Sagep
ZE
|
Quésta pàgina a l'é scrîta in zenéize, segóndo a grafîa ofiçiâ |
| Sagep | |
|---|---|
 | |
| Stâto |  Itàlia
|
| Fórma de socjêtæ | Socjêtæ a responsabilitæ limitâ |
| Fondaçión | 12 de lùggio do 1956 a Zêna |
| Sêde prinçipâ | Zêna |
| Grùppo | Grafiche G7 s.a.s. |
| Persónn-e ciâve | Bruno Guzzo (prescidénte) |
| Setô | Editoriâle |
| Faturòu | 1.058.991 €[1] (2022) |
| Ùtile nétto | 3.617 €[1] (2022) |
| Dipendénti | 8[1] (2022) |
| Scîto web | www.sagep.it |
A Sagep (sìgla ch'a veu dî Società Arti Grafiche e Pubblicità, ofiçialménte Sagep Editori s.r.l.) a l'é 'na câza editôa zenéize, specializâ in scê àrte e a coltûa ligùstica, ch'a l'à a seu sêde into Palàçio Zórzo Döia in Ciàssa de Sàn Matê, into sestê do Meu[2].
Stöia
[modìfica | modìfica wikitèsto]A Sagep a l'é stæta fondâ da-o Romano Acquarone, da l'Eugenio De Andreis e da-o Filippo Peschiera a-i 12 de lùggio do 1965. Pe l'abandón da socjêtæ da pàrte do Peschêa e a mòrte de l'Acquarón do 1982, o De Andreis e a seu fìggia Alessandra àn gestîo da lê l'inpréiza scìnn-a-i ànni Novànta. Inta primavéia do 2006 gh'é stæto 'na diciaraçión de faliménto ma, into méntre, a Sagep a l'é stæta acatâ da l'inprenditô Stefano Vablais, ch'o l'à decîzo d'anâ avànti co-e pubricaçioìn de pónta de l'inpréiza, sàiva a dî e goìdde turìstiche, tra e ciù avoxæ into mercòu locâle, comensàndo a pubricâne inte de âtre léngoe ascì[3].
A Sagep a l'é de lóngo specializâ inta pubricaçión de sàggi in scê matêie ligùsteghe, ch'én stæte o sogètto de bén bén de scrîti (cómme a colànn-a Guide turistiche e d'arte), co-în'atençión particolâ in sciâ stöia, l'architetûa, l'anbiénte, e tradiçioìn e a cuxìnn-a lìgure, prezentàndo in ciâve de aprofondiménto ànche di ànbiti diferénti de l'antropologîa colturâle da naçión lìgure. Tra e colànn-e dedicæ a-a Ligùria gh'é, in particolâ, Liguria in parole povere, SAGEP e Genova, Genova città inaspettata, Liguria regione inaspettata, Weekend, Storie di Liguria, Scrittori di Liguria, Genova e la musica e i Manuali Sagep[4].
Tra i tèsti ciù avoxæ se peu aregordâ 'n'inportànte monografîa in sciô Françésco Toresàn, fìggio de l'Andrîa (sêuxo de l'Àldo Manùnçio) e, insémme a-o seu fræ Federîgo, diretô da ciù famôza stanpàia inta stöia de l'editorîa[5]. Tra i lìbbri ch'àn avûo ciù sucèsso gh'é ancón, prezénpio, La pittura a Genova e in Liguria, a Descrizione della città di Genova da un anonimo del 1818 e a Guida Sagep di Genova, ch'a l'à registròu ciù de trexentomîa còpie vendûe[4].
Inte l'ànno 2003 a Sagep a l'à conlaboròu co-o Muzêo de Sant'Agostìn inta realizaçión de 'na mòstra de fotografîe in sce l'evoluçión edilìçia da çitæ, fæta dêuviàndo l'archìvio fotogràfico de l'editô[6]. Pe de ciù, a câza editôa a cûa 'na revìsta, ciamâ pròpio Archivio, dónde l'é pubricòu ògni tréi méixi 'na pàrte de st'arecugéita chi[4]. A Sagep a l'à stanpòu ascì de bèlle òpere ch'én stæte promòsse da aministraçioìn ò énti pùbrichi, cómme o volùmme pe-i çìnquant'ànni do Salón nàotico de Zêna[7][8].
Tra o 1984 e o 1990, a Sagep a l'é stæta tra i editoî ch'àn pubricòu a revìsta, scrîta in léngoa ingléize e in italiàn, Architettura spazio e società, ch'a sciortîva ògni tréi méixi. Tra e âtre pubricaçioìn periòdiche stanpæ da-a câza editôa zenéize se peu ancón aregordâ l'Indice per i beni culturali del territorio ligure, pò-u perîodo 1976-1982[4].
A-a giornâ d'ancheu, con l'intrâ do 2012 into grùppo Gràfiche G7, a Sagep a stànpa ciù de novànta pubricaçioìn a l'ànno[9].
Nòtte
[modìfica | modìfica wikitèsto]- ↑ 1,0 1,1 1,2 Bilàncio d'ezercìçio 2022
- ↑ (IT) Scîto ofiçiâ, in sce sagep.it. URL consultòu o 24 agòsto 2024.
- ↑ (IT) Costantino Malatto, Sagep, morte e rinascita 'Si riparte dalle guide', in sce ricerca.repubblica.it, 9 màzzo 2006.
- ↑ 4,0 4,1 4,2 4,3 (IT) SAGEP Libri & Comunicazione - Genova (GE), in sce fondazionemondadori.it. URL consultòu o 24 agòsto 2024.
- ↑ (IT) Annaclara Cataldi Palau, Gian Francesco d'Asola e la tipografia aldina. La vita, le edizioni, la biblioteca dell'asolano, Zêna, Sagep, 1998, ISBN 88-70-58679-0.
- ↑ (IT) La città per immagini dall' Archivio Sagep, in sce ricerca.repubblica.it, 26 novénbre 2003.
- ↑ (IT) Pagine di mare e di naufragi, in sce ricerca.repubblica.it, 30 seténbre 2010.
- ↑ (IT) Salone, i miei primi cinquant'anni, in sce ricerca.repubblica.it, 2 òtôbre 2010.
- ↑ (IT) Chi siamo, in sce sagep.it. URL consultòu o 24 agòsto 2024.
Âtri progètti
[modìfica | modìfica wikitèsto]
Wikimedia Commons a contêgne di files in sce Sagep
Ligàmmi de fêua
[modìfica | modìfica wikitèsto]- (IT) Scîto ofiçiâ, in sce sagep.it. URL consultòu o 24 agòsto 2024.
| Contròllo de outoritæ | VIAF (EN) 215145003311361301116 · WorldCat Identities (EN) 215145003311361301116 |
|---|