San Rœummo de Zena

ZE-P

Sta paggina chie a l'è scrita in zeneize, co' ina grafia tipo quella do Prian do 1745

San Rœummo (ò Rommolo) de Zena, (ciu antigamente Rœummoro), V sec. ca., ottavo vesco de Zena, sucessô de san Scî, santo patron da çitæ de Sanremmo.

Vìtta

No gh'emmo goæi notiççie in sce l'eppoca ch'o visse. L'unnica biografia anonnima do X sec. a ne conta ch'o fu deposto inte 'n sarcoffago de tuvio, rente o biao Ormisda, inta cripta de san Scî a Sanremmo, e da-a dataçion de quello sarcoffago se poriæ remontâ a-o V seccolo.

O sucedette insce-a carêga vescovî de Zena a-i groioxi san Feliçe e san Scî. Tratti caratteristeghi do so ministeio pastoâ fun a bontæ, a caitæ, e a capaçitæ d'apaxentâ e discordie.

Fando vixita à l'estremmo ponente da Ligurria, che à quelli tempi o l'ea parte da diocexi de Zena, pe-a precixon à Villa Matutiana, l'odierna Sanremmo, o vègne a morte e o fu sepelio inta gexa de san Scî, vegnindo subbito ogetto de gran veneraçion pe-i so miâcoi.

Segondo a tradiçion locâ sanremasca o Rœummo o saiæ cresciuo da quelle bande, o fu quindi fæto vesco de Zena, e dapœu, pe sfuzî a-e invaxoin longobarde o s'aretiò inte l'entrotæra de Sanremmo, inte l'odierna fraçion de San Rommolo, inte 'na grotta (in sanremasco bauma), ch'a vègne scito de pelegrinaggio e dond'o saiæ morto.

Do 930, essendo Sabatin vesco de Zena, a caoza de scoraje di Sæxin longo a Rivea de Ponente, e reliquie do santo fun solennemente translæ via mâ, sotta scorta, a Zena e deposte inta cattedrâ de San Loenço donde into 1188 ghe fu fæto 'na ricogniçion canonnega.

Pe tutto l'Ato Medioevo san Rœummo o fu venerao comme patron da-i matuçien, che gh'atriboivan di gren prodiggi pe-a difeiza de quelle tære da-i invaxoî strangê, e pe questo o fu raprezentao vestio da vesco e co-ina spâ desgueinâ in man. Tanta fu a veneraçion che do 980 decizan de cangiâ o nomme do paize in Civitas Sancti Romuli, ossæ "Çitæ de san Rœummoro", dapœu dita San Rœummo e infin Sanremmo.

A Zena ascì o fu molto venerao, segondo solo a san Scî. A so festa un tempo a se çelebrava o 13 d'otobre, giorno da so morte, ma ancœudì l'arçidiocexi de Zena a-o comemmora o 6 de novembre insemme a-i santi veschi Valentin e Feliçe.

Bibliografîa

(LA) Ferdinando Ughelli, Italia sacra sive de episcopis Italiæ, vol. 4, 2ª ed., Venessia, Apud Sebastianum Coleti, 1719.

Conligamenti esterni

(IT) San Romolo, in sce santiebeati.it. URL consultòu o 18 màrso 2021.
Parrocchia di San Siro: San Romolo, Vescovo di Genova, Patrono di San Remo, [1].