вал, но со дырысен сюресъёсызлэн кузьдалаез нокызьы но уг вошты. Берпум маршрут 1988-тӥ арын усьтэмын, со дырысен выль маршрутъёс ӧвӧл.

1985-тӥ арын Ижкар трамвайлы витьтон арес тырмиз, соку ик Ижлэн урамъёсаз куинь вагонэн трамвайёс потӥзы.

1987-тӥ арын нырысетӥ Татра T6B5SU вагонъёс Иже лыктӥзы. 1990-тӥ ар ӵоже нуэм-ваем пассажиръёслэн лыдзы 143,8 миллион адями вал. Озьы ик вагонъёслэн лыдзы дас ар ӵоже бадӟымаз 203-ысен 244-озь.

Сюресъёсыз

Маршрут лыд	Пумысь станциос	Сюреслэн кыстӥськемез
	Металлургъёслэн городоксы — Муско урам	45 мин
	Промышленной урам — Буммаш	41 мин
	Промышленной урам — Муско урам	37 мин
	Промышленной урам — Металлургъёслэн городоксы	36 мин
	Буммаш — Огнеупорной урам	58 мин
	Буммаш — Металлургъёслэн городоксы	34 мин
	Промышленной урам — Буммаш	26 мин
	Буммаш — Муско урам	50 мин
	Ворошилов урам — Металлургъёслэн городоксы	47 мин
	Ворошилов урам — Промышленной урам	21 мин
	Ворошилов урам — Муско урам	49 мин

Галерея

• 
  Трамвайёс «Ворошилов урам» станциын
• 
  9-тӥ номеро трамвай «Уйпал рынок» станциын
• 
  Трамвай сюрес Ленин урамын

Чӧлсконъёс

• Ижкар трамвайлэн онлайн расписаниез