Capuns

Capuns è il num d’ina tratga tradiziunala dal Grischun. La basa furma ina pasta da bizochels enritgida cun ervas e tochets da charn setga. La pasta finida vegn enzugliada en feglia d’urtais. Quests pachets vegnan cotgs en latg e buglion e servids cun chaschiel sgrattà. I vegn pretais ch’i dettia en il Grischun tants recepts per far capuns sco siras.

Bleras variantas

Per preparar ils capuns dovri l’emprim ina simpla pasta da bizochels che consista or da farina, latg, ovs ed ina presa sal. A la pasta vegn alura agiuntà charn setga tagliada en quadrels. Tut tenor usanza po quai esser pulpa, andutgel u schambun criv. Era ervas na dastgan betg mancar, per ordinari èn quai tschagugliuns, peterschigl ed erva tschurra. Sco quai ch’igl è usità tar ils bizochels, vegn magari er agiuntà als capuns ivettas.

Mintgina e mintgin che fa capuns ha in pau si’atgna metoda da pachetar la pasta en ils urtais. Ils ins ferman la cua dals urtais uschia ch’i na crodan betg in ord l’auter, auters dovran tgiradents per far quai. In’ulteriura varianta è da betg enzugliar la pasta en ils urtais, mabain da far simpels bizochels, metter tiers ils urtais tagliads e laschar coier tut en aua da sal.

Era da coier ils capuns enzugliads datti differentas metodas. Ils ins brassan l’emprim ils capuns e coin els pir suenter; ils auters coin ils capuns directamain en latg e buglion (mez latg e mez buglion), savens cun agiuntar in moni d’erva tschurra. Era l’avnaun a vapur fa in bun servetsch, lura na crodan ils capuns numnadamain betg in ord l’auter.

Servids vegnan ils capuns sa chapescha tar mintgin in pau auter. Ins po prender els or dal bugl, metter surengiu chaschiel sgrattà e gratinar tut curtamain en il furnel. Auters servan ils capuns cun chaschiel e mettan paintg culà e quadrels da charnpiertg surengiu.

Litteratura

Jacky Donatz, Chasper Pult: La cuschina dal Grischun. Lenzburg 2007, ISBN 978-3-03780-299-1
Charly Bieler, Evelyn Lengler: Capuns. Chur 1999, ISBN 3-85637-248-2
Charly Bieler, Evelyn Lengler: Capuns Geschichten (mit 129 neuen Rezepten). Desertina Verlag, Chur 2006, ISBN 3-85637-306-3

Colliaziuns

Commons: Capuns – Collecziun da maletgs, videos e datotecas d'audio