Gemini-Programm

De Gemini-Programm war nom Mercury-Programm den zweete bemannte Raumfaartprogramm vun den USA. Zil vum Gemini-Programm war d'Entwéckele vu Methoden an Technologie fir den Apollo-Programm. A sengem Kader goufen 1965 an 1966 zéng bemannt Raumflich gemaach, bei deenen d'Astronauten ënner anerem déi éischt amerikanesch Baussebordasätz trainéiert hunn.

D'Strategie

Gemini gouf aus der Nout gebuer, woubäi et der NASA méiglech war, doraus eng Dugend ze maachen. No der Astellung vun de Mercury-Flich, dat war relativ kloer, géif e Lach vun dräi bis véier Joer entstoen, bis d'Apollo-Missiounen ufänke géifen. Wäertvoll Joren, déi dréngend gebraucht géifen, fir déi erfuerderlech Technologien, z. B. Kopplungsmechanismen, Liewenserhalungssystem, EVA-Kostümer asw., auszeprobéieren. Aus dësem Grond war am Ufank geplangt, de Mercury-System zu engem Raumschëff fir zwéi Mann ëmzebauen, genannt Mercury Mark II. De Virdeel hätt dora geleeën, duerch Réckgrëff op d'vireg Technik Entwécklungskäschten ze spueren an d'Zäit bis zum Ufank vum bemannten Apollo-Fluchprogramm sënnvoll iwwerbrécken ze kënnen. Déi wiesentlech Ännerungen hätten am Abau vun engem zweete Sëtz, der Montage vun enger leeschtungsstaarker Manövréiereenheet an dem Asaz vun enger Uewerstuf déi et scho gouf, als Docking-Attrappe bestanen.

Gemini steet am Laténgesche fir d'Stärebild Gemini (Zwilling), woumat den Numm sech op dat zweesëtzegt Raumschëff an d'Rendez-vousmanövere bezitt. Offiziell krut de Programm säin Numm den 3. Januar 1962, nodeem am Dezember 1961 ëm Virschléi gefrot gouf. Den Numm Gemini gouf vun zwou Persoune virgeschloen.

D'Astronauten

Fir d'Ënnerstëtzung vun deene schonn ausgebillte Mercury-Astronauten hat d'NASA sech den 18. Abrëll 1962 entschloss, fënnef bis zéng nei Astronauten ze rekrutéieren, wourop sech 253 Kandidate gemellt hunn.

De 17. September 1962 gouf d'Grupp 2, déi aus néng Astronaute bestanen huet, der Ëffentlechkeet virgestallt. Dëst waren Neil Armstrong, Frank Borman, Charles Conrad, James Lovell, James McDivitt, Elliott See, Thomas Stafford, Edward White an John Young.

D'Auswiel vun der drëtten Astronautegrupp hat de 5. Juni 1963 mat enger weiderer Ausschreiwung ugefaangen. D'NASA huet déi 14 erfollegräich Kandidaten den 18. Oktober 1963 virgestallt: Edwin Aldrin, William Anders, Charles Bassett, Alan Bean, Eugene Cernan, Roger Chaffee, Michael Collins, Walter Cunningham, Donn Eisele, Theodore Freeman, Richard Gordon, Russell L. Schweickart, David Scott an Clifton Williams.

Domat war d'Zuel vun den aktive Astronaute fir d'Programmer Gemini an Apollo op 27 geklomm, well d'Mercury-Astronauten Glenn, Carpenter a Slayton aus verschiddene Grënn fir d'Gemini-Programm net zur Dispositioun stoungen.

Den Theodore Freeman war den 31. Oktober 1964 bei engem Fligerongléück gestuerwen. Den Elliot See an den Charles Bassett, déi als Crew fir d'Gemini 9 virgesi waren, koumen den 28. Februar 1966 och bei engem Fligerofstuerrz ëm d'Liewen. De Virgil Grissom, den Edward White an de Roger Chaffee sinn de 27. Januar 1967 bei der Apollo-1-Katastroph gestuerwen, an de Clifton Williams war de 5. Oktober 1967 verongléckt.

Bemannt Missiounen

Missioun	Start	Landung	Dauer	Crew	Ziler	Bemierkung
Gemini 3	23. Mäerz 1965	23. Mäerz 1965	4h 52min	Virgil Grissom, John Young	éischten 2-Mann-Fluch vun der USA
Gemini 4	3. Juni 1965	7. Juni 1965	4d 1h 56min	James McDivitt, Edward H. White	éischte Baussebordasaz (White) vun der USA
Gemini 5	21. August 1965	29. August 1965	7d 22h 55min	Gordon Cooper, Charles Conrad	Aussetzen a Rendez-vousmanöver mat engem matgefouerten Zilsatellit	120 voll Äerdëmrondungen
Gemini 6	15. Dezember 1965	16. Dezember 1965	1d 1h 51min	Walter Schirra, Tom Stafford	Rendez-vous mat Gemini 7	Dee fir Oktober 1965 geplangte Rendez-vous mam onbemannten Agena-Satellit gouf gestrach, well deem seng Drorakéit nom Start explodéiert war. De Start vu Gemini 6 gouf op den Dezember, nom Start vu Gemini 7, verréckelt. Dee Fluch ass och ënner der Nummer 6-A gelaf.
Gemini 7	4. Dezember 1965	18. Dezember 1965	13d 18h 35min	Frank Borman, James A. Lovell	Fluch deen zwou Wochen dauert, Rendez-vous mat Gemini 6, deen e puer Deeg no Gemini 7 gestart gouf.	Missiounszil: Noweis fir d'Realiséiere vun engem Raumfluch dee 14 Deeg dauert
Gemini 8	16. Mäerz 1966	17. Mäerz 1966	10h 41min	Neil Armstrong, David Scott	Kopplung mam GATV-Zilsatellit	Problemer mat der Steierung, d'Raumschëff geréit wärend der Kopplung mat der Agena a Rotatioun, Fluch ofgebrach
Gemini 9	3. Juni 1966	6. Juni 1966	3d 21min	Tom Stafford, Eugene Cernan	Rendez-vous mam ATDA-Zilsatellit	Geplangt Kopplung goung schif, well d'Verkleedung vum Zilsatellit sech net geléist hat
Gemini 10	18. Juli 1966	21. Juli 1966	2d 22h 47min	John Young, Michael Collins	Kopplung mam GATV-Zilsatellit	éischt Kopplung mam Zilsatellit a Gebrauch vum Undriff vum frieme Raumkierper
Gemini 11	12. September 1966	15. September 1966	2d 23h 17min	Charles Conrad, Richard Gordon	Kopplung mam GATV-Zilsatellit
Gemini 12	11. November 1966	15. November 1966	3d 22h 35min	James A. Lovell, Edwin Aldrin	Kopplung mam GATV-Zilsatellit	bis dohi längste Baussebordasaz mat 5,5 Stonnen

Mat der Landung vu Gemini 12 de 15. November 1966 an nodeem de Gemini-Büro den 1. Februar 1967 zougemaach gouf, war de Gemini-Programm fäerdeg.

Technesch Daten

Gemini-Raumschëff

Haaptartikel zu dësem Theema: Gemini-Raumschëff

D'Landekapsel vum Gemini-Raumschëff war 5,8 Meter laang an hat en Duerchmiesser vun dräi Meter. D'Luke konnte wärend dem Openthalt am Weltraum op an zougemaach ginn, sou datt Aktivitéite baussnt dem Raumschëff méiglech waren. E spezielle Kopplungsmodul war fir d'Undockmanöver virgesinn. D'Landekapsel war ronn 3.800 kg schwéier. Et war fir d'éischt datt bei engem Raumschëff eng Polymerelektrolytbrennstoffzell als primär Energieversuergung agesat gouf. Net nees opluedbar Batterie waren nëmme fir den Neesantrëtt an d'Atmosphär a fir Noutfäll geduecht. Et war och fir d'éischt datt e Bordcomputer, de Gemini Digital Computer, fir d'Ënnerstëtzung vun der Besatzung bei Berechnungen agesat gouf. De Computer aus 5 Platinne mat 510 Modullen hat e Späicher vun nëmme 4.086 Befeelswierder vu jee 39 Bit Längt. Well sech dësen als ze kleng erausgestallt hat gouf hie vu Gemini 8 un duerch e Magnéitbandlafwierk ergänzt, dat d'Späicherkapazitéit op dat siwefacht vergréissert huet.^[1]

Seriennummere vun de Rakéiten

Wéi d'Mercury-Redstone- an Mercury-Atlas-Rakéite virun hinnen, gouf och d'Gemini-Titan-Rakéite vun der NASA iwwer d'United States Air Force geuerdert a waren eigentlech Rakéiten, déi fir militäresch Asätz geduecht waren. D'Air Force war fir de Startkomplex 19 op der Cape Canaveral Air Force Station verantwortlech an hat all Gemini-Starte virbereet an ausgeféiert. Dofir haten déi éischt an zweet Stuf och Seriennummere vun der US-Air Force. Si waren op jee géigeniwwerleiende Säiten um ënneschten Enn vun der Stuf ubruecht. Well d'Rakéiten am Joer 1962 bestallt goufen, sollt eng Seriennummer eigentlech der Virlag 62-12XXX nokommen. Op de Stufe vun der Titan II war awer nëmmen 12XXX vermierkt.

12556 – GLV-1 – Gemini 1
12557 – GLV-2 – Gemini 2
12558 – GLV-3 – Gemini 3
12559 – GLV-4 – Gemini 4
12560 – GLV-5 – Gemini 5
12561 – GLV-6 – Gemini 6–A
12562 – GLV-7 – Gemini 7
12563 – GLV-8 – Gemini 8
12564 – GLV-9 – Gemini 9A
12565 – GLV-10 – Gemini 10
12566 – GLV-11 – Gemini 11
12567 – GLV-12 – Gemini 12
12568 – GLV-13 Bestallt vun der NASA 1962, ofbestallt den 30. Juli 1964 / net gebaut
12569 – GLV-14 Bestallt vun der NASA 1962, ofbestallt den 30. Juli 1964 / net gebaut
12570 – GLV-15 Bestallt vun der NASA 1962, ofbestallt den 30. Juli 1964 / net gebaut

Referenzen

↑ Bernd Leitenberger: Das Gemini Programm S.22

Kuckt och

Portal Astronomie

Literatur

Däitschsprocheg Literatur ass gekennzeechent

NASA-Mission-Reports

Robert Godwin: Gemini 12: The NASA Mission Reports; Apogee Books, 2004; ISBN 1-894959-04-3 (Buch & CD)
Robert Godwin: Gemini 7: The NASA Mission Reports; Collector's Guide Publishing, 2002; ISBN 1-896522-82-3 (Buch & CD)
Robert Godwin: Gemini 6: The NASA Mission Reports; Apogee Books, 2000; ISBN 1-896522-61-0 (Buch & CD)

Allgemeng

Carl R. Green: The Gemini 4 Spacewalk Mission; Myreportlinks.com, 2004; ISBN 0-7660-5163-3
David M. Harland: How NASA Learned to Fly in Space: An Exciting Account of the Gemini MissionsM Apogee Books, 2004; ISBN 1-894959-07-8
Helen Zelon: The First America Space Walk: The Gemini IV Mission; PowerKids Press, 2002; ISBN 0-8239-5771-3
David J. Shayler: Gemini; Springer-Verlag Telos, 2001; ISBN 1-85233-405-3
Diane M. und Paul P. Sipiera: Project Gemini; Children's Press, 1997; ISBN 0-516-20441-6
(de) Divers: Menschen zum Mond – Gemini 4 und Gemini 6/7; Inter-Pathé-Film Ing. Paul Schmitt GmbH + Co KG; ISBN 3-89396-119-4
(de) Bernd Leitenberger: Das Gemini Programm: Technik und Geschichte; 3., erweidert Oplo. Books on Demand, Norderstedt 2010, ISBN 978-3-83914-7-986.

DVDs

(de) Das NASA Programm – Das Gemini Programm; ASIN B0006SWIDI

Um Spaweck

Commons: Gemini-Projet – Biller, Videoen oder Audiodateien

Gemini-Säite vun der NASA:
- (en) Gemini – Dokumentatioun vum Kennedy Space Flight Center
- (en) NASA: Project Gemini (ausféierlech Chronologie)
- (en) On the Shoulders of Titans: A History of Project Gemini Online-Versioun vun engem NASA-Buch
- (en) Humanspaceflight – Fotoen zum Gemini-Programm
- (en) Héichopgeléiste Fotoen zum Gemini-Programm
Aner Websäiten:

[1] Bernd Leitenberger: Das Gemini Programm S.22

[1]