Carl Gustav Wrangel

Carl Gustav Wrangel (Graf vun Salmis; * 13. Dezember 1613 up Skokloster bi Uppsala; † 5. Juli 1676 up de Insel Rügen, de dormols to Sweden tohören dö) weer Feldmarschall un Staatsmann vun Sweden.

De Fomilie

Sien Vadder Hermann von Wrangel (1585-1643) weer ok al Feldmarschall. Bobenhen hett he as Generoolgouverneur dat Livland för Sweden regeert.

Suldoot

Carl Gustav is al 1627 Suldoot wurrn. Dat weer in de Tiet vun den Dartigjöhrigen Krieg. Toeerst hett he för sien König Gustav II. Adolf in Dütschland mitstreden. As de König 1632 bi Lützen fullen is, hett he ünner Bernard von Sassen-Weimar un ünner Johan Banér deent.

Karriere

1638 wurr he to’n Generalmajor mookt. Siet 1657 weer he Rieksadmiral, un 1660 hett he, as Generoolgouverneur in Pommern för de Sweden regeert, just so, as sien Vadder dat in Livland doon harr. Pommern höör dormols noh Sweden to.

Freden vun Habenhusen

1666 leeg he mit siene Suldoten vör de Stadt Bremen un woll ehr innehmen. Bremen weer dormols, tominnsten vun’n Nomen her, de Hööftstadt vun dat Arzbisdom Bremen. Dat is dat Land twuschen Elv un Werser. Düt Land höör dormols ok to Sweden to, bloß de Stadt Bremen nich. Dat woll Wrangel ännern, man he hett dat nich schafft.

Dor möß he denn an’n 15. November 1666 den Freden vun Habenhusen mit de Bremers moken.

Leste Johren

1674 weer Sweden in’n Krieg gegen Brannenborg un Wrangel weer böverste Feldherr. In düsse Tiet hett sien Stiefbroder Waldemar von Wrangel de Slacht vun Fehrbellin gegen den Kurfürsten vun Brannenborg verloren. He weer süms ok dorbi, konn ober nich mitmoken bi de Slacht, weil he krank weer. In dat sülbige Johr hett Wrangel in sien Deenst as Suldoot Bott geben. 1676 trock he sik torüch noh Rügen un dor is he denn ok sturben.

Dat hett bit in’n November 1680 duurt, datt Wrangel denn amenn in Stockholm beerdigt wurr. De König weer dorbi. Wrangel hett ünner veer Königen vun Sweden deent.

Weblenken

Carl Gustav Wrangel. Mehr Biller, Videos oder Audiodateien to’t Thema gifft dat bi Wikimedia Commons.