بازنتیئم
بازنتیئم اک پرانا یونانی شہر سی ، جس دی بنیاد یونان دے مگارا علاقے دے سامراجیاں نے 667 قبل مسیح چ رکھی تے اپنے بادشاہ بیزاس یاں بازنتاس دے ناں تے اسدا ناں رکھیا ۔ بازنتیئم ، اصلی ناں بیزنتیون دی لاطینی شکل اے ۔ ایہہ شہر بعد چ قسطنطنیہ دے ناں نال بازنطینی سلطنت دا راجگھر بنیا ۔ قسطنطنیہ نوں 1453ء چ سلطنت عثمانیہ دے سلطان محمد فاتح نے فتح کیتا ۔ جدید ترکی دے قیام دے بعد 1930ء چ اس شہر دا ناں استمبول رکھ دتا گئیا ۔
بازنتیئم دی ابتدا دا ذکر پرانیاں داستاناں چ ملدا اے ۔ اک روایتی داستان ایہہ وے کہ مگارا (ایتھنز دے کول اک شہر) دے بیزاس نے بحیرہ ایجیئن دے پار اتلے چڑھدے ول جہازرانی کردے ہوئے 667 ق م وچ بازنتیئم دی نیہہ رکھی ۔
![](http://upload.wikimedia.org/wikipedia/commons/c/c5/%D8%A8%D8%A7%D8%B2%D9%86%D8%AA%DB%8C%D8%A6%D9%85.png)
![](http://upload.wikimedia.org/wikipedia/commons/6/63/%D9%82%D8%B3%D8%B7%D9%86%D8%B7%D9%86%DB%8C%DB%81.png)
بیزاس نے ڈیلفی دے کاہن نال مشورہ کیتا کہ اوہ دسے اوہ اپنا نواں شہر کتھے بسائے ۔ کاہن نے اسنوں دسیا کہ "انھے دے مخالف" اوہ تھاں لبھے ۔ اوس ویلے اوہ اس دا مطلب نئیں سمجھیا ۔ پر جدوں اوہ آبنائے باسفورس تے آیا تے اوس ویلے اس نوں پتا لگا کہ کاہن دا کیہہ مطلب سی : اتلے ساحل تے یونانی شہر چالسیدون سی ۔ اگرچہ داستان دے مطابق اوہناں نے ادھا میل دور پئی زمین ول کوئی دھیان نئیں دتا ۔ بیزاس نے اپنا شہر دی بنیاد باسفورس دے یورپی ساحل تے رکھی تے اسنوں اپنے ناں تے بازنتیون دا ناں دتا ۔ ایہہ بحیرہ اسود دے داخلے تے واقغ ہون پاروں اک وڈا تجارتی شہر بنیا ۔ بازنتیون نے بعد چ باسفورس دے ایشیائی پاسے واقغ شہر چالسیدون نوں فتح کر لیا ۔ 196ء چ روم دیاں فوجاں نے شہر دا محاصرہ کر لیا تے اسنوں بوہت نقصان پہنچایا ۔ بازنتیئم دے محل وقوع نے رومی شہنشاہ قسطنطین I نوں اس ول راغب کیتا ، جسنے 330ء چ نووا روما دے ناں نال اسدی مڑ نیہہ رکھی ۔ اسدی موت دے بعد شہر نوں قسطنطینوپول (کانسٹنٹینوپول) اکھیا جان لگا ۔ ایہہ مشرقی رومی سلطنت ، جسنوں بعد وچ تریخ دان بازنطینی سلطنت آکھدے رہے، دا راجگھر رہیا ۔ 29 مئی 1453ء چ ایہہ شہر عثمانی ترکاں دے کول چلا گیا تے اک وار فیر ، ایہہ اک دوجی طاقتور سلطنت ، سلطنت عثمانیہ دا راجگھر بنیا ۔ ترک شہر نوں استمبول کہندے سن ، اگرچہ 1930ء تک اسدا ناں نئیں بدلیا گیا سی ۔ بھانویں ہن ترکی دا صدرمقام انکرہ اے پر استمبول اج وی ترکی دا سبتوں وڈا شہر اے ۔