FIFA
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
![](http://upload.wikimedia.org/wikipedia/commons/thumb/3/36/FIFA-Headquarter.jpg/220px-FIFA-Headquarter.jpg)
![](http://upload.wikimedia.org/wikipedia/commons/thumb/a/a8/World_Map_FIFA2.svg/220px-World_Map_FIFA2.svg.png)
De FIFA (voloet (Frans) Fédération internationale de Football Association) is 't wereldwied regulerend orgaon veur voetbal, strandvoetbal en zaolvoetbal. De FIFA woort in 1904 opgeriech veur de continentaol Europese sportboonde vaan Nederland, Belsj, Zwede, Denemarke, Duitsland, Fraankriek, Zwitserland en Spaanje. De nationaol boonde vaan 't Vereineg Keuninkriek (Ingeland, Sjotland, Wales en 't nog vereineg Ierland) slote ziech korten tied later aon. Allewijl (2022) zien 211 nationaol boonde bij de FIFA aongeslote: zoe good wie alle zelfstandege len en nog diverse neet-zelfstendege territoria mèt eige voetbalèlftalle. De federatie is verdeild in e zèstal continentaol federaties: de AFC (Azië), de CFA (Afrika), de CONCACAEF (Noord- en Midde-Amerika zoewie 't Caribisch gebeed), de CONMEBOL (Zuid-Amerika), de OFC (Oceanië) en de UEFA (Europa).
De FIFA zörg veur de regels vaan 't voetbalspeul, die in oonderling euverlègk weure vasgestèld. Veraanderinge aon de regels mote centraol weure goodgekäörd. Ouch regelt ze 't Wereldkampioensjap hierevoetbal en damesvoetbal, die allebei um de veer jaor weure gehawwe. De organisatie hèlt ketoer in Zürich (Zwitserland). Sinds jaor en daag heet de FIFA 'ne bedinkeleke naom es bedrief boe 't groet geld regeert en boe corruptie aon de orde vaan d'n daag is. Veural d'n tied boe Sepp Blatter veurzitter waor (1998-2015) weurt sterk mèt sjendaole geassocieerd.