Kazimierz Kuratowski

Kazimierz Kuratowski

Kazimierz Kuratowski (Varsavia, 2 di frivaru 1896 - 18 di giugnu 1980) havi statu unu di li maiuri matimàtici pulacchi.

La vita

Kuratowski havi statu di lu 1927 prufissuri di matimàtica a la Politechnika Lwowska (Pulitècnicu di Liòpuli, 'n Pulonia) e di lu 1934 a l'Univirsitati di Varsavia. Nta lu 1945 è addivinutu mèmmiru di la Polska Akademia Umiejętności (Accademia Pulacca di lu nzignamentu), e nta lu 1952 di l'Accademia Pulacca di li Scenzi. Di lu 1948 a lu 1967 havi statu diritturi di l'istitutu di matimàtica di diciuta accademia, e pi tanti anni havi statu macari prisidenti di la International Mathematics Society e di la rispittiva Sucitati Matimàtica Pulacca.

Kazimierz Kuratowski havi statu nu friquentaturi di la cèlibbri Kawiarnia Szkocka (Caffé scuzzisi), unni li matimàtici di la furmidàbbili scola pulacca di li primi dicenni di lu XX sèculu era sòliti ncuntràrisi pi cunfruntari li propi idei.

La ricerca

La ricerca di Kuratowski havi stata ncintrata principarmenti supra lu studiu di strutturi mètrichi e tupulòggichi astratti. Ntra li soi nummurusi cuntribbuti a la matimàtica vannu arricurdati:

• Lu studiu di li spazzi pulacchi (chi prènninu lu sò nomu propriu di li matimàtici pulacchi chi l'hannu studiati, comu Wacław Sierpiński, Alfred Tarski, e appuntu Kazimierz Kuratowski);
• La carattirizzazzioni di li spazzi di Hausdorff midianti li accussìdiciuti assiomi di chiusura di Kuratowski;
• La dimustrazzioni di lu Lemma di Kuratowski-Zorn;
• 'N tiurìa di li grafi, la cèlibbri carattirizzazzioni di li grafi pranari, midianti lu Tiurema di Kuratowski pi grafi;
• L'idintificazzioni di li coppi urdinati $(x,y)$ cu li nzemi $\{\{x\},\{x,y\}\}$.
• La ntruduzzioni di l'algoritmu di Tarski-Kuratowski arriguardanti la risuluzzioni di fòrmuli aritmètichi.

Vuci currilati

• Kawiarnia Szkocka
• Alfred Tarski
• Spazziu pulaccu

Bibbriografìa

• (en) Kazimierz Kuratowski, 1980, A Half Century of Polish Mathematics: Remebrances and Reflections, Pergamon Press, Oxford, ISBN 0-08-023046-6
• (en) Karol Borsuk, 1960, On the achievements of Prof Dr Kazimierz Kuratowski in the realm of topology, 'n Wiadomosci matematyczne, vol. 2, issue 3, pp. 231-237

Culligamenti sterni

• (en) Na brevi biografìa di Kazimierz Kuratowski