Isaac Asimov
| |
| Profession: | escrivan de sciéncia-ficcion |
|---|---|
| País: | Estats Units d'America |
| Data de naissença: | 2 de genièr de 1920 |
| Luòc de naissença: | Petrovichi, Russia |
| Data de decès: | 6 d'abril de 1992 |
| Luòc de decès: | ciutat de Nòva York |
Isaac Asimov (nascut en Russia lo 2 de genièr de 1920, mòrt als Estats Units lo 6 d'abril de 1992) foguèt un escrivan celèbre de sciéncia-ficcion del sègle XX. Es sustot conegut per sas òbras de sciéncia-ficcion e sos libres de vulgarizacion scientifica.
Escrivan prolific, Asimov a escrich o editat mai de 500 libres e respondut a mai o mens 90 000 letras e cartas postalas. Sos libres son estats publicats dins 9 de las 10 grandas categorias de la classificacion decimala de Dewey. L'òbra mai celèbra d'Asimov es la seria Foundation, dont los tres primièrs libres an emportat l'unic prèmi Hugo de la « Melhora seria de totes los tempses » en 1966. Sos autres serias màgers son lo cicle de l'Empèri (Galactic Empire) e lo cicle dels robòts (Robot series).
A aquel títol, es sovent considerat, amb Arthur C. Clarke e Robert A. Heinlein, coma un dels « Tres Grands » autors de sciéncia-ficcion de lenga inglesa
A egalament escrich d'obratges avent per tèmas la ficcion misteriosa e la fantasy, aital coma de nombroses obratges de non-ficcion. La màger part de sos libres de sciéncias popularas explican los concèptes de faiçon istorica, remontant tan luènh coma possibla a una epòca ont la sciéncia en question èra a son estadi mai simple. D'exemples incluson lo Guide to Science, la seria en tres volums Understanding Physics, e Asimov's Chronology of Sciéncia and Discovery. A escrich sus de nombroses autres subjèctes scientifics e non scientifics, tals coma la quimia, l'astronomia, las matematicas, e l'istòria.
En 1959, sus convit de son amic lo cercaire Arthur Obermayer, participa a de sessions de recèrcas creativas organizadas per una filiala del MIT per melhorar l'armament american.
Asimov es estat president de l'American Humanist Associaction.
Un cratèr sus la planeta Mart, una escòla primària a Brooklyn e un prèmi literari (Isaac Asimov Awards) son nommats en son onor.
