Elias Canetti
![](http://upload.wikimedia.org/wikipedia/commons/thumb/f/fd/Elias_Canetti_2.jpg/220px-Elias_Canetti_2.jpg)
Elias Canetti (Rutschuk, sivdad del Emperio Ottomano, endagora yamada Ruse en la aktuala Bulgaria, 25 de Djulio de 1905 - Zurigo, 14 de Ogusto de 1994), eskritor i filosofo en lingua almana, Premio Nobel de Literatura enel anyo 1981.
![](http://upload.wikimedia.org/wikipedia/commons/thumb/f/f1/Die_Blendung.jpg/220px-Die_Blendung.jpg)
Biografiya
[trocar | trocar el manadero]Ijo de una famiya de merkaderes sefardis (la su famiya tinía el su orijin en Kanyete, viya de Kuenka, Espanya de ande es Ijo Adoptivo), bivió en la aktuala Bulgaria asta ke enel anyo 1911 se fue a bivir al Reyno Unito, má presisamente a la sivdad de Manchester, ande izo kontakto con las amijores obras de la literatura universala. Desde manseviko avlaba el bulgariano, el almán i el ladino. Dempues de murir el su padre, la famiya Canetti se fue a bivir a Ostria, en la sivdad de Viena ande biven la Primera Gerra Mondial i se yena de orgolyo al dizir a sus amigos chikos de ser "priméro britaniko antes ke ostriako". Ma afilú dempues de instalado en Ostria, uzó prinsipalmente el almán.
Dempues de bivir en Zurigo i en Almania, aboltó muevamente a Viena en 1924 komo elevo de Siensas Kímikas, lisensándose en 1929, anke la su mayor pasión era la literatura, arte la kuala estudió en Suisa. Kuando vivia en Viena, se kaza kon la eskritora Veza Taubner, i eskrive las sus primeras obras: La Boda, La Komedia de las Vanidades i Avto de Fe. En 1938, dempués de la Noche de los kristales rotos en Ostria i Almania, Canetti se fue a bivir a Londra, aziendose sivdadano britaniko enel anyo 1952. Es yí ande bivió provemente lavoraando en una de las sus mayores obras, Masa i poder, enfluido muncho por la Almania nazi ke vio kon los sus propios ojos. Inkómodo con la mentalidad i las kostumbras inglezas, se izo muy krítiko de los intelektuales del paez, komo deskrive en el su livro Fiesta basho las bombas, i fue amante de la novelista británika Iris Murdoch, de la kuala deshó en este livro un retrato sin miserikodria. A partir de la anyada de los 70, bivió en Zurigo asta la su muerte, el 14 de Ogusto de 1994. Enel anyo 1971, dempues de la muerte de la su primera esposa, se kaza kon la kuradora de arte Hera Buschor, kon la kuala tiene una ija. Enel anyo 1972 resive el Premio Georg Büchner, el más emportante rekonosimyénto literario en lingua alemana, i enelanyo 1981 el Premio Nobel de Literatura. Entre los fondamentos de la entrega del Nobel, se mensiona el su estudio de los movimentos de masas i de manera espesiala kon la brutalidad del nasionalsosyalismo alman i de las diktaduras en jeneral. Toda la su obra personala no va pueder ser konosida asta el anyo 2024, komo el establesió enel su testamento.
Obras
[trocar | trocar el manadero]- Auto de fe, 1936. (Novela).
- Notas, 1948 (Aforismos)
- Masa i poder, 1960. (Ensayo antropolójiko).
- El otro proseso de Kafka, 1969.
- La konsiensa de las palavras, 1975.
- El suplisio de las moskas, apuntes biográfikos (1986-1992) 1992
- La lengua absuelta, La antorcha al uyído, El juego de ojos i Fiesta basho las bombas, katro tomos avtobiográfikos.