Dead Poets Society
Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
| Dead Poets Society | |
|---|---|
| Regie | Peter Weir |
| Productie | Steven Haft Paul Junger Witt Tony Thomas |
| Script | Tom Schulman |
| Hoofrolle | Robin Williams Robert Sean Leonard Ethan Hawke Josh Charles |
| Meziek | Maurice Jarre |
| Cinematografie | John Seale |
| Oetgebrach | 2 juni 1989 |
| Genre | drama |
| Lengde | 128 minute |
| Taal | Engels |
| Landj | Vereinigde Staote |
| IMDb-profiel | |
Dead Poets Society (Doeëj dichters maatsjappiej) is 'ne Amerikaanse film oet 1989 va regisseur Peter Weir. De muziek is va Maurice Jarre. D'r film wón 'ne Oscar vör bètste origineel filmscript.
Verhaol
[bewirk | brón bewèrke]D'r film sjpäölt zich aaf in 't internaat van de middelbaar sjoeël Welton in d'r sjtaot Vermont. Óp dis elitekóssjoeël werre jónges ópgeleid öm nao de bètste universitète oet de Ivy League te goeë oonder 't motto tradition, honor, discipline, excellence ('traditie, ieër, discipline, oetmuntendhèèd'). D'r docaent Ingels is 't vörige semester mét pensioeën gegange en John Keating, gesjpäöld dör Robin Williams is z'ne ópvólger.
Keating is èges ooch 'ne aod-lieërling va Welton en daagt, in taegesjtèlling töt de res van de docaente, z'n lieërlinge oet öm èges 'n waeërdsjaal te oontwikkele en neet vólgzaam die van de docaente of de owwersj te vólge. Centraal sjtèèt d'r Latiense sjpreuk Carpe diem of 'pluk d'r daag'. Zjuus wie Keating in ziene sjtudaentetied, beginne eenkel jónge oet de klas de Dead Poets Society, 'n club oeë ze gedichte laeze en sjrieve, mae ooch muziek make en plezeer haant. E gedich dat in d'r film ömer truukkeumt, is 'Captain, oh captain!' van Walt Whitman. Dit 'Captain' verwiest in d'r film nao d'r bewoonderde docaent John Keating.
Neil Perry, énge van de lieërlinge in de club en d'r ènige va hun dae oet e burgerlek milieu sjtamt, dreumt d'r van öm acteur te werre, mae dat maog e neet van ziene pap dae vindt dat e arts mót werre. E sjrieft zich tóch in vör 'n auditie vör 'n bewèrking van 't toneelsjtök A Midsummer Night's Dream en kriet de hoofdról, Puck. Nao de vörsjtèlling nèmt d'r pap Niel mèt nao hèèm en zaet 'm dat e nao 'n militair academie gèèt. Niel kan 't innerlek conflict tösje wat e èges wilt en wat ziene pap wilt en wat e ooch versjtèèt, neet överwinne en pleegt zelfmoord.
Pa Perry besjuldigt Keating d'r va dat haeë de raej is vör d'r zelfmoord en al flót wert 'n oonderzeuk ingesjtèld nao zieng lèsmethodes. D'r conservatieve directeur griept dis kaans öm Kaeting te oontsjloeë mèt twieë heng aa.
Pries
[bewirk | brón bewèrke]Dead Poets Society kreeg veer Golden Globe Awardnominaties: vör Bètste Regisseur, vör Bètste Dramafilm, vör Bètste Ról in d'r Dramafilm en vör Bètste Filmscript, mae d'r film verzilverde gènge van dis nominaties. D'r film wón waal d'r Oscar vör Bètste Origineel Filmscript. E kreeg in totaal veer oscarnominaties, de ander waore vör Bètste Acteur, vör Bètste Regisseur en vör Bètste Film. D'r film wón nog versjèjje aander internationaal pries vör Bètste Film en Bètste Script.