Psicologia

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

psicologia

Supkategoria di	human science, health sciences, behavioral sciences
Faseta di	faculty of psychology
Historia	history of psychology
Praktiká pa	psychologist
Model item	branch of psychology, psychology terminology, psychological methodology
Sait Stack Exchange	https://psychology.stackexchange.com
Lo kontrario di	pseudopsychology

Psicologia ta e estudio di mente y comportacion. Su tema ta inclui e comportacion di ser humano y no ser humano, tanto e fenomeno di consciencia como e mente inconsciente, y procesonan mental manera pensamento, sintimento y rasonamento.

Terminologia

E termino "psicologia" tin su orgin den e palabra Griego psuche ("spirito di bida" o "rosea di alma"), cu traditionalmente, ta wordo traduci na psyche. E palabra "psicologia" ta un combinacion di psyche (alma) y logos (estudio). Den Griego antiguo e ta wordo expresa como ψῡχή λόγος, literalmente, e estudio di alma. Aunke e termino "psicologia" no a wordo inventa te na siglo diesshete y no a wordo usa ampliamente te na siglo diesnuebe.

Na 1890, William James, a difini psicologia como e "ciencia di bida mental, tantu su fenomenonan como nan condicionnan". Sinembargo, e fundador di "behaviorismo" (di Ingles: behavior, "comportacion"), e psicologo Mericano John B. Watson a sugeri na 1913 cu psicologia ta un rama puramente obhetivo y experimental cu ta forma parti di ciencia natural, manera kimica y fisica. Teoreticamente, psicologia su meta ta pa premira y e controlamento di comportacion.

Ψ (psi) ta e prome letter di e palabra Griego, psyche, pa simbolisa psicologia.

Historia

E establecimento di psicologia moderno como un disciplina cientifico formal ta remonta na 1879 ora Wilhelm Wundt (1832–1920) a inaugura e prome laboratorio di psicologia na un universidad na Leipzig, Alemania. Wilhelm Wundt ta ser considera hunto cu Gustav Theodor Fechner come e fundadonan di psicologia experimental.

Sinembargo, e raiznan di psicologia ta precede Wundt, cultiva pa personanan cu ta identifica como filosofo, fisico, fisiologo, y naturalista cu a conseha y debati ariba tres idea fundamental den psicologia.

1. Comportacion y experencia mental tin causa fisico cu por wordo studia cientificamente.
2. Hende su comportacion, pensamento y emocionnan ta ser forma cu tempo dor di nan experencia den nan ambiente.
3. E aparato di e curpa, cu ta responsabel pa produci comportacion y experencia mental, ta un resultado di evolucion pa medio di seleccion natural.

Causa fisico di comportacion

E emergencia di psicologia cientifico a rekeri e reconocemento cu preguntanan tocante comportacion humano y e mente por a ser contesta cientificamente. Mientras cu e Griegonan antiguo a pone e fundeshi cu speculacion profundo riba e sensonan, intelecto humano, y e base fisico di e mente, e ideanan aki a keda inactivo te na e Renaissance y a gana prominencia significativo durante e era di Iluminacion den e siglo diescinco y diesocho, respectivamente.

Te cu siglo diesocho, filosofia occidental tabata profundamente conecta cu religion, cu e doctrina di iglesia cu tabata afirma dualismo. Esaki ta encera cu hende ta consisti di dos entidad intimamente conecta: un curpa material, suheto na estudio cientifico manera materia inanima, y un alma inmaterial, cu ta wordo considera como un entidad sobrenatural cu ta opera mas aleu di ley natural y asina ta liber for di investigacion cientifico. Si un hende a tuma e reto pa contesta e doctrina aki publicamente, specialmente den mayoria parti di Europa, e por a wordo acusa di herecia y mata. A pesar di e peligernan aki, tabatin algun luga pa exploracion, ilustra dor di e trabou pionero di e matematico, fisiologo y filosofo Frances René Descartes.

Descartes su version di dualismo

Descarte su representacion di un reflex.

Prome cu Descartes, mayoria dualista a atribui a cualidadnan di sernan humano na e alma. Nan tabata kere cu e alma tabata responsabel pa e calor di e curpa, su capacidad pa move y bida mes. Descartes a tuma e reto pa contesta e perspectiva aki. Aunke poco tabata conoci tocante e sistema nervioso den su tempo, Descartes su concepto di e control mecanico di movemento ta parce nos comprondemento moderno di reflex, cu ta movemento o reaccion involuntario na stimula.

Descartes a teorisa cu un reflex ta puramente mecanico. E la propone cu candela ta pone particulonan den e cuero, trek na un hilo cu ta conecta cu e celebro, loke ta haci cu un porio ta habri y ta permiti likido pasa dor di un canal chikito pa e musculonan, loke ta conduci na retiro di pia. Sinembargo, e comprondemento moderno ta revela cu nervionan ta funciona dor di proceso electrico, no dor di tiramento fisico o fluho di likido.

Con e alma ta ricibi informacion dor di e wowo.

Descartes a sugeri cu e alma humano ta biba den e glandula pineal na centro di cabes. Den Descartes su splicacion, luz for di un flecha ta drenta den wowo, habriendo porionan den loke nos ta identifica awor como nervionan optico. Likido ta sali for di e wowonan pa medio di e porionan aki, loke ta causa movecion den e glandula pineal. Descartes a declara cu movecion aki ta transmiti e idea di e flecha na e alma.

Sinembargo, Descartes su idealogianan tabata tin limitacionnan significante, tanto como un concepto filosofico como un base pa establece un ciencia di psicologia. Un ehempel di un limitacion significante tabata: Con e alma cu ta pensa por tin interaccion cu e fisico? Den otro palabra con e inmaterial por tin causa ariba e materia fisico.

Thomas Hobbes y materialismo

E filosofo Ingles Thomas Hobbes a adopta un postura mas radical. Hobbes a argumenta cu concepto di spirito o alma no tin ningun nificacion, y a defende un filosofia cu awor ta wordo reconoce como materialismo. Segun Hobbes, tur cos por ser reduci na materia y energia. E la sostene cu tur comportacion humano, asta e decision aparentemente boluntario, por ser compronde dor di e procesonan fisico den e curpa, particularmente den e celebro. E filosofia ki no ta pone ningun limitacion teoretico riba loke psicologonan por studia cientificamente. Hobbes su ideanan a hunga un rol den inspira empirismo; e idea cu tur conocemento y pensamento humano ta bin di e experencia sensorial.

Fisiologia

Automata ta inspira e idea cu e ser humano tambe ta opera den un forma mecanico, cu no tin necesidad di un spirito inmaterial pa causa movecion.

E concepto cu e curpa, inclui e celebro, ta funciona como un mashin a impulsa e progreso di fisiologia, e estudio di e mecanismo di e curpa. Na cuminsamento di añanan 1800 tabatin un progreso considerabel riba e tereno aki. Den e decada cu a sigui, a haci hopi descubrimento importante tocante e sistema nervioso, cu a prepara e caminda pa e desaroyo di e psicologia cientifico.

E Ruso, Ivan Sechenov (1829–1905), a crea e fundeshi pa e estudio di fisiologia, reflexonan, neurologia, comportacion di animal y humano, y neurociencia. Sechenov a influencia Ivan Pavlov (1849–1936) conoci pa su descubrimento di condicionamento clasico.

Centro di Broca indica cu color cora.

Un otro desaroyo tabata e introduccion di e concepto di localisacion di funcionnan cognitivo. E idea aki ta postula cu cierto partinan di e celebro ta dedica na funcion specifico den e generacion di experencia mental y comportacion. Por ehempel, Paul Broca (1824–1880) a demostra cu si e celebro a sufri daño den un area masha specifico di e hemisferio robes, un individuo ta perde unicamente e abilidad di papia.

E ideanan ki di localisacion di funcionnan cognitivo a influencia frenologia, un pseudo-ciencia cu a declara cu por inferi caracteristicanan psicologico dor di sinti e golpi riba e superficio di e cabes o craneo. Mientras cu e tabata desacredita, frenologia a laga un marca atras y a yuda amplia e disciplina di neurociencia.

Franz Joseph Gall a propone cu e celebro ta consisti di diferente organonan individual cu ta determina caracteristicanan o personalidad di un hende.

Experencia ta forma mente y comportacion

Ademas di a inspira investigacion fisiologico, filosofia materialista Ingles di siglo diesseis a influencia directamente e scol di pensamento conoci como empirismo. E idea cu tur conocemento y pensamento humano ta bini di experencia sensorial, por ehempel, bista o oido.

E filosofo Britanico, John Locke a percibi mente di mucha como un blachi blanco y cu experencia sirbiendo como e krijt cu skirbi y yena e blachi. Locke ta argumenta cu muchanan ta nace unicamente cu e abilidad pa adapta nan comportacion na e demandanan di e medio ambiente fisico y social. Den otro palabra, segun Locke, muchanan no ta nace cu disposicion o preferencianan cu ta influencia con nan ta siña y desaroya. Esaki ta punta na e concepto cu un hende no tin boluntad liber, y sin un boluntad liber, no lo por tin un alma, pues e filosofia materialista.

Asociacion pa medio di proximidad

Si un persona experencia dos evento den su medio ambiente (estimulo o sensacion) na e mesun momento o un despues di otro, e dos evento ey lo ta asocia cu otro den e mente. Imagina un aplo su forma wantando e den bo man, su color berde o porta bo gusta esun medio cora cu geel, e sabor zuur o zoet, su textura na e momento cu bo morde aden, o djis tende e palabra "aplo" ta suficiente pa activa e idea di un aplo den e mente. Un aplo, den e ehempel ki, ta un concepto compleho basa ariba sensacionnan basico. E ley di asociacion ta keda un principio clave den memoria, atencion, consciencia, y e psicologia di siñamento (por ehempel, condicionamento clasico).

Nativismo

Similar na e robot, segun nativismo, hende humano tambe ta limita pa e informacion y reglanan di operacion cu ta geneticamente programa den e celebro humano.

Nativismo, e perspectiva opuesto di empirismo, ta afirma cu abilidad y conocemento ta inherente. Esencialmente, e mente ta rekeri un aparato cu tin e capacidad pa sinti e ambiente, interpreta y registra sensacionnan, warda y combina informacion sensorial, y recorda informacion na ora necesario.

Reconose cu e cuater imagen di aplonan ta e mesun aplo pero den diferente fase di consumo.

Immanuel Kant ta distingui entre dos tipo di conocemento: a priori y a posteriori. Conosemento a priori ta integra den celebro humano y no mester wordo siña, y conocemento a posteriori un hende ta gana for di experencia di e medio ambiente. Kant a argumenta cu pa compronde e mundo fisico, cierto conceptonan fundamental, manera espacio y tempo, mester ta inherente caba den e mente. E concepto integra aki ta crucial pa por reconoce, por ehempel, un aplo.

Seleccion natural

Kant a reconoce e atributonan inherente di e mente humano, pero e no tabatin un splicacion cientifico di nan origen y funcionamento. E comprondemento aki a wordo logra na 1859 ora Charles Darwin a publica The Origin of the Species ("E origen di especie"), transformando biologia, formando filosofia, y establece un base biologico pa psicologia, cu a coincidi cu avance den fisiologia.

Caracteristicanan heriditario y adaptacion na medio ambiente a resulta den variacion di fenotipo.

Pa medio di ciclo repetitivo di seleccion natural durante biyones di aña, criaturanan cu variacionnan chikito ta competi pa recursonan, y esnan cu ta sobrevivi, e descendientenan ta hereda e caracteristicanan "beneficioso". E proceso aki ta conduci gradualmente na e desaroyo di adaptacion, manera cabey, pia, hala, y wowo. Seleccion natural a conduci organismonan bibo pa desaroya comportacionnan cu ta aumenta nan posibilidad pa sobrevivi y reproduci nan mes. E concepto di funcion ta crucial pa compronde e proceso adaptivo aki. Darwin tabata studia con funcion di comportacion ta yuda un organismo sobrevivi y reproduci.

Campo di psicologia

Psicologia ta un disciplina interdisciplinario, e ta crusa e fronteranan entre ciencia natural y ciencia social. Por ehempel, neuropsicologo ta den e cuadro di neuropsicologia. Neuropsicologia ta un ramo di psicologia cu ta trata di conecta psicologia cu neurociencia. Specificamente, funcionnan di e celebro y su relacion cu comportacion. Ademas, como un cientifico social, psicologonan ta encurasha pa compronde e comportacion di individuo y gruponan, esaki ta wordo yama dinamica di grupo. E siguiente lista ta encera, entre otro, e camponan den psicologia ariba e tereno di enseñansa universitario Hulandes y Flandes:

• Neuropsicologia
• Psicobiologia
• Psicologia clinico
• Psicologia cultural
• Psicologia di desaroyo
• Psicologia di enseñansa
• Psicologia experimental
• Psicologia di personalidad
• Psicologia di siñansa
• Psicologia di trabou y organisacion
• Psicologia social

Lista di fuente

• Blackmore, S.; Troscianko, E.T. (2018). Consciousness: An introduction [Consciencia: Un introducion] (3 ed.). Routledge. https://www.routledge.com/Consciousness-An-Introduction/Blackmore-Troscianko/p/book/9781138801318. 
• Gray, P.O.; Bjorklund, D.F. (2018). Psychology [Psicologia] (8 ed.). New York: Worth Publishers. ISBN 9781319150518. 
• Leahey, Thomas Hardy (2018). A History of Psychology: From Antiquity to Modernity [Un Historia Psicologia: For di Anticua te na Moderno.] (8 ed.). New York & London: Routledge. 
• (2015). René Descarte The Passions of the Soul and Other Late Philosophical Writings [René Descarte E pasionan di alma y otro escritornan filosofico]. United Kingdom: Oxford University Press. ISBN 978–0–19–968413–7.