Roy Cayetano

Eldred Roy Cayetano (* 20. Februar 1945 in Barranco) is en Spraakwetenschopper, Kulturaktivist un Politiker (PUP) ut Belize.

Cayetano is 1945 as Söhn von Manuela, borene Marin, un den Schoolmeester Eugenio P. Cayetano in Barranco boren. He is en Garifuna. Sien Vader weer na de Tied in Barranco as Schoolmeester an Scholen in Douglas un San Miguel, so dat Cayetano in verscheden Öörd opwussen is. Dat Geld hett nich reckt, em na de High School to schicken, dorüm is Cayetano Pupil-Teacher worrn un is denn 1965 bet 1968 op dat Belize Teachers’ College gahn. 1969/1970 weer he an de Universität Leeds in Grootbritannien.

1975 hett Cayetano en Bachelor of Arts in Anthropologie un Spraakwetenschoppen an de Universität von Michigan maakt un tosätzlich denn en Master. He weer Pearson Fellow an dat Ontario Institute for Studies in Education in Kanada. As Schoolmeester hett he an verscheden Scholen in Belize Ünnerricht geven un 20 Johr lang för dat Ministerium för Bildung arbeidt.

Sien Text Towards a Common Garífuna Orthography von 1992 weer en wichtigen Bidrag, de Arbeiden von Douglas Macrae Taylor, Richard Hadel un von dat Summer Institute of Linguistics tohoopfaat hett un Grundlagen för de Orthografie von de Garifuna-Spraak leggt hett. 1993 hett Cayetano mit The people’s Garifuna dictionary = Dimureiágei Garifuna dat eerste Wöörbook von de Garifuna-Spraak rutbröcht.

Cayetano is de Schriever von dat Gedicht Drums of Our Fathers, dat de Garifuna-Kultur priest. Düt Gedicht warrt siet 2004 in Dangriga ok dör dat Drums of Our Fathers Monument ehrt.

He weer Mitgrünner von dat Garifuna National Council un hett sik as Generaalsekretär von de Natschonale UNESCO-Kummission von Belize aktiv dorför insett, dat de UNESCO 2001 Spraak, Danz un Musik von de Garifuna in de Repräsentative List von dat immaterielle Kulturarv von de Minschheit opnahmen hett.

Cayetano weer Chief Executive Officer in dat Ministerium för Ländliche Entwicklung un Kultur un ok Viez-Minister för Kultur. För de Regerungspartei PUP weer Cayetano von 2003 bet 2008 Maat von’n Senaat von Belize.

Cayetano hett 1971 Phyllis Elvira Cayetano Miranda freet. De beiden hebbt dree Söhns. Cayetano leevt nu in Dangriga.

Warken

• The people’s Garifuna dictionary = Dimureiágei Garifuna. Dangriga 1993
• Bungiu Wabá: Lemesi luma Uremu Garifuna. (God Our Father: The Mass with Garifuna Songs), Dangriga 2002