Drac

Lo Drac ailat sus la fachada d'un ostau de la carriera Sorní a Valéncia (País Catalans)

Lo Drachenstich de Furth im Wald, en Bavièra

Lo Drac dau Pònt de Sant Beneset a-n'Avinhon

Lo drac o dragon, es una creatura mitica generalament dessenhada e imaginada coma una mena de sèrp enòrma e potenta o coma un autre animal reptilian, amb de qualitats o de poders magics e/o spirituals. Las creaturas mitologicas que possedisson qualques o la part màger de las caracteristicas que s'associan amb los dracs son plan frequentas dins las culturas del mond entièr. En Occitània tradicionalament lo drac pòt préner una forma umana, la d'un farfadet o d'una mena de diableton, mas tanben divèrsas formas animalas.

Estatua de dragon sus una font a l'Isla Sentosa

Etimologia

Lo mot drac ven dau latin classic draco / draconis. Lo mot latin est un manlèu au grèc drákōn que significa sèrp de mar. Mas benlèu son sens literal es "lo qu'a un agach mortal". Existís tanben dins lei lengas celticas. En galés, Ddraig. La forma dau germanic commun reconstituida *drakan es considerada per leis especialistas coma un manlèu au latin e es a l'origina dei mots drake en anglés, Drachen en alemand (vièlh naut alemand trahho) et draak en neerlandés (neerlandés mejan drake). Pasmens, lo mot anglés drake a pas mai lo significat de drac despuèi l'Edat Mejana mai sierve per designar una pèça d'artilhariá. L'anglés modèrn manlevèt lo mot dragon a la lenga d'Oïl.

Descripcion

Los dracs son comunament representats coma de bèstias serpentinas o reptilianas, qu'espelisson d'uòus e que possedisson de còsses plan impressionants per sa talha, e generalament cobèrts d'escatas. Sovent son representats amb d'uèlhs gròsses, trach qu'es a l'origina del nom del dragon dins fòrça culturas, e son sovent (mas pas totjorn pasmens) dessenhats amb d'alas e un alen de fuòc. D'unes dragons tenon pas d'alas e s'assemblan mai que mai a de sèrps longas. Los dragons pòdon possedir un nombre variable de pautas: pas cap, doas o quatre. Las representacions modèrnas dels dragons son plan sovent de talha enòrma, pasmens temps passat las pinturas e dessenhs de dragons en Euròpa èran sonque de la talha dels orses.

Lo dracs dins lo monde

En Occitània

Segon lei legendas folcloricas que li son ligadas, lo Drac es de forma cambiadissa. De còp descrich coma un aucèu, un matagòt, un leberon e mai un èstre uman ò una grand varietat d'animaus diferents, mai ò mens pròchis de la figura dau diable. Representat lo pus sovent coma un saurian amb d'alas, lo Drac a la possibilitat de se tornar incarnar en prenent una forma umana. Es soventei fés tanben un mòstre dau bestiari occitan ligat a l'aiga. A n'aqueu prepaus, Frederic Mistral fa dau Drac l'un dei personatges màgers de son "Poèma dau Ròse". En Gasconha, lo Drac se tòrna trobar dins lei còntes collectas per Joan-Francés Blader, demòni generalament de forma umana que ven enmascar lei joventas. En Roergue, Es tanben lo personatge clau d'una seria de còntes escrich per Joan Bodon "Los contes del Drac" que lo drac, espós de la Draquessa e paire dei dracons l'es lo fiu dau diable.

En Euròpa

Lo dragon es un element plan important dins las legendas medievalas d'Euròpa.

Sant Jòrdi e lo drac

Sant Jòrdi que tua lo dragon (a Estocòlme)

En Anglatèrra e en Catalonha (e endacòm mai tanben) es associat amb la figura de Sant Jòrdi que tua l'animal. En Catalonha lo jorn de Sant Jòrdi (patron del país) es vengut lo jorn dels amoroses e aquela jornada se sòl ofrir un libre e una ròsa; se celèbra lo 23 d'abril. Dins qualques localitats de lenga catalana coma a Alcoi (al País Valencian) la figura de Sant Jòrdi es lo personatge central o la rason de la fèsta locala. A Banyeres de Mariola (localitat del sud de País Valencian) e a Montblanc (Catalonha) se fan d'escenificacions de la scèna de batalha entre Sant Jòrdi e lo dragon.

Lei baumas dau Drac (Coves del Drac) a Malhòrca

Lo drac al País de Galas

Bandièra de Galas

Al País de Galas, un drac roge (en galés: Y Ddraig Goch) apareis sus la bandièra del país e representa una vièlha legenda galesa.

En Asia

Dragon articulat japonés del periòde Meiji, en metal, evòri e pèrlas

Contrariament a sos omològues europèus, los dragons asiatics, ben qu'associats a las fòrças de la natura, son dangeroses mas pas vertadièrament ostils. Mòstran pas lo caractèr sovent violent dels dragons occidentals. An generalament una aparéncia diferentas : son mai prims e aerians e tenon pas sovent d'alas. Se retròban de representacions semblablas en China, Japon, Corèa e Vietnam. Sas caracteristicas fisicas e ssimbolicas càbiam pas fòrça entre aquelas civilizacions : esperits associats al clima, so poderoses e venerats. Son regularament associat al poder en plaça.