Jumfernhuut
De Jumfernhuut (med. Fackbegreep Hymen na Hymenaios, den greekschen Gott vun de Eh[1]) is en dünne Membranhuut bi Fronslüüd, de to’n Deel den Ingang vun de Vagina överdecken deit.
Entwickeln
[ännern | Bornkood ännern]
In’t fröhe Stadium vun de fetalen Entwickeln wiest de Vagina keen Apen. De Jumfernhuut kummt tostannen ut en dünne Schicht vun Geweev, dat de Vagina vun’n Sinus urogenitalis scheedt. Se stammt jüst so as de ünnere Deel vun de Vagina vun de Sinovaginalhöckers af un besteiht ut Zellen vun’n Sinus as ok vun de Vagina. Normalerwies geiht de Jumfernhuut al vör de Geboort apen. De Grött un Form is aver vun Fro to Fro düchtig ünnerscheedlich.
En poor vun de Formen, de an’n fakenstens vörkamt, sünd:
- Annular: De Jumfernhuut billt dorbi en Ring üm den Vaginalingang
- Septal: Hier billt se en oder mehr Geweevsbänner, de över den Vaginalingang leegt
- Cribriform: Dorbi tütt sik de Jumfernhuut över de hele Vagina, wiest aver vele Löker op
- Parous Introitus: Betütt sik op de Apen, de na de Geboort vun en Kind nablifft un beschrifft blots de Resten vun’t Hymen an de Sieten vun den Vaginalingang.
Blots in roor Utnahmen kummt dat vör, dat de Vagina – as en sünnere Form vun Gynatresie – vullstännig vun’t Hymen afslaten is. De Mediziner snackt denn vun en Hymenalatresie oder Atresia hymenalis. In so en Fall kann bi’t Insetten vun de Menstruatschoon dat Blood nich aflopen un dat kummt to en so nöömten Hämatokolpos oder Hämatometra. Dorbi füllt sik de Vagina un de Beermoder mit Blood, wat en chirurgsch Ingriepen nödig maakt, dormit en utreckend grote Apen na de Vagina billt warrn kann.
Defloratschoon
[ännern | Bornkood ännern]Wiet verbreedt is de Vörstellen, dat de Jumfernhuut bi’m eersten Sex inritt. Dat eerste mol warrt dorüm ok as Defloration betekent oder ok as Entjumfern. In enige Kulturen, de op de Küüschheit vun de Fronslüüd för de Eh groten Weert leegt, warrt de Jumfernhuut dorüm as’n Bewies dorför ansehn, dat en Fro noch nich anröggt un noch Jumfer is. As Nawies dorför gellt dat Blood vun’t inreten Hymen op dat Bettlaken vun de Hochtietsnacht. Man, in Wohrheit is dat so, dat mehr as de Hälft vun de Fronslüüd bi’n jemehr eerst mol Sex gor keen Blöden hebbt [2], un ok de Jumfernhuut keen Schaden nimmt. De Geschichten vun’t blödig Entjumfern geiht torüch op en Tiet, as noch bannig junge Deerns mit utwassen Mannslüüd ünner Dwang verheiraat worrn sünd. Dorbi keem dat natürlich faken to Sehren in’t Rebeet vun Puus un Vagina.
De Jumfernhuut kann aver ok dör körperlich Anstrengen t. B. Sport as Gymnastik oder Radföhren, bi’t Störten oder dör Masturbatschoon twei gahn oder inrieten. Ümstreden is, wat de Jumfernhuut ok dör den Bruuk vun Tampons wiel de Menstruatschoon rieten kann.
Dat kummt ok vör, dat en Deerns al ahn Jumfernhuut boren warrt. In annere Fäll is de Membran aver ok so bestännig, dat se chirurgsch apen maakt warrn mutt, dormit de Fro ahn Pien Sex hebben kann. So en operativ Wegmaken vun de Jumfernhuut warrt as Hymenektomie betekent.
Dat gifft also vele Möglichkeiten, woans dat Hymen verännert warrt oder ok jüst nich. Dorüm is dat opletzt gor nich möglich, de Jumfernhuut as en Bewies dorför oder dorgegen antosehn, dat en Fro al Bislaap harr.
Bi en Ünnersöken dör’n Fronsdokter warrt dorpo achtgeven, dat de Jumfernhuut heel blifft. Faken is de Hutt so elastisch, dat en vörsichtige Ünnersöken vun de Vagina ok bi en Jumfer möglich is, ahn dat de Jumfernhuut Schaden lidd. Dat gifft ok de Möglichkeit, de Jumfernhuut op chirurgschen Weg wedder hertostellen (Hymenalrekonstrukschoon). Dorbi warrt de Soom vun’t Hymen in en Operation wedder opboet, so dat dat bi’n Bislaap wedder inritt un to blöden anfangt, wat den wünschten „Bewies“ bringt, noch Jumfer to wesen.
Jumfernhuut bi annere Söögdeerten
[ännern | Bornkood ännern]Bi de meisten anneren Söögdeerten is en Hymen blots in Form vun en lütte Huutfalt an de Grenz twüschen Schedenvörhoff un Scheed utbillt.
Literatur
[ännern | Bornkood ännern]- S. Lahoti et al: Evaluating the child for sexual abuse. In: Am Fam Physician. 2001 Mar 1;63(5):883-92. (Ünnersöken vun’t Utprägen vun de Jumfernhuut bi Kinner un junge Deerns un Vergliek vun de Anatomie un Schadens dör sexuell Vergahn)
Borns
[ännern | Bornkood ännern]- ↑ Britannica 2004, hymen
- ↑ McCann, J; Rosas, A. and Boos, S. (2003) Child and adolescent sexual assaults (childhood sexual abuse) in Payne-James, Jason; Busuttil, Anthony and Smock, William (eds). Forensic Medicine: Clinical and Pathological Aspects, Greenwich Medical Media: London, 460.
Weblenken
[ännern | Bornkood ännern]- Hymen-Galerie – medizinsch Teken vun verscheden Jumfernhuutformen