Nasiones Unida
![](http://upload.wikimedia.org/wikipedia/commons/thumb/2/2f/Flag_of_the_United_Nations.svg/220px-Flag_of_the_United_Nations.svg.png)
![](http://upload.wikimedia.org/wikipedia/commons/thumb/5/52/Emblem_of_the_United_Nations.svg/170px-Emblem_of_the_United_Nations.svg.png)
![](http://upload.wikimedia.org/wikipedia/commons/thumb/0/05/UN_General_Assembly_hall.jpg/220px-UN_General_Assembly_hall.jpg)
La Nasiones Unida (NU) es un organiza intergovernal con la taxe per promove coopera internasional e per crea e manteni ordina internasional. Un recambia per la Lega de Nasiones, cual no ia es produosa, la organiza ia es instituida a 24 otobre 1945, pos la Gera Mundal 2, con la gol de preveni un plu tan desacorda. A sua institui, la NU ia ave 52 statos-membros; Aora, on ave 193. La xeferia de la NU es en Manhattan, New York Site, e es estrateritorial (pd, lo no parteni a la SUA ma ata como un organiza autonom). Otra ofisias major es en Geneve, Nairobi, e Wien. La organiza es suportada par contribuis cargada e voleda de sua statos-membros. Sua goles inclui manteni pas e securia internasional, promove diretos umana, suporta developa sosial e economial, proteje la ambiente, e dona aida umaniste en casos de famion, desastre natural, e disputa militar. La NU es la organiza intergovernal la plu grande, la plu conoseda, la plu potiosa, e la plu representante en la mundo.
![](http://upload.wikimedia.org/wikipedia/commons/thumb/1/15/United_Nations_%28Member_States_and_Territories%29.svg/440px-United_Nations_%28Member_States_and_Territories%29.svg.png)
La constitui de la NU ia es desiniada a un confere entre april e junio 1945 en San Fransisco, e ia es suscriveda a 26 junio 1945 a la conclui de la confere. La constitui ia es realida a 24 otobre 1945, e la NU ia comensa. La gol de conserva pas ia es complicada en sua desenios prima par la Gera Fria entre la SUA e la Uni Soviet e alias. La organiza ia partisipa en atas major en Corea e la Congo, e ia aproba la crea de la stato de Israel en 1947. La cuantia de stato-membros ia crese multe seguente la descoloni vasta en la desenios de 1960, e par la desenio de 1970, sua bujeta per programes per developa sosial e economial ia deveni multe plu grande ca sua spende per manteni pas. Pos la fini de la Gera Fria, la NU ia comensa misiones major militar e per manteni pas tra la mundo, con grados variosa de susede.
La NU ave ses organos major: La Asembla Jeneral, la Consilia de Securia, la Consilia Economial e Sosial, la Secreteria (per furni studias, informas e laborerias nesesada par la NU), la Corte Internasional de Justia, e la Consilia de Dirije de Teritorios (no ativa de 1994). Ajentias de la NU inclui la Banco de Mundo, la Organiza de Sania Mundal, la Program de Comeda Mundal, La Organiza de Educa, Siensa, e Cultur de la NU (UNESCO), e la Reserva Internasional per Enfantes de la NU (UNICEF). La ofisior la plu importante es la Secretor Jeneral, la rol de 2017 de la politiciste e diplomata portuges, António Guterres.