Leda (Maand)

Leda (ok Jupiter XIII) is en von de middleren Maanden vun den Planet Jupiter. Dat weer en vun de lüttsten Jupiter-Maanden, de al vör de Voyager-Sonden opdeckt weer.

Opdecken

De Maand is an’n 14. September 1974 von den US-amerikaanschen Astronomen Charles Kowal op Fotoplatten opdeckt worrn, de em poor Daag vörher op’n Mount Palomar maakt worrn sünd. Dorüm warrt as dat offizielle Datum vun’t Opdecken tomeist de 11. September angeven.

De Naam kummt ut de greeksche Mythologie, wo Leda en Leevste von Zeus weer. Zeus weer ehr neeg kamen as en Swaangestalt.

Ümloopbahn

Leda hett en middleren Afstand vun’n Jupiter vun üm un bi 11.165.000 km. He bruukt för en Ümloop ungefäähr 240 Daag un 12 Stünnen. De Maandbahn is üm 27,457 ° teemlich düchtig gegen den Äquater vun’n Jupiter neegt un hett mit 0,15 ok en teemlich groote Exzentrizität. Dat bedüüdt, de Bahn is nich fein rund, man ’n beten in de Läng tagen. De Bahn is vun de Egenschoppen en beten liek mit noch en paar annere Maanden. De warrt as de Himalia-Grupp betekend, wiel Himalia de gröttste von disse Maanden is.

Egenschoppen

Leda hett en Dörmeter vun ruchweg 20 km. De Dicht is op 2,6 g/cm³ schätzt worrn, wat teemlich groot is. De Wetenschoplers gaht dorvon ut, dat de Maand gröttstendeels ut Silikat-Steen besteiht – as de anndern ut de Grupp ok. De Bavenflach hett en Albedo von 0,04 – blots 4 % von dat Licht, dat ankummt, warrt ok wedder torüchstrahlt.

Maanden vun den Planeten Jupiter

Ahn Naam: S/2003 J 2 | S/2003 J 4 | S/2003 J 9 | S/2003 J 10 | S/2003 J 12 | S/2003 J 16 | S/2003 J 18 | S/2003 J 19 | S/2003 J 23 | S/2010 J 1 | S/2010 J 2 | S/2011 J 1 | S/2011 J 2 | S/2016 J 1 | S/2017 J 1 | S/2017 J 2 | S/2017 J 3 | S/2017 J 5 | S/2017 J 6 | S/2017 J 7 | S/2017 J 8 | S/2017 J 9

Kiek ok na bi: List von de Jupiter-Maanden