De Fresen

Logo vun de Partei

De Fresen weer ene Partei in Neddersassen. De Partei will sik för de polietschen Intressen vun de Fresen insetten. De Vörsitter weer Arno Rademacher. De Fresen bünd Lidd bi de Europääsche Fre’e Allianz.

Historie

De Partei is an’n 29. Juni 2007 in Hesel grünnt worrn. Ehren Sitt hett se in Auerk. In’n November harr de Partei de Ünnerschriften vun Ünnerstütters ok all tohoop, de nödig sünd, dat en Partei to de Wahl tolaten warrn kann, un de Partei is vun’n Landswahlleiter to de Wahl an’n 27. Januar 2008 to’n Landdag vun Neddersassen tolaten worrn. Bi de Wahl sülvst hett de Partei üm un bi 0,3 % vun de Stimmen kregen. Dat beste Ergeevnis harrn se in’n Wahlkreis Leer/Borkum mit 4,5 %. Vörsitter Arno Rademacher hett ankünnt, dat de Partei de Wahl anfechten laten will, vun wegen dat de Partei nich vun de 5-%-Grenz utnahmen weer, wat ans för Partein vun natschonale Minnerheiten gellt. Dat Ergeevnis harr ok bi ene Utnahm nich reckt, denn dorför harrn se opminnst 0,7 % bruukt, aver de Partei seggt, dat veel mehr Lüüd jem wählt harrn, wenn se wusst harrn, dat se jemehr Stimm nich verschenken deen.

Programm

De Partei will sik ünner annern för de Rechten vun de Fresen insetten un dorbi ok Kultur un Spraak fördern. Bi de Spraken sünd dat dat Saterfreesche un dat Plattdüütsche. De Kultur vun de Fresen schall ünner annern mit en ne’en arbeitsfre’en Fierdag an’n Pingstdingsdag würdigt warrn, den Dag vun de freesche Freeheit. Besünners will se sik ok dorför insetten, dat de Freeslannen över sik sülvst bestimmen un sik sülvst verwalten dröfft. Se wüllt geern en Regionalparlament för de Freeslannen hebben, dat dat Entscheidungen maken wedder neger an de Minschen in de Region ranhaalt. De Partei hett dorför den Plaan, dat de Landkreise Auerk, Leer un Wittmund mit de Stadt Emden en Grootkreis Oostfreesland billen schöölt. Tosätzlich schall disse Grootkreis mit de Stadt Willemshaven un den Landkreis Freesland ene Region Freesland billen.

Annere Themen, för de sik de Partei stark maken deit, sünd regionale Weertschop un de Küstenschutz.

An'n 7. Mai 2023 hett sück de Partei uplööst, wiel se nich mehr noch Liddmaaten harr un dordör nich mehr politisch hanneln kunn.

Weblenken

• Websteed vun De Fresen (hoochdüütsch, plattdüütsch, freesch)