Tynset

Tynset
tettstad
Tynset sett frå Tynsetbygda med Tronfjellet i bakgrunnen
Land	Noreg
Fylke	Innlandet
Kommune	Tynset
Areal	3 km²
Folketal	2 934  (2023)
Folketettleik	978 / km²
Postnummer	2500 TYNSET
Innbyggjarnamn	tynseting
Preposisjon	på Tynset
Tynset 62.27594°N 10.78241°E / 62.27594; 10.78241
Wikimedia Commons: Tynset (village)

Tynset er ein tettstad og administrasjonssenteret i Tynset kommune i Hedmark i Innlandet fylke. Tettstaden ligg ved Glåma og har 2 934 innbyggjarar per 1. januar 2023.

Tynset har utvikla seg til eit regionsenter for Nord-Østerdalen. Her ligg mellom anna sjukehuset Innlandet Tynset og kontora til Nord-Østerdal tingrett. Tettstaden har grunnskule og vidaregåande skule.

Næringar

Jordbruket er ein viktig næringsveg i kommunen, og det rikaste jordbruksarealet ligg ved Glåma omkring der tettstaden Tynset ligg. Sidan Tynset ligg rimeleg høgt er jordbruket konsentrert om dyrking av gras til mjølkeproduksjon. Bygg kan nå modning i gunstige år, og det er òg ein del sauehald. Veksten til tettstaden skjer i samanstøyt med interessene for jordbruk.

På Tynset er det offentleg sektor og tenesteytande næringar innan handel, data, jus, økonomi og bygg og anlegg som dominerer. Fleire statlege, fylkeskommunale og interkommunale tiltak er tillagt Tynset. Mykje av funksjonen som regionsenter er knytt til tettstaden som skulesenter og lokaliseringa av sjukehuset Innlandet Tynset. Kulturhuset på Tynset er vorte eit levande og pulserande hus til bruk for Tynset og folket i Nord-Østerdalen.

Samferdsle

Tynset ligg sentralt i høve kommunikasjon. Langsetter Glåma, i retning sør, går Riksveg 3 og Rørosbanen til Elverum. Jarnbanen går vidare nordaustover langsetter Glåma og Rv3 går i retning nordvest gjennom kommunen og til Ulsberg. Fylkesveg 30 går nordover gjennom Tylldalen frå Øvre Rendal, kryssar Glåma attmed Tynset og går vidare langsetter vestsida av elva mot Tolga. Ei 125 m lang fagverksbru i limtre med spenn på 70 m opna i 2001. Mykje trafikk gjennom desse vegane har styrkt Tynset som turistområde. Nært Savalen er det skipa anlegg for vintersport.

Galleri

• 
  På Tynset er det eige rådhus
• 
  Tynset Stasjon på Rørosbanen er nyoppussa og inneheld attåt venterom ein restaurant
• 
  Spark-skulpturen på Tynset, med vanleg spark framfor

Sjå òg

• Tynset kommune

Kjelder

• «Tynset» i Store Norske Leksikon
• Fakta om kommunen Arkivert 2010-09-12 ved Wayback Machine. - Tynset kommune