Kitab Al asmaa
Iga Udlis n ismawn (s tɛrabt: كتاب الاسماء; aslatin: kitāb al-asmā’) yan msmun awal Aɛrab-Aclḥi n Ibn Tunart. Nttan ad igan aqbur akkʷ gr id msmun awal n tutlayin timaziɣin, Ittyura ɣ tasut tis 12 ɣ usggʷas n 1145 (540 hijri)[1][2].
Amara nns
[ssnfl | Snfl asagm]
|
Muḥammad Abu Ɛabdillah Bin Ɛli Bn Jaɛfar Bin Aḥmad Bin Muḥammad Lqaysi, ittuysan s yism n Ibn Tunart nɣ Ibn Tunirt. Ilul ɣ 1085 (478 hijrya) ɣ Iɣrm n Bni Ḥammad (agafa n tmazirt n Ddzayr tatrart). Ismd tiɣri nns ɣ Buji d Ddzayr tamdint, ilmma ɣ Kurdu ɣ Wandalus. Ikka tt inn iga amsnils, amstan (Lmuḥami), anbḍu (lqaḍi) d uslmad ɣ Fas lli ɣ immut ɣ 1172.[2]
Tumayt
[ssnfl | Snfl asagm]Nssn zɣ isfka nna darnɣ illan ɣila is d tẓat tunɣilin n msmun awal a ad illan, snat sgitsnt ɛlayn nit aksulnt (gant yan), mmzrint tunɣilin ann yaḍnin ɣ kra n tɣawsiwin. Llant tunɣilin ɣ Tgmmumt n Arsin Ru (Arsène Roux) ɣ Iks-un-Brufuns (Aix-en-Provence) ɣ Fṛansa, ilint ɣ tsdlist n Tsdawit n Laydn ɣ Ikalln Zdrnin. Tunɣilin d agurnin llant ɣ tgmmumin tusligin. Talli akkʷ zgisnt istawhmman, llan gis uggar n 2.500 n ikccumn iɛrabn d usuɣl nnsn s Tclḥit. Ttusnmalan Ikccumn n umawal f imrsi nnsn (Tazzit n ufgan, imudar n tgmmi, imɣan, atg).[2]
Gr Tutlayin Timaziɣin titrarin, talli akkʷ irwasn tamaziɣt taqburt nna s yura Ibn Tunart adlis nns tga tt Tclḥiyt. Mayad ar bahra ittbayan ɣ iwaliwn d tguriwin n umawal ad acku llan gisn kra n tguriwin nna ur nettafa amr ɣ tutlayt Taclḥit, zun d: Aɣʷgmmi, Afulki, Igiwr, Tigmmi, Iḍgam, iḍaggʷn, Dari, Tarragt, Iɣarasn, agusmu, kasra, atg.[2]
Macc llant daɣ gis kra n tguriwin nna illan ɣ Tutlayin Timaziɣin yaḍnin, macc ur llint ɣ Tclḥiyt, zun d: Druɣ (Ɛlayn), ilel (lbḥṛ), uṭṭun (rraqm nɣ lɛadad), Afalkun (lbaz), atg.[2]