Auguste Rodin
![](http://upload.wikimedia.org/wikipedia/commons/thumb/9/9d/Netsurf11_-_Rodin.jpg/180px-Netsurf11_-_Rodin.jpg)
François-Auguste-René Rodin es un escultor francés dels mai coneguts dins son país mas tanben internacionalament. Nasquèt lo 12 de novembre de 1840 a París (França) e se moriguèt a Meudon (Illa de França) lo 17 de novembre de 1917.
L'òbra de Rodin
[modificar | Modificar lo còdi]Auguste Rodin revolucionèt l'escultura amb una libertat de forma qu'èra pas estada coneguda fins aquel moment. Capable de la reproduccion mai fisèla (coma per exemple amb l'òbra Le Penseur), introdusiguèt una sensualitat que espantèt lo public del temps (amb Le Baiser per exemple). Se coneisson sovent sas òbras gràcias a sa forma acabada que demòra en part presonièra d'un blòc mai rustic e sonque descopat en part. La resulta n'es un equilibri entre un modèl encabit dins la massa bruta e un vam que se balha a l'òbra que fa que semble totjorn a mand de se n'escapar. Foguèt plan amic del pintor american Whistler e d'Alphonse Legros.
![](http://upload.wikimedia.org/wikipedia/commons/thumb/b/bf/Legros_-buste_de_Rodin_%28dessin%29.jpg/140px-Legros_-buste_de_Rodin_%28dessin%29.jpg)
Rodin, a l'avant-garda de son art, a laissat los motles de sas esculturas a disposicion del public. Aviá a mai preparat de còpias de sa signatura. Èra un biais per el de laissar d'autras personas prolonger son òbra aprèp que se moriguèsse.
L'estatua Balzac provoquèt un brave escandal (per encausa de son aparéncia e sa preparacion interminabla) e l’autor de la comanda la volguèt pas recebre.
Son maitas las òbras de Rodin que se trobavan dins lo World Trade Center e que foguèron anequelidas aprèp los atemptats de l'11 de setembre de 2001.
Rodin aguèt coma collaboradoira Camille Claudel (èra cargada de desgrossir los marbres en foncion d'un modèl de geis.) Ela, qu'èra a l'encòp sa musa e calinhaira, li servissiá tanben de modèl, inspiraira de las òbras la Convalescente, la France o la Pensée…
![](http://upload.wikimedia.org/wikipedia/commons/thumb/8/8f/Auguste_Rodin_1893_Nadar.jpg/175px-Auguste_Rodin_1893_Nadar.jpg)
Existisson d'aspres debats sus l'atribucion de qualques òbras a Auguste Rodin o a Camille Claudel. Las recèrcas mai recentas en ocasion de l'exposicion "Camille Claudel et Rodin, rencontre de deux destins", (Musèu Nacional de las Bèlas Arts de Quebèc, Detroit Institute of Art, Fondation Pierre Gianadda, Martigny, 2005-2006) an mostrat la complexitat bèla de la relacion entre totes dos artistas que trabalhavan amassa dins lo meteis endrech. Amassa visquèron una passion estimuladoira mas trebolada, narrada d'un biais romanesc dins lo filme francés Camille Claudel.
Lo mercat de l'art coneguèt un escandal important pendent las annadas 1990 amb la descobèrta d'una ret de falsaris que foguèron condamnats per la Justícia francesa en 2001 mas que son activitat rompliguèt lo mercat de centenats d'òbras imitadas.
Òbras
[modificar | Modificar lo còdi]![](http://upload.wikimedia.org/wikipedia/commons/thumb/0/0f/Auguste_Rodin-Burghers_of_Calais_%28photo%29.jpg/175px-Auguste_Rodin-Burghers_of_Calais_%28photo%29.jpg)
- L'Âge d'airain (1877) Aquesta òbra es tan perfiècha que Rodin foguèt suspectat d'un motlage sus natura. Foguèron necessàrias maitas annadas per tal que foguèsse disculpat a debon quand presentèt lo modèl.
- Le Penseur (1882). Son òbra mai coneguda.
- Adam (1882)
- Ève (1882).
- La Cathédrale.
- Ugolin et ses enfants.
- Le Baiser (1886).
- Los Borgeses de Calais.
- La Porte de l'enfer: S'agís d'una mena de compilacion de maitas òbras. Rodin foguèt nafrat que se poguèsse pensar qu'aviá fach un motlatge per L'Âge d'airain. A mai foguèsse disculpat, ne sentiguèt de longa un pensament. La Porte de l'enfer, qu'Octave Mirbeau nos laissèt, en febrièr de 1885, la sola descripcion completa, representèt per el una mena d'exutòri que i vòl mostrar qu'es capable de reproduire sas òbras en miniature dins totes sos detalhs e aital que las grandas son fachas a man. La pòrta de l'infèrn es una mena de ponch d'orgue de l'ensems de son òbra. Demorarà probablament inacabada", remarcava Gustave Coquiot, un de sos secretaris, dins Le vrai Rodin (1913).
![](http://upload.wikimedia.org/wikipedia/commons/thumb/6/69/Z%C3%BCrich_-_Kunsthaus_-_Rodin%27s_H%C3%B6llentor_IMG_7384_ShiftN.jpg/170px-Z%C3%BCrich_-_Kunsthaus_-_Rodin%27s_H%C3%B6llentor_IMG_7384_ShiftN.jpg)
- Éternelle idole.
- Mignon.
- L'âge mûr.
L'art
- Illustracion de las Fleurs du Mal de Baudelaire per Gallimard (1887) e del roman d'Octave Mirbeau, Le Jardin des supplices (1899).
- Ombre
- Balzac
Referéncias
[modificar | Modificar lo còdi]- Auguste Rodin – L'Art, entretiens réunis par Paul Gsell, Grasset (ISBN 2-246-19246-3).
Ligams intèrnes
[modificar | Modificar lo còdi]Ligams extèrnes
[modificar | Modificar lo còdi]- (fr) Musèu Rodin, a París
- (en) Rodin Museum, a Filadèlfia
- (fr) Biografia, citacions, eveniments e luòcs consacrats a aqueste artista
- (en) Rodin-Web.org: Biografia, fòtos, libres, eveniments consacrats a Rodin. Descripcion d'aperaquí 220 colleccions publicas que tenon d'òbras de Rodin, amb los luòcs.
- (fr) (en) Victor Hugo vist per Rodin, a Besançon
- (en) Auguste Rodin dins Artcyclopedia