Homo erectus
Homo erectus (latyn vöär de rechtupgånde menske) was ne menskachtige wat tüsken 1,9 miljoon en 140.000 jår weaderümme leavden tydens et Pleistoceen. Homo erectus was de eyrste menskelike vöärolder den as sik oaver Eurasie verspreiden, van et iberisk skyreiland töt an Java an to. Ümdat se vöär et eyrste in Asie untdekked sint, nöömt se se in Asie vake H. erectus sensu stricto (in strikte sinne) en dee van elders H. erectus sensu lato (in rume sinne). De Homo erectus dee in Afrika vünden sint, lyket nåkommelingen van verskillende menskelike soorten, sou as H. heidelbergensis en H. antecessor en den eyrsten wördt vake ouk anweasen as rechtstreyksen vöärolder van de neanderdalers, denisovanen en uuteandelik ouk de moderne menske. Asiatiske Homo erectus köänet vöärolden weasen van de Homo floriensis en ouk Homo luzonensis. Dårümme is et lastig vast te stellen wonneyr as se precys uutstörven sint. Ouk gevt et noch verskillende vöärstelde undersoorten, dee mangs wal en mangs nit erkend wordet. De 'jungste' düdelik herkenbåre Homo erectusfossilen sint de Solo van Java, rund 117.000 töt 108.000 jår old.
De soarte leavden vöäral nå Homo habilis, mär et kan good weasen at beide soarten tydens ne wisse tyd tegelyke leavden en ne noch unbekende gemeynskappelike vöärolder hebbet.
De rechtupgånde menske had nen menskelike gang en lyfsverholdingen en was de eyrste menskelike soorte med een plat gesichte, uutsteakende nöäse en verminderd lyvshår. Se hadden uuteynloupende harsengrötte afhangelik van de gruup, tüsken dee 546 en 1251 cc. De harsens warren vro in et leaven al volgroid, wårmed se ne körtere kindertyd kenden en minder olderbeskarming as de moderne menske. In döärsneyde warren se tüsken 146 en 185 centimeter grout en wöägen tüsken de 40 en 68 kilo. Manslüde en vrouwlüde warren ungeveyr eaven grout, wat up monogamy kan wysen. Huudsklöör hüng möägelik af van de steade wår as se woaneden.
An de H. erectus wördt de Acheuleaan-steynen gereydskappen toskreaven. Se warren når vermoden de eyrste menskachtige dee vüür gebruken kon, in organiseerde grupen up jacht güng, sorgden vöär seke en gewunde gruupsgenouten, de seyen bevården en ouk möägelik künst makeden. Vindsteades låtet vake seen dat se gröttere deers atten so as koachtigen en olifanten. De houge afhangelikheid van vleisk had te maken med de toneamende harsenümvang. Ouk al warren de grupen düdelik socialer as vöärgånde menskachtigen, et is nit düdelik of de rechtupgånde menske küren konde. Toch wördt der links en rechts wal annöämen dat se ne ård grundspråke hadden.
Lyfsbeskryving
[bewark | bronkode bewarken]höyvd
[bewark | bronkode bewarken]![](http://upload.wikimedia.org/wikipedia/commons/thumb/0/03/Skull_pekingman.jpg/180px-Skull_pekingman.jpg)
De rechtupgånde menske had een plat gesichte in vergelyking med vrogere menskachtigen, ne verdikkede ougenbrouwe en ne laege platte skeadel. Ouk hadden se saggitaal, frontaal en koronaal verdikkede rände (wår de fontanellen van kinder an mekander groit). Dat wist up ne verdikking van de harsenpanne. Toch is dat up CT-skäns nit te seen. Vöäral et stükke an de achtersyde van de skeadel an de underkante, de squama occipitalis, is upmarkelik vöäle dikker as by moderne mensken.
De meyste fossilen låtet seen dat de Homo erectus de eyrste menske was med ne vöäruutsteakende nöäse. Geleyrden meynet dat dat was üm vucht vaste te holden by et inådemen van dröygen lucht. De amerikaanske psychologe Lucia Jacobs meynet dat de vöäruutstånde nöäse was üm ruukrichting te bepålen üm beater te navigeren en oaver langere streaken te migreren. In döärsneyde hevt de rechtupgånde menske ne harseninhold van ungeväär 1000 cc, al sint der in Georgie, Kenia en Etiopie kleinere fossilen evünden. De meyste Homo erecti hadden harsens tüsken de 546 en 1251 cc, wat grötter is as de variaty in mensken en chimpansees, mär minder as dat van gorilla’s.
Up de tanden had de Homo erectus de dünste låge glasüür van alle menskachtigen in et Plio-Pleistoceen. Glasüür sorget at tanden nit breaket up hard eaten, mär maket tegelyke dat der nit döär steavig eaten hen te snyden is. Net as eyrdere menskachtigen had hee nen dikkeren kennebak as alle hüdige mensken en ape. Den kennebak weaderstünd draiing by hard byten en kunde düs grouten bytkracht lyden. Toch is noch altyd nit düdelik wårvöär. De kusen hebbet ouk vaker pütjes as dee van H. habilis, wat der up wist at H. erectus meyr brous voder at. Allens düdet der up at H. erectus beater döär steavig voder snyden kunde as byten up hard eaten. Dårmed wör et anbud van wat se möägelik kunden eaten ouk kleiner, wat angevt dat se meyr gereydskappen güngen gebruken.
Lyf
[bewark | bronkode bewarken]Net as moderne mensken was der by H. erectus flink wat underskeid in grötte. De vulwassenen warren tüsken de 146 en 185 cm grout en tüsken de 40 en 68 kilo swår. Et verskil sat em vake in leavümgeaving, starvte en vodingsgewoandes. Net as by mensken mär nit as by groute ape is der nauweliks verskil tüsken manslüde en vrouwlüde, al is der nit vöäle fossilkennis.
De rechtupgånde menske had ungeveyr de selvde lidmåtsverholdingen as moderne mensken, wat kan düden up menskachtige beweagingen. Evündene H. erectus-spoars in Kenia wyset up ne menskelike louppas. De skolders leaken ouk vöäle up dee van de menske en lyket te wysen up de künde üm spears te smyten. Den rüggengråt had ne menskachtige krumming en eavenvölle warvels.
Et is nit düdelik wanneyr et lyfshår minder wör in den menskeliken stamboum. Genetisk undersöök wist up een dunker vel (houge aktiviteit in de melanocortine 1-untvanger), sou’n 1,2 miljoon jår terügge. Dat kan wysen up hårlousheid, wårdöär et vel bloutsteld wör an skadelike UV-stråling, wat dunker vel nen noudsaak makeden. Ne andere verklåring is dat de Homo erectus sou’n 3 miljoon jår terügge skaamlüse kreag van gorilla’s en dat versoorting van gorillalüse når menskenlüse enkel kunde döärdat de menskelike kante rund dissen tyd de meyste höäre kwyt was. Et kan good weasen dat blout vel pas in et pleistoceen nådeylig wör, ümdat de toneamende helling van de wearld-as (wat ouk de ystyd veroorsakeden) sorgden at der meyr sünnestråling up de aerde dale köm. Dat solde dan beteykenen at Australopitekus de eyrste hårlouse was. Mär dee leavden dan weader up hougere grunden wår et kölder was. Üm wårm te blyven hadden se hår nöydig. Noordeliker leavende Homo erectus-volker untwikkelden möägelik lechter vel üm Vitamine D-tekort up te vangen. By en evünden fossil uut Türkye wör et eyrste geval van tuberculose meningitis untdekked. Dit kümt vake vöär by lüde med dunker vel dee in noordeliker streaken woanet en dårdöär een Vitamine D-tekort untwikkelt. De kaalheid likt verband te holden med sweaten, mär en verminderd antal parasiten en seksuäle köäse kan der ouk med te maken hebben.
Kultuur
[bewark | bronkode bewarken]Underlinge verholdingen
[bewark | bronkode bewarken]Et eanigste fossile bewys vöär grupsforming kümt van veer vindsteades in Ileret in Kenia. Dår sing 97 vootafdrükken van 1,5 miljoon jår old evünden, van tenminsten 20 lüde. Eyne van de spoargrupen likt up grund van de grötte vulleydig van kearls te weasen. Dat mag der up wysen dat see med ne specifike taak gangs warren, sou as jagen of eaten söken, of grenswachtloupen. As dat sou is, solde dat ouk angeaven dat de Homo erectus taakverdeyling kenden vöär kearls en vrouwlüde. Dat underskeidet menskensamenleavingen van ape en andere sociale deers. By moderne mensken dee noch as jager-gadderaars leavet, gåt de kearls vake up de gevöärlike jacht når groute deers, terwyl as de vrouwlüde en kinder rundgåt üm vrüchten en planten te söken.
De harsens van de rechtupgånde menske warren eyrder vulgroid as van de moderne menske. Dat wil seggen dat se rapper vulwassen warren en dat se minder tyd kwyt warren an upvoding en kindersorg.
Ümdat de Homo erectus-männekes en -vröwkes når verholding eaven grout warren, neamt geleyrden an dat se monogaam warren. Verminderde geslachtelike lyvsverskillen in aapachtigen wordet vake in verband ebrachted med dit voordplantingsstelsel. Of et echt sou is, blivt giswark. Grupen van andere apesoorten beståt meysttyds uut eyn männeke en nen heylen koppel vröwkes. As de H. erectus monogaam was, kan dat veroorsaked weasen döär ne toname in lyfsümvang van de vrouwlüde, wat ouk ne verandering in vrüchtbårheid medbrachten. Dårmed wör ouk de rulle en et gedrag van erectusvrouwlüde anders en kunden männekes gin harem meyr underholden.
Eaten
[bewark | bronkode bewarken]Gröttere harsens bedüdet vake meyr vleisk as eaten en dårdöär meyr kaloryinname. Et kan ouk good weasen dat de ingewanden van de H. erectus, dee vöäle energy nöydig hadden, kleiner wörden. Groute ape hebbet gröttere ingewanden üm vet te können maken uut gistende planten. Et plantårdige wör vervöngen döär deerlik vet, wårdöär meyr energy når de harsengroi kunde. Dårdöär groiden in döärsneyde de harsenümvang, terwyl as se deselvde kaloryinname bleaven nöydig hebben as öäre vöärolden. De rechtupgånde menske mag de eyrste eweasd weasen dee jaagden en versamelden, üm de vergroutede vråge når vleisk an te können. Üm et wark an te künnen, musten se wal samenwarken, jagen en versamelen en uuteandelik voodsel deylen.
Up vindsteades van de H. erectus sint eatensresten vünden van olifanten, nöäshoorns, nylpaerde, koachtigen en swynen. Der wörden vöäle eatensresten vünden, wat kan düden up voodseldeyling en upslag vöär later bruuk. Et likt der up dat H. erectus slim afhangelik wör van grout wild. De verdwyning van de H. erectus wördt rechtstreyks koppeld an et uutstarven van de eurasiatiske woldolifant in et Middenousten. Vanselvs hüng et voodsel slim af van de ümgeaving wårin as se woanden. Up ne vindsteade in Israel atten de inwoaners 55 soorten vrüchten, gröönten, söäde, nöäten en knullen. Ouk deaden se wat planten röysteren üm se eatbår te maken. Wyders atten se noch kruupdeers, amfibieen, vöägel, waterdeers en viske, nöäst skildpädde en krokodillen.
Technology
[bewark | bronkode bewarken]Gerey
[bewark | bronkode bewarken]![](http://upload.wikimedia.org/wikipedia/commons/thumb/8/87/Canto_tallado_2-Guelmim-Es_Semara.jpg/220px-Canto_tallado_2-Guelmim-Es_Semara.jpg)
![](http://upload.wikimedia.org/wikipedia/commons/thumb/1/16/Bifaz_cordiforme.jpg/220px-Bifaz_cordiforme.jpg)
De acheuleaanske steynbewarkingen wordet an H. erectus toskreaven. See warren de eyrsten dee steynsplinters gröäter as 10 cm gebröäken as vuustbylen, messen en klöyvers. Se warren gröäter en swöärder, mär hadden skarpere, beitelde kanten. Et is anneamelik dat se vöär meyrdere saken bruked wörden, sou as holt hakken, vleisk snyden en planten vermålen. In 1979 meynden den amerikaansken paleontoloog Thomas Wynn at der vöär et gebruuk van de acheuleaanske technology insicht en vöäruutdenken nöydig warren. Dårmed was et ingewikkelder as de Oldowan-technology, wårby keien ginne standaardform, grötte, döärsneyde en symmetry hadden. Dårümme meynden hee dat der weinig verskil in basisintelligenty is tüsken H. erectus en de hüdige menske. De lätste 300.000 jår solde der kultureel weinig veranderd weasen nårgelang de toneamende intelligenty. Toch blikt uut en eynjöärig H. erectus-fossil dat der gin uutgebreide kindertyd was üm de harsens meyr te untwikkelen en H. erectus dårdöär laegere verstandelike warkkracht had. Up en antal vindsteydes sint vuustbylen by höype vünden, wårskynlik ümdat de steydes meyrdere geslachten bewoand wörden.
De öldste vindsteyde (1,76 miljoon jår old) van acheuleaanske technology is Westturkana in Kenia. Up deselvde steydes wör ouk oldowangerey vünden. De beide technologyen bestünden skynbår nen set nöäst mekander. De öldste vindsteyde van acheuleaanske technology buten Afrika is houguut 1 miljoon jår old, wat angevt dat et pas nå ne tweyde uuttocht uut Afrika verbreid rakeden.
Up de vindsteyde Sangiran up et indonesiske Java en Trinil makeden H. erectus gerey van skelpen. En ne sleypene ivoorpünte van 65 cm van 350.000 jår old uut Bilzingsleben in Düütskland was möägelik deyl van nen vöälen grötteren lans. Up verskeidene afrikaanske en chineeske steydes sint bolsleypene steynder vünden med ne döärsneyde van 6 töt 12 cm. Dee köänet gebruked weasen as bolas (ne ård smytslinger). As dat sou is, solde dat düden up kennis van touw- en koordslagerye.
Vüür
[bewark | bronkode bewarken]An H. erectus wördt as eyrste menskachtige et vüürmaken todichted. Wanneyr se dat precys untdekkeden is nit düdelik, ümdat resten van kampvüren nit good bewård blyvet en seaker gin dusenden of miljonen jåren. De öldste vüürsteades stamt uut Koobi Fora in Kenia (1,5 miljoon jår leaden) en de Wonderwerkgrotte in Süüdafrika van 1,7 miljoon jår old.
De geleyrden meynet dat de Homo erectus lange tyd brandende täkke van bestånde vüren en branden (döär blikseminslag of hette) mednöäm de grotten in. Dan underhölden se et vüür sou lange möägelik of deaden der med sou lange et wolde. Vöär et underholden van vüür solden se mütten weaten wat langsaam brandt, sou as dryte van deers. Vanaf 400.000 jår terügge sind oaverblyvselen van vüür upvallend vaker terügge te vinden. Dat kan der up wysen dat se et beater ‘in de vingers’ kreagen of dat se et töt disse tyd nöämen sou as et köm. Et kan ouk good dat vüürstarten en paar mål en verspreid oaver gemeynskappen uutevünden en vergeaten wör, in steade van ne enkele steade van uutvinden en spreid oaver de wearld. Den öldsten haerd, van 700.000 jår old, is evünden in Gesher Benot Ya’aqov in Israel. Dår is ne vüürplaatse van meyrdere lågen evünden, kortby water. Dat kümt by natüürbranden nit vöär.
De nye künstmåtige lechtbrunne hölde de H. erectus möägelik länger wakker. Moderne mensken sint in döärsneyde ungeväär 16 uur wakker, terwyl as andere aapachtigen meysttyds van sünsupgang töt -undergang wakker sint. Disse tovoogde waaktyd gavven H. erectus tyd en kans üm sociale bände te verstarken. Dårümme wördt vüürmaken vake in verband ebrachted med et untstån van språke. Et vüür hölde ouk rouvdeers up afstand, wårdöär H. erectus up de grund kunde slåpen in steade van in böyme.
In de Ystyd når Europa trekken likt enkel möägelik as se vüür kunden maken. Mär bewys vöär vüürgebruuk is der upmarkelik genog nit vöär 400.000 jår leaden. As se gin vüür hadden, kunden se ouk nit wårm blyven, rouvdeers afskrikken en voodsel klårmaken. Ouk löchtet en dundert et döär mekander minder in et noorden, wårdöär der minder natüürbranden warren. Et kan good dat se enkel up bepålde steades in et landskap vüür underholden kunden en wyd van huus eaten klårmakeden en düs de bewyse vöär vüürmaken en woanen flink uut mekander leaden. Se köänet ouk good in de wöärmere tyden tüsken ystyden når et noorden trökken weasen.