Saxifraga caesia
|
|
Chest artícol a l'è scricc in Lumbàrt, ortograféa orientàl unificàda. |
| Saxifraga caesia | ||||||||||||||
|---|---|---|---|---|---|---|---|---|---|---|---|---|---|---|
 | ||||||||||||||
| Classifigazion sientífiga | ||||||||||||||
| ||||||||||||||
| Nomm binomial | ||||||||||||||
| Saxifraga caesia L. |
Saxifraga caesia l'è 'na spéce de piànta erbàcea perène che fà part de la famìa botànica de le Saxifragaceae.
Descrisiù
[Modifega | modifica 'l sorgent]Fùrma Biològica: Ch pulv - Camèfite pülvinàde. Piànte che g'ha böcc che pàsa l'envéren postàde a mìa de piö de 20 ghèi del teré e che g'ha portamènt a cüsì.
L'è 'na piànta erbàcea perène de dimensiù pesène (3÷10 ghèi) che fùrma dei cüsinècc (pülvì) bèi spès furmàcc de tacc gambì tacàcc bèi strècc entra de lur e e de le sò fòie picinìne picinìne che se 'ncaàla giüna sùra l'ótra, de 1÷1,2 mm x 3-5 mm, co la làmina linear-oblónga, 'ntréga, sub-gösa, encürvàda sö töta la longhèsa, co la part ensìma che àrda 'n zó piö làrga e töta piéna de puntì de 'ncrostasiù de calcàr, de culùr vert-celèst, co l'òrlo traslöster.
De chèsti pülvì che rèsta bèi tacàcc a la préda 'ndóche i crès, tat che i pöl véser töcc fò per mös•cc, se destàca i gambì dei fiùr, lónch enfìna a 10 ghèi, vülüdàcc, conde quach pelacì ghiandulùs sparnegàcc, che pórta póche fòie ràre e bèle destacàde de giöna co l'ótra.
I fiùr, ermafrudìcc, i è reünìcc endèna 'nfiurescènsa de póch elemèncc (2÷5 fiùr). I g'ha i sépali che g'ha 'na pelüria fina fina, dò ólte piö cürcc dei pétali. La coròla l'è furmàda de 5 pétali, spatolàcc, biànch, de 3÷4 x 4÷6 mm, lónch 2÷3 ólte i décc dei calizì. I fiurés de zögn a óst.
El fröt l'è 'na càpsula.
Habitat
[Modifega | modifica 'l sorgent]Se la tróa dré a le sfrizidüre de le préde calcàree, dei 1400 ai 2.700 méter söl leèl del mar.
Distribusiù e conservasiù
[Modifega | modifica 'l sorgent]L'è distribüìda sö 'n pó töta la cadéna de le Alpi e 'na part dei Apenìni. L'è cunsideràda 'na spéce ràra e per chèsta rizù l'è prutigìda a leèl regiunàl.
Bibliografìa
[Modifega | modifica 'l sorgent]- PIGNATTI S., Flora d'Italia, 3 voll. Edagricole, Bologna 1982
- CONTI F., ABBATE G. ALESSANDRINI A. BLASI G., An Annotated Checklist of the Italian Vascular Flora, Roma, Palombi editori, 2005
- MAINARDIS G., Atlante illustrato della Flora del Parco delle Prealpi Giulie, Resia (UD) Ente Parco Naturale delle Prealpi Giulie
- FERRARINI E., MARCHETTI D., Prodromo alla Flora della Regione Apuana, Accademia Lunigianese di Scienze Giovanni Capellini , La Spezia, 1994
- ANSALDI M., MEDDA E., PLASTINO S., I fiori delle Apuane, Mauro Baroni & c. s.a.s., Viareggio 1994