Dino Baggio
![]() | |||
Personleg informasjon | |||
---|---|---|---|
Fødselsdato | 24. juli 1971 (53 år) | ||
Fødestad | Camposanpiero i Italia | ||
Høgd | 188 cm | ||
Posisjon | Midtbanespelar | ||
Seniorkarriere* | |||
År | Lag | Kampar | (Mål) |
1989-1991 | Torino | 28 | (2) |
1991-1992 | → Inter (lån) | 27 | (1) |
1992-1994 | Juventus | 49 | (1) |
1994-2000 | Parma | 172 | (19) |
2000-2005 | Lazio | 44 | (1) |
2003 | → Blackburn (lån) | 9 | (1) |
2004 | → Ancona (lån) | 9 | (1) |
2005 | Triestina | 13 | (0) |
2006-2009 | Tombolo | 1 | (0) |
Totalt | 351 | (26) | |
Landslag | |||
1991-99 | Italia | 60 | (7) |
* Seniorklubbkampar og mål berre telt for nasjonal liga |
Dino Baggio (fødd 24. juli 1971) er ein italiensk tidlegare fotballspelar frå Camposampiero i Veneto-regionen. Baggio var med på å vinne UEFA-cupen tre gongar, ein gong med Juventus og to gongar med Parma FC. I tida 1991 til -99 spelte han 60 landskampar for Italia, høgdepunktet kom då han og landslaget vann VM-sølv i 1994. Han var kjend som ein taklingssterk, defensiv midtbanespelar.
Karriere
[endre | endre wikiteksten]Klubbspel
[endre | endre wikiteksten]Våren 1990 debuterte Baggio for Torino, som då var i ferd med å rykke opp frå Serie B. Han spelte for klubben i Serie A i 1990/91-sesongen, den neste sesongen spelte han for Inter. Frå sommaren 1992 spelte han for Juventus i to sesongar, den fyrste av dei to sesongane vart avslutta med siger i UEFA-cupen.
Sine beste år som fotballspelar hadde han i Parma FC. Gjennom seks sesongar fekk han med seg to triumfar i UEFA-cupen, 1995 og 1999, i 1999 vart det også nasjonalt cupgull. Ferda gjekk i 2000 vidare til SS Lazio der han spelte i tre sesongar. Etter minimalt med speletid i den siste sesongen, reiste han sommaren 2003 til den engelske klubben Blackburn Rovers. Halvvegs i fyrste sesongen flytta han tilbake til heimlandet, der han fullførte siste halvdel av 2004-sesongen med AC Ancona. Sommaren 2005 gjekk han til US Triestina i Serie B, men braut kontrakta etter tre seriekampar og la fotballskoa på hylla, etter ein konflikt med trenaren Pietro Vierchowod.
Landslagsspel
[endre | endre wikiteksten]Baggio debuterte på Italia sitt landslag den 21. desember 1991, då det i ein EM-kvalifiseringskamp vart heimesiger 2-0 over Kypros. I 1992 var han sentral då Italia vann EM for ungdomslandslag, og han spelte same året på OL-laget under sommarleikane i Barcelona. Gjennom 1993 skåra han tre mål for Italia i kvalifiseringskampar til VM 1994. Under sjølve VM-sluttspelet i USA skåra han kampens einaste mål då Italia slo Noreg 1-0 i gruppespelet, og han gav Italia leiinga i kvartfinalen mot Spania, der namnebror Roberto Baggio vart kampvinnar med sitt 2-1-mål like før slutt. I finalen mot Brasil vart Dino Baggio bytta ut i det 95. minutt, Italia tapte kampen etter straffesparktevling. Han var med til EM 1996 i England, men spelte berre ein kamp. Derimot spelte han alle kampane då Italia tok seg til kvartfinalen i fotball-VM 1998. Han spelte sin 60. og siste landskamp i Lecce i november 1999, der det vart 1-3-tap for Belgia. Alle dei sju landslagsmåla hans kom i åra 1993 og 1994.
Merittar
[endre | endre wikiteksten]- VM-sølv 1994 for Italia
- Vinnar av UEFA-cupen 1993 med Juventus
- Vinnar av UEFA-cupen 1995 og 1999 med AC Parma
- Italiensk cupmeister 1999 med AC Parma
Kjelder
[endre | endre wikiteksten]- Denne artikkelen bygger på «Dino Baggio» frå Wikipedia på engelsk, den 20. juni 2014.
Bakgrunnsstoff
[endre | endre wikiteksten]- Dino Baggio på FIFA sin offisielle nettstad