Kiristuyuyay iñiy

Kiristuyuyay iñiy icha Kiristupi iñiy nisqaqa Hisukiristu qispichiq kaymanta iñiymi.

Kiristuyuyay iñiymantaqa Apuyayam willakun.

Tiqsinkuna

Kiristiyanuiñiykama Hisusqa Thiyuspa Churinmi. Huklla Thiyusmi kaspa, chay Thiyusqa kimsantin hinam:

Yaya Thiyusqa hanaq pachapi kamaqmi.
Hisu Kiristuqa Thiyuspa churinmi. Iñiqnin runakunata huchankumanta qispichinapaq, hanaq pachapi wiñay kawsanankupaq kikinpa kawsanta kuruspi qurqan.
Ch'uya Ispirituqa (Ispiritu Santu) iñiq runakunata pusanmi.

Thiyusqa Israel llaqtanwan Sinai urqupi Moysesman Chunkantin Kamachiykunatam qillqachispa Ñawpa Rimanakuytam kamachirqan. Hisustaq Urqupi Kamiykuypiqa musuq kamachiykunatam kamarqan. Qhipaq Sinapiqa rakinakuspa kuruspi kurkunta yawarnintapas quspa Musuq Rimanakuyta kamachirqan iñiqninkunata huchankunamanta qispichinapaq, wiñay kawsanankupaq. Wañuymanta sayarispa wañuytam atiparqan. Pisilla chaymanta hanaq pachaman rirqan. Chaymanta pacha Thiyuspa pañanpi tiyachkan. Hamunqa kay pachaman runakunata taripanapaq.

Apustulu Pawllu Kiristiyanuiñiytaqa mana huriyu kaq llaqtakunaman yachachirqan. Payqa hinapas wañuchisqa karqan.

Kristiyanukunaqa tiksi sut'iyachiyninkunataqa Iñini mañaypi rimaykunku.

Yayayku nisqa, Iwanhilista Matiyukama Hisuspa kamachisqan mañayqa ancha chaninchasqam.

Ima hinam kawsanku

Kristiyanukunaqa huk runakunatam katisismunisqa qillqawan Kiristiyanuiñiymantam yachachinku, Hisusqa hanaq pachaman rina kaspa lliw iñiqninkunata chay yachachiyta kamachirqaptinmi.

Kiristiyanutukuspa, runaqa bawtisakun huchankunamanta qhispichikunapaq. Hisu Kiristumanta yuyanapaq, huchanmanta qhispikunapaqpas Siñurpa Sinantam mikhun.

Lliwmanta aswan chaninchasqa Kiristiyanuphistakunaqa kaymi:

Nawithat: Hisuspa paqarisqan
Paskwa: Hisuspa sayarisqan
Pintikustis: Ch'uya Ispiritup runakunaman mast'arikusqan

Paskwapqa ñawpaqnin tawa chunka p'unchawkuna mallaspa sasinku Hisuspa muchusqanta yuyanapaq. Paskwap qanchistaq ñawpaqnin p'unchawkunaqa Simana Santa nikun. Chay pachaqa Hisuspa muchasqanta Yerusalempi chayasqanmanta sayarisqankama pacha yuyaykunku.

Wiñay kawsaynin

Hisuspa hanaq pachaman risqanmantapachaqa kristiyanukuna achka pisilla iñiykunaman rakikurqanku. Chayrayku kunan pacha achka Kiristiyanuinlisyakunam:

Katulika inlisya
Chiqan Iñiykay inlisya
Protestantismu: Martin Luther-pa, huk rifurmatur nisqa runakunap kamasqan

Apya Yalapi Kiristuyuyay iñiy

Ispañamanta Purtugalmantapas awqakunaqa Apya Yalapi chayamuspa, kaypi runakunata ñit'ipayta, qullqita qurita qichuytapas munaspa "katuliku, kristiyanukunam kayku" nispa llullarqan. Runakunap Tawantinsuyu iñiyta ama nichaspa, Kiristiyanuiñiyta runakunaman kamachirqan. Chay munay mana munaywan iñichiyqa manam Hisuspa siminkamachu karqan, Kiristiyanuiñiyqa runap qispillam kamarikuyninwan chiqaptaq iñinan kaptin.

Kunanqa Apya Yala mama llaqtakunapi lliw runakunamanta aswan katuliku kaptin, hukkunataq protestantu inlisyakunapi iñiqkunapas kanku. Chaywanpas, achka runakunam kunanraq Pachamamata huk apukunatapas yupaychan.

Hawa T'inkikuna