Alkitab/Purwaning Dumadi/30

Kaca iki nganggo aksara Jawa. Yen perambanmu ora ndukung, kowé ora bakal isa ndeleng sauntara tulisan nganggo aksara Jawa ing halaman iki.
Kanggo mbeneraké, mangga diwaca Pitulung:Aksara Jawa.

^30:1 ꧊ꦫꦲꦺꦭ꧀ꦲꦺꦴꦫꦢꦸꦮꦺꦢꦸꦮꦺꦲꦤꦏ꧀꧉ꦩꦸꦭꦤꦺꦩꦺꦫꦶꦏꦫꦺꦴꦩ꧀ꦧꦏꦾꦸꦤꦺ꧉ꦧꦚ꧀ꦗꦸꦂꦏꦤ꧀ꦝꦏꦫꦺꦴ꧊ꦪꦏꦸꦧ꧀꧈"ꦲꦏꦸꦮꦺꦤꦺꦃꦲꦤꦲꦤꦏ꧀;ꦪꦺꦤ꧀ꦲꦺꦴꦫ꧈ꦲꦏꦸꦠꦿꦶꦩꦩꦠꦶ꧉"

^30:2 ꧊ꦪꦏꦸꦧ꧀ꦤꦼꦥ꧀ꦱꦸꦏꦫꦺꦴ꧊ꦫꦲꦺꦭ꧀꧉ꦠꦼꦩ꧀ꦧꦸꦁꦔꦺ꧈"ꦲꦏꦸꦫꦏ꧀ꦢꦸꦢꦸꦄꦭ꧀ꦭꦃ꧉ꦄꦭ꧀ꦭꦃꦱꦶꦁꦲꦺꦴꦫꦩꦉꦁꦔꦏꦺꦏꦺꦴꦮꦺꦢꦸꦮꦺꦲꦤꦏ꧀꧉"

^30:3 ꧊ꦫꦲꦺꦭ꧀ꦧꦚ꧀ꦗꦸꦂꦩꦁꦱꦸꦭ꧀ꦭꦶ꧈"ꦮꦶꦱ꧀꧈ꦲꦶꦏꦶꦧꦶꦭ꧀ꦲ꧈ꦧꦠꦸꦂꦏꦸ꧈ꦏꦸꦩ꧀ꦥꦸꦭ꧀ꦭꦤ꧈ꦱꦸꦥꦪꦢꦸꦮꦺꦲꦤꦏ꧀꧉ꦩꦼꦁꦏꦺꦴꦲꦤꦏ꧀ꦏꦺꦢꦏ꧀ꦥꦺꦏ꧀ꦏꦺ꧉"

^30:4 ꦧꦶꦭ꧀ꦲ꧈ꦧꦠꦸꦂꦫꦺꦩꦲꦸꦤꦸꦭꦶꦢꦶꦮꦺꦤꦺꦃꦲꦏꦺꦩꦫꦁ꧊ꦪꦏꦸꦧ꧀ꦱꦸꦥꦪꦢꦶꦥꦺꦏ꧀ꦧꦺꦴꦗꦺꦴ꧉꧊ꦪꦏꦸꦧ꧀ꦧꦚ꧀ꦗꦸꦂꦔꦸꦩ꧀ꦥꦸꦭ꧀ꦭꦶꦧꦶꦭ꧀ꦲ꧈

^30:5 ꦠꦼꦩꦃꦧꦶꦭ꧀ꦲꦔꦤ꧀ꦝꦼꦒ꧀ꦭꦤ꧀ꦩ꧀ꦧꦧꦂꦲꦤꦏ꧀ꦭꦤꦁ꧉

^30:6 ꦥꦔꦸꦕꦥ꧀ꦥꦺ꧊ꦫꦲꦺꦭ꧀꧈"ꦄꦭ꧀ꦭꦃꦩ꧀ꦧꦺꦭꦤꦶꦲꦏꦸ꧉ꦥꦚꦸꦮꦸꦤ꧀ꦏꦸꦢꦶꦗꦸꦫꦸꦁꦔꦶ;ꦲꦏꦸꦢꦶꦥꦫꦶꦁꦔꦶꦲꦤꦏ꧀ꦭꦤꦁ꧉"ꦧꦺꦴꦕꦃꦩꦲꦸꦧꦚ꧀ꦗꦸꦂꦢꦶꦗꦼꦤꦼꦁꦔꦏꦺ:꧊ꦝꦤ꧀꧉

^30:7 ꦧꦶꦭ꧀ꦲꦧꦚ꧀ꦗꦸꦂꦔꦤ꧀ꦝꦼꦒ꧀ꦩꦼꦤꦺꦃꦭꦤ꧀ꦩ꧀ꦧꦧꦂꦲꦤꦏ꧀ꦭꦤꦁꦱꦶꦁꦏꦥꦶꦤ꧀ꦝꦺꦴ꧉

^30:8 ꦥꦔꦸꦕꦥ꧀ꦥꦺ꧊ꦫꦲꦺꦭ꧀꧈"ꦲꦏꦸꦮꦶꦱ꧀ꦩꦼꦩꦸꦁꦱꦸꦃꦲꦤ꧀ꦏꦫꦺꦴꦩ꧀ꦧꦏꦾꦸꦏꦸꦔꦽꦧꦸꦠ꧀ꦧꦼꦂꦏꦃꦲꦺꦄꦭ꧀ꦭꦃꦭꦤ꧀ꦲꦏꦸꦩꦼꦤꦁ꧉"ꦩꦸꦭꦤꦺꦧꦺꦴꦕꦃꦲꦺꦢꦶꦗꦼꦤꦼꦁꦔꦏꦺ:꧊ꦤꦥ꦳꧀ꦠꦭꦶ꧉

^30:9 ꦧꦉꦁ꧊ꦭꦺꦪꦔꦼꦂꦠꦶꦪꦺꦤ꧀ꦲꦼꦁꦒꦺꦴꦤꦺꦢꦸꦮꦺꦲꦤꦏ꧀ꦮꦶꦱ꧀ꦩꦤ꧀ꦝꦼꦒ꧀꧈ꦧꦚ꧀ꦗꦸꦂꦩꦺꦤꦺꦃꦲꦏꦺ꧊ꦗ꦳ꦶꦭ꧀ꦥꦩꦫꦁ꧊ꦪꦏꦸꦧ꧀ꦱꦸꦥꦪꦢꦶꦥꦺꦏ꧀ꦧꦺꦴꦗꦺꦴ꧉

^30:10 ꧊ꦗ꦳ꦶꦭ꧀ꦥꦧꦚ꧀ꦗꦸꦂꦢꦸꦮꦺꦲꦤꦏ꧀ꦭꦤꦁ꧉

^30:11 ꦥꦔꦸꦕꦥ꧀ꦥꦺ꧊ꦭꦺꦪ꧈"ꦲꦏꦸꦮꦶꦱ꧀ꦧꦛꦶ";ꦩꦸꦭꦤꦺꦧꦺꦴꦕꦃꦩꦲꦸꦧꦚ꧀ꦗꦸꦂꦢꦶꦗꦼꦤꦼꦁꦔꦏꦺ:꧊ꦒꦢ꧀꧉

^30:12 ꧊ꦗ꦳ꦶꦭ꧀ꦥꦢꦸꦮꦺꦲꦤꦏ꧀ꦭꦤꦁꦩꦼꦤꦺꦃ꧉

^30:13 ꧊ꦭꦺꦪꦧꦚ꧀ꦗꦸꦂꦔꦸꦕꦥ꧀꧈"ꦮꦃꦧꦼꦒ꧀ꦗꦠꦼꦩꦼꦤ꧀ꦲꦏꦸꦲꦶꦏꦶ";ꦩꦸꦭꦤꦺꦧꦺꦴꦕꦃꦩꦲꦸꦢꦶꦗꦼꦤꦼꦁꦔꦏꦺ:꧊ꦄꦱꦾꦺꦂ꧉

^30:14 ꦤꦭꦶꦏꦩꦁꦱꦤꦺꦥꦤꦺꦤ꧀ꦒꦤ꧀ꦢꦸꦩ꧀꧈꧊ꦫꦸꦧꦺꦤ꧀ꦤꦼꦩꦸꦠꦤ꧀ꦢꦸꦂꦫꦤ꧀ꦢꦸꦢꦲꦶꦲꦶꦁꦥꦠꦼꦒꦭ꧀ꦭꦤ꧀꧉ꦠꦤ꧀ꦢꦸꦂꦫꦤ꧀ꦩꦲꦸꦢꦶꦮꦺꦤꦺꦃꦲꦏꦺꦩꦫꦁ꧊ꦭꦺꦪ꧈ꦲꦶꦧꦸꦤꦺ꧉꧊ꦫꦲꦺꦭ꧀ꦤꦼꦩ꧀ꦧꦸꦁꦩꦫꦁ꧊ꦭꦺꦪ꧈"ꦲꦏꦸꦩ꧀ꦧꦺꦴꦏ꧀ꦚ꧀ꦗꦭꦸꦏ꧀ꦠꦤ꧀ꦢꦸꦂꦫꦤ꧀ꦱꦶꦁꦢꦶꦠꦼꦩꦸꦲꦤꦏ꧀ꦩꦸꦏꦸꦮꦶ꧈ꦱꦼꦛꦶꦛꦶꦏ꧀ꦮꦲꦺ꧉"

^30:15 ꦮꦁꦱꦸꦭ꧀ꦭꦤ꧀ꦤꦺ꧊ꦭꦺꦪ꧈"ꦲꦥꦢꦸꦫꦸꦁꦕꦸꦏꦸꦥ꧀ꦲꦼꦁꦒꦺꦴꦤ꧀ꦩꦸꦩ꧀ꦧꦸꦗꦸꦏ꧀ꦏꦶꦧꦺꦴꦗꦺꦴꦏꦸ?ꦲꦶꦱꦶꦃꦲꦉꦥ꧀ꦚ꧀ꦗꦭꦸꦏ꧀ꦠꦤ꧀ꦢꦸꦂꦫꦤ꧀ꦢꦸꦢꦲꦶꦲꦶꦏꦶ?"꧊ꦫꦲꦺꦭ꧀ꦒꦼꦤ꧀ꦠꦶꦩꦁꦱꦸꦭ꧀ꦭꦶ꧈"ꦮꦶꦱ꧀ꦠ꧈ꦲꦏꦸꦮꦺꦤꦺꦃꦲꦤꦠꦤ꧀ꦢꦸꦂꦫꦤ꧀ꦏꦸꦮꦶꦱꦼꦛꦶꦛꦶꦏ꧀꧈ꦩꦼꦁꦏꦺꦴꦧꦼꦔꦶ꧊ꦪꦏꦸꦧ꧀ꦏꦉꦧꦺꦤ꧀ꦠꦸꦫꦸꦏꦫꦺꦴꦏꦺꦴꦮꦺ꧉"

^30:16 ꦧꦉꦁ꧊ꦪꦏꦸꦧ꧀ꦱꦺꦴꦫꦺꦤꦺꦩꦸꦭꦶꦃꦱꦏꦥꦠꦼꦒꦭ꧀ꦭꦤ꧀꧈꧊ꦭꦺꦪꦩꦼꦛꦸꦏ꧀ꦏꦏꦺꦏꦫꦺꦴꦩꦸꦤꦶ꧈"ꦧꦼꦔꦶꦲꦶꦏꦶꦏꦺꦴꦮꦺꦏꦸꦢꦸꦠꦸꦫꦸꦏꦫꦺꦴꦲꦏꦸ꧈ꦩꦼꦂꦒꦲꦏꦸꦮꦶꦱ꧀ꦩ꧀ꦧꦪꦂꦔꦁꦒꦺꦴꦠꦤ꧀ꦢꦸꦂꦫꦤ꧀ꦢꦸꦢꦲꦶꦱꦏꦲꦤꦏ꧀ꦏꦸ꧉"ꦧꦼꦔꦶꦏꦸꦮꦶ꧊ꦪꦏꦸꦧ꧀ꦔꦸꦩ꧀ꦥꦸꦭ꧀ꦭꦶ꧊ꦭꦺꦪ꧉

^30:17 ꦒꦸꦱ꧀ꦠꦶꦄꦭ꧀ꦭꦃꦚ꧀ꦗꦸꦫꦸꦁꦔꦶꦥꦚꦸꦮꦸꦤ꧀ꦤꦺ꧊ꦭꦺꦪ꧈ꦩꦸꦭꦤꦺ꧊ꦭꦺꦪꦔꦤ꧀ꦝꦼꦒ꧀ꦭꦤ꧀ꦩ꧀ꦧꦧꦂꦲꦤꦏ꧀ꦭꦤꦁꦱꦶꦁꦏꦭꦶꦩ꧉

^30:18 ꦥꦔꦸꦕꦥ꧀ꦥꦺ꧊ꦭꦺꦪ꧈"ꦄꦭ꧀ꦭꦃꦮꦶꦱ꧀ꦩ꧀ꦧꦼꦂꦏꦃꦲꦶꦲꦏꦸ꧈ꦩꦼꦂꦒꦲꦏꦸꦩꦺꦤꦺꦃꦲꦏꦺ꧊ꦗ꦳ꦶꦭ꧀ꦥꦩꦫꦁꦧꦺꦴꦗꦺꦴꦏꦸ꧉"ꦩꦸꦭꦤꦺꦧꦺꦴꦕꦃꦩꦲꦸꦢꦶꦗꦼꦤꦼꦁꦔꦏꦺ:꧊ꦆꦱꦏꦂ꧉

^30:19 ꧊ꦭꦺꦪꦔꦤ꧀ꦝꦼꦒ꧀ꦩꦼꦤꦺꦃꦭꦤ꧀ꦩ꧀ꦧꦧꦂꦲꦤꦏ꧀ꦭꦤꦁꦏꦁꦏꦤꦼꦩ꧀꧉

^30:20 ꦥꦔꦸꦕꦥ꧀ꦥꦺ꧈"ꦄꦭ꧀ꦭꦃꦮꦶꦱ꧀ꦥꦫꦶꦁꦒꦚ꧀ꦗꦂꦫꦤ꧀ꦱꦶꦁꦲꦺꦤ꧀ꦢꦃꦩꦫꦁꦲꦏꦸ꧉ꦱꦲꦶꦏꦶꦧꦺꦴꦗꦺꦴꦏꦸꦧꦏꦭ꧀ꦲꦺꦴꦫꦔꦿꦺꦩꦺꦃꦲꦏꦺꦲꦏꦸ꧈ꦩꦼꦂꦒꦲꦏꦸꦮꦶꦱ꧀ꦲꦮꦺꦃꦲꦤꦏ꧀ꦭꦤꦁꦲꦼꦤꦼꦩ꧀꧉"ꦧꦺꦴꦕꦃꦩꦲꦸꦧꦚ꧀ꦗꦸꦂꦢꦶꦗꦼꦤꦼꦁꦔꦏꦺ:꧊ꦗ꦳ꦺꦧꦸꦭꦺꦴꦤ꧀꧉

^30:21 ꦱꦮꦶꦱ꧀ꦱꦺꦏꦸꦮꦶ꧊ꦭꦺꦪꦲꦶꦱꦶꦃꦢꦸꦮꦺꦲꦤꦏ꧀ꦩꦼꦤꦺꦃ꧈ꦮꦢꦺꦴꦤ꧀꧈ꦢꦶꦗꦼꦤꦼꦁꦔꦏꦺ:ꦢꦶꦤ꧉

^30:22 ꦒꦸꦱ꧀ꦠꦶꦄꦭ꧀ꦭꦃꦔꦺꦔꦼꦠ꧀ꦠꦶꦩꦫꦁ꧊ꦫꦲꦺꦭ꧀꧈ꦭꦤ꧀ꦚꦼꦩ꧀ꦧꦢꦤꦶꦥꦚꦸꦮꦸꦤ꧀ꦤꦺ꧉꧊ꦫꦲꦺꦭ꧀ꦢꦶꦥꦫꦶꦁꦔꦶꦱꦸꦧꦸꦂ꧈

^30:23 ꦠꦼꦩꦃꦲꦤ꧀ꦔꦤ꧀ꦝꦼꦒ꧀ꦭꦤ꧀ꦩ꧀ꦧꦧꦂꦲꦤꦏ꧀ꦭꦤꦁ꧉ꦥꦔꦸꦕꦥ꧀ꦥꦺ꧊ꦫꦲꦺꦭ꧀꧈"ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦩ꧀ꦧꦸꦮꦁꦮꦶꦫꦁꦏꦸꦱꦿꦤꦩꦫꦶꦁꦔꦶꦲꦤꦏ꧀ꦭꦤꦁꦩꦫꦁꦲꦏꦸ꧉

^30:24 ꦩꦸꦒꦩꦸꦒꦲꦏꦸꦢꦶꦥꦫꦶꦁꦔꦶꦲꦤꦏ꧀ꦭꦤꦁꦱꦶꦗꦶꦲꦼꦁꦏꦱ꧀꧉"ꦩꦸꦭꦤꦺꦧꦺꦴꦕꦃꦩꦲꦸꦢꦶꦗꦼꦤꦼꦁꦔꦏꦺ:꧊ꦪꦸꦱꦸꦥ꦳꧀꧉

^30:25 ꦧꦉꦁ꧊ꦫꦲꦺꦭ꧀ꦮꦶꦱ꧀ꦢꦸꦮꦺꦲꦤꦏ꧀꧊ꦪꦸꦱꦸꦥ꦳꧀꧈꧊ꦪꦏꦸꦧ꧀ꦤꦼꦩ꧀ꦧꦸꦁꦏꦫꦺꦴ꧊ꦭꦧꦤ꧀꧈"ꦏꦼꦥꦉꦁꦔꦏꦸꦭꦮꦁꦱꦸꦭ꧀ꦝꦠꦼꦁꦤꦼꦒꦫꦶꦏꦸꦭꦩꦭꦶꦃ꧉

^30:26 ꦱꦺꦩꦃꦱꦺꦩꦃꦭꦤ꧀ꦲꦤꦏ꧀ꦲꦤꦏ꧀ꦏꦸꦭ꧈ꦲꦶꦁꦏꦁꦏꦸꦭꦭꦧꦼꦠ꧀ꦠꦶꦏꦭꦪꦤ꧀ꦔꦺꦔꦺꦂꦥꦚ꧀ꦗꦼꦤꦼꦁꦔꦤ꧀꧈ꦏꦸꦭꦱꦸꦮꦸꦤ꧀;ꦭꦤ꧀ꦏꦼꦥꦉꦁꦔꦏꦸꦭꦏꦺꦱꦃꦱꦏꦶꦁꦔꦿꦶꦏꦶ꧉ꦥꦚ꧀ꦗꦼꦤꦼꦁꦔꦤ꧀ꦥꦶꦂꦱꦧꦶꦭꦶꦃꦏꦸꦭꦱꦩ꧀ꦥꦸꦤ꧀ꦚꦩ꧀ꦧꦸꦠ꧀ꦢꦩꦼꦭ꧀ꦏꦤ꧀ꦛꦶꦠꦸꦩꦼꦩ꧀ꦩꦼꦤ꧀꧉"

^30:27 ꦤꦁꦔꦶꦁ꧊ꦭꦧꦤ꧀ꦩꦁꦱꦸꦭ꧀ꦭꦶ꧈"ꦫꦸꦔꦺꦴꦏ꧀ꦤꦔ꧀ꦒꦺꦂ꧉ꦲꦏꦸꦲꦺꦴꦭꦺꦃꦱꦱ꧀ꦩꦶꦠ꧈ꦪꦺꦤ꧀ꦲꦼꦁꦒꦺꦴꦤ꧀ꦏꦸꦏꦧꦼꦂꦏꦃꦲꦤ꧀ꦢꦺꦤꦶꦁꦄꦭ꧀ꦭꦃꦲꦶꦏꦶꦩꦼꦂꦒꦱꦏꦏꦺꦴꦮꦺ꧉

^30:28 ꦩꦸꦭꦤꦺꦩꦸꦤꦶꦪꦮꦲꦺꦏꦺꦴꦮꦺꦚ꧀ꦗꦭꦸꦏ꧀ꦲꦺꦴꦥꦃꦥꦶꦫ꧈ꦩꦼꦱ꧀ꦛꦶꦢꦏ꧀ꦠꦸꦫꦸꦠ꧀ꦠꦶ꧉"

^30:29 ꧊ꦪꦏꦸꦧ꧀ꦒꦼꦤ꧀ꦠꦶꦩꦁꦱꦸꦭ꧀ꦭꦶ꧈"ꦥꦚ꧀ꦗꦼꦤꦼꦁꦔꦤ꧀ꦥꦶꦂꦱꦥꦶꦪꦩ꧀ꦧꦏ꧀ꦏꦢꦺꦴꦱ꧀ꦥꦸꦤ꧀ꦢꦶꦲꦼꦁꦒꦺꦤ꧀ꦏꦸꦭꦚꦽꦩ꧀ꦥꦼꦁꦚꦩ꧀ꦧꦸꦠ꧀ꦢꦩꦼꦭ꧀꧉ꦫꦗꦏꦪꦥꦚ꧀ꦗꦼꦤꦼꦁꦔꦤ꧀ꦩꦶꦤ꧀ꦝꦏ꧀ꦢꦢꦺꦴꦱ꧀ꦏꦛꦃꦩꦼꦂꦒꦶꦱꦏꦶꦁꦥꦔꦿꦶꦩꦠ꧀ꦏꦸꦭ꧉

^30:30 ꦱꦢꦺꦫꦺꦁꦔꦶꦥꦸꦤ꧀ꦏꦸꦭꦝꦠꦼꦁꦩꦿꦶꦏꦶꦧꦤ꧀ꦝꦥꦚ꧀ꦗꦼꦤꦼꦁꦔꦤ꧀ꦩ꧀ꦧꦺꦴꦠꦼꦤ꧀ꦱꦼꦥꦶꦤ꧀ꦠꦼꦤ꧀ꦤ꧉ꦩꦁꦏꦱꦩꦼꦤꦶꦏꦢꦢꦺꦴꦱ꧀ꦏꦛꦃꦱꦔꦼꦠ꧀꧉ꦒꦸꦱ꧀ꦠꦶꦄꦭ꧀ꦭꦃꦱꦩ꧀ꦥꦸꦤ꧀ꦥꦫꦶꦁꦧꦼꦂꦏꦃꦏꦛꦃꦝꦠꦼꦁꦥꦚ꧀ꦗꦼꦤꦼꦁꦔꦤ꧀ꦩꦂꦒꦶꦱꦏꦶꦁꦏꦸꦭ꧉ꦱꦩꦼꦤꦶꦏꦏꦸꦭꦏꦼꦥꦺꦔꦶꦤ꧀ꦚꦩ꧀ꦧꦸꦠ꧀ꦢꦩꦼꦭ꧀ꦏꦁꦒꦺꦧꦿꦪꦠ꧀ꦏꦸꦭꦥꦶꦪꦩ꧀ꦧꦏ꧀꧉"

^30:31 ꦥꦶꦠꦏꦺꦴꦤ꧀ꦤꦺ꧊ꦭꦧꦤ꧀꧈"ꦏꦺꦴꦮꦺꦚ꧀ꦗꦭꦸꦏ꧀ꦲꦥ?"ꦲꦠꦸꦂꦫꦺ꧊ꦪꦏꦸꦧ꧀꧈"ꦏꦸꦭꦩ꧀ꦧꦺꦴꦠꦼꦤ꧀ꦚꦸꦮꦸꦤ꧀ꦲꦺꦥꦃꦩꦼꦤꦥꦩꦼꦤꦥ꧉ꦏꦸꦭꦱꦒꦃꦔꦿꦶꦩꦠ꧀ꦠꦶꦩꦺꦤ꧀ꦢꦩꦺꦤ꧀ꦢꦥꦚ꧀ꦗꦼꦤꦼꦁꦔꦤ꧀ꦩꦭꦶꦃ꧈ꦲꦸꦒꦼꦂꦥꦚ꧀ꦗꦼꦤꦼꦁꦔꦤ꧀ꦚꦫꦸꦗꦸꦏ꧀ꦏꦶꦲꦸꦱꦸꦭ꧀ꦏꦸꦭꦩꦼꦏꦠ꧀ꦠꦼꦤ꧀:

^30:32 ꦏꦼꦥꦉꦁꦔꦏꦸꦭꦤꦶꦔꦭ꧀ꦭꦶꦩꦺꦤ꧀ꦢꦥꦚ꧀ꦗꦼꦤꦼꦁꦔꦤ꧀ꦱꦼꦢꦪꦭꦤ꧀ꦩꦶꦱꦃꦲꦏꦼꦤ꧀ꦩꦺꦤ꧀ꦢꦒꦺꦩ꧀ꦧꦺꦭ꧀ꦲꦶꦁꦏꦁꦕꦼꦩꦼꦁꦭꦤ꧀ꦩꦺꦤ꧀ꦢꦗꦮꦶꦲꦶꦁꦏꦁꦮꦺꦴꦤ꧀ꦠꦼꦤ꧀ꦧ꧀ꦭꦼꦤ꧀ꦠꦺꦴꦁꦲꦸꦠꦮꦶꦮꦺꦴꦤ꧀ꦠꦼꦤ꧀ꦠꦸꦠꦸꦭ꧀ꦭꦶꦥꦸꦤ꧀꧉ꦩꦼꦤꦶꦏꦲꦶꦁꦏꦁꦏꦸꦭꦱꦸꦮꦸꦤ꧀ꦩꦶꦤꦁꦏꦲꦺꦥꦃꦲꦤ꧀ꦏꦸꦭ꧉

^30:33 ꦩ꧀ꦧꦺꦚ꧀ꦗꦶꦁꦥꦚ꧀ꦗꦼꦤꦼꦁꦔꦤ꧀ꦱꦒꦼꦢ꧀ꦩꦶꦂꦱꦤꦶꦩꦼꦤꦥꦏꦸꦭꦠꦼꦩꦼꦤ꧀ꦱꦲꦺꦱ꧀ꦠꦸꦩꦼꦤꦥꦩ꧀ꦧꦺꦴꦠꦼꦤ꧀꧉ꦩꦼꦤꦮꦶꦥꦚ꧀ꦗꦼꦤꦼꦁꦔꦤ꧀ꦝꦠꦼꦁꦩꦿꦶꦏ꧀ꦱꦒꦝꦃꦲꦤ꧀ꦏꦸꦭ꧈ꦒꦩ꧀ꦥꦶꦭ꧀ꦏꦺꦩꦮꦺꦴꦤ꧀ꦲꦼꦁꦒꦺꦤ꧀ꦥꦚ꧀ꦗꦼꦤꦼꦁꦔꦤ꧀ꦤꦶꦠꦶꦏ꧀꧉ꦱꦲꦸꦥꦩꦶꦏꦸꦭꦔꦤ꧀ꦠꦺꦴꦱ꧀ꦒꦝꦃꦩꦺꦤ꧀ꦢꦗꦮꦶꦲꦶꦁꦏꦁꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦧ꧀ꦭꦼꦤ꧀ꦠꦺꦴꦁꦔꦶꦥꦸꦤ꧀ꦲꦸꦠꦮꦶꦠꦸꦠꦸꦭ꧀ꦭꦶꦥꦸꦤ꧀꧈ꦭꦤ꧀ꦩꦭꦶꦃꦒꦝꦃꦩꦺꦤ꧀ꦢꦒꦺꦩ꧀ꦧꦺꦭ꧀ꦲꦶꦁꦏꦁꦩ꧀ꦧꦺꦴꦠꦼꦤ꧀ꦕꦼꦩꦼꦁ꧈ꦩꦺꦤ꧀ꦢꦩꦺꦤ꧀ꦢꦩꦼꦤꦶꦏꦩꦼꦱ꧀ꦛꦶꦲꦼꦁꦒꦺꦤ꧀ꦏꦸꦭꦚꦺꦴꦭꦺꦴꦁ꧉"

^30:34 ꧊ꦭꦧꦤ꧀ꦩꦁꦱꦸꦭ꧀ꦭꦶ꧈"ꦪꦮꦶꦱ꧀꧈ꦲꦏꦸꦚꦫꦸꦗꦸꦏ꧀ꦏꦶꦲꦸꦱꦸꦭ꧀ꦩꦸꦏꦸꦮꦶ꧉"

^30:35 ꦲꦶꦁꦢꦶꦤꦲꦶꦏꦸꦲꦸꦒ꧊ꦭꦧꦤ꧀ꦩꦶꦱꦃꦲꦏꦺꦮꦼꦝꦸꦱ꧀ꦗꦮꦭꦤꦁ꧈ꦱꦶꦁꦲꦤꦧ꧀ꦭꦼꦤ꧀ꦠꦺꦴꦁꦔꦺꦲꦸꦠꦮꦠꦸꦠꦸꦭ꧀ꦭꦺ꧈ꦩꦼꦁꦏꦺꦴꦤꦺꦴꦲꦸꦒꦮꦼꦝꦸꦱ꧀ꦗꦮꦮꦢꦺꦴꦤ꧀ꦱꦶꦁꦲꦤꦧ꧀ꦭꦼꦤ꧀ꦠꦺꦴꦁꦔꦺꦲꦸꦠꦮꦠꦸꦠꦸꦭ꧀ꦭꦺ꧈ꦭꦤ꧀ꦱꦏꦺꦃꦲꦺꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦱꦶꦁꦲꦶꦉꦁ;ꦮꦼꦝꦸꦱ꧀ꦮꦼꦝꦸꦱ꧀ꦩꦲꦸꦢꦶꦥꦶꦱꦃꦲꦏꦺ꧈ꦧꦚ꧀ꦗꦸꦂꦢꦶꦠꦶꦠꦶꦥ꧀ꦥꦏꦺꦩꦫꦁꦲꦤꦏ꧀ꦲꦤꦏ꧀ꦏꦺ꧉

^30:36 ꦮꦼꦝꦸꦱ꧀ꦮꦼꦝꦸꦱ꧀ꦩꦲꦸꦢꦶꦒꦮꦭꦸꦔꦔꦼꦢꦺꦴꦃꦲꦶꦥꦁꦒꦺꦴꦤ꧀ꦤꦤ꧀ꦤꦺ꧊ꦪꦏꦸꦧ꧀꧈ꦲꦢꦺꦴꦃꦲꦺꦮꦼꦠꦫꦭꦏꦺꦴꦤ꧀ꦠꦼꦭꦸꦁꦢꦶꦤ;꧊ꦪꦏꦸꦧ꧀ꦩꦸꦁꦏꦼꦤꦔꦼꦔꦺꦴꦤ꧀ꦮꦼꦝꦸꦱ꧀ꦮꦼꦝꦸꦱ꧀ꦭꦶꦪꦤꦺ꧉

^30:37 ꦱꦮꦶꦱ꧀ꦱꦺꦏꦸꦮꦶ꧊ꦪꦏꦸꦧ꧀ꦧꦚ꧀ꦗꦸꦂꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦁꦥꦁꦔꦺꦮꦶꦠ꧀ꦲꦮꦂ꧈ꦧꦢꦩ꧀ꦭꦤ꧀ꦧꦼꦫꦁꦔꦤ꧀꧉ꦏꦸꦭꦶꦠ꧀ꦠꦺꦥꦁꦥꦁꦩꦲꦸꦱꦥꦺꦫꦁꦔꦤ꧀ꦢꦶꦏ꧀ꦭꦺꦴꦛꦺꦴꦏ꧀ꦏꦶ꧈ꦔꦤ꧀ꦠꦶꦢꦢꦶꦥ꧀ꦭꦺꦴꦤ꧀ꦛꦁ꧈ꦥꦸꦠꦶꦃꦭꦤ꧀ꦲꦶꦗꦺꦴ꧉

^30:38 ꦥꦁꦥꦁꦥ꧀ꦭꦺꦴꦤ꧀ꦛꦁꦩꦲꦸꦧꦚ꧀ꦗꦸꦂꦢꦶꦱꦺꦭꦺꦃꦲꦏꦺꦲꦤꦲꦶꦁꦥꦁꦒꦺꦴꦤ꧀ꦤꦤ꧀ꦤꦺꦮꦼꦝꦸꦱ꧀ꦮꦼꦝꦸꦱ꧀ꦩꦲꦸꦥꦝꦔꦺꦴꦩ꧀ꦧꦺ꧈ꦩꦼꦂꦒꦭꦸꦩꦿꦃꦲꦺꦮꦼꦝꦸꦱ꧀ꦮꦼꦝꦸꦱ꧀ꦩꦲꦸꦪꦺꦤ꧀ꦲꦉꦥ꧀ꦔꦺꦴꦩ꧀ꦧꦺꦥꦝꦏꦮꦶꦤ꧀ꦤꦤ꧀꧉

^30:39 ꦮꦼꦝꦸꦱ꧀ꦮꦼꦝꦸꦱ꧀ꦱꦶꦁꦥꦝꦏꦮꦶꦤ꧀ꦤꦤ꧀ꦲꦶꦁꦱꦕꦼꦝꦏ꧀ꦏꦺꦥꦁꦥꦁꦩꦲꦸꦪꦺꦤ꧀ꦩꦤꦏ꧀ꦲꦤꦏ꧀ꦏꦺꦩꦼꦱ꧀ꦛꦶꦲꦤꦱꦶꦁꦧ꧀ꦭꦼꦤ꧀ꦠꦺꦴꦁ꧈ꦲꦤꦱꦶꦁꦠꦸꦠꦸꦭ꧀ꦭꦤ꧀ꦲꦤꦱꦶꦁꦲꦶꦉꦁ꧉

^30:40 ꧊ꦪꦏꦸꦧ꧀ꦧꦚ꧀ꦗꦸꦂꦩꦶꦱꦃꦲꦏꦺꦮꦼꦝꦸꦱ꧀ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦱꦏꦮꦼꦝꦸꦱ꧀ꦮꦼꦝꦸꦱ꧀ꦗꦮ꧉ꦮꦼꦝꦸꦱ꧀ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦩꦲꦸꦤꦸꦭꦶꦢꦶꦮꦺꦴꦂꦏꦫꦺꦴꦮꦼꦝꦸꦱ꧀ꦗꦮꦱꦶꦁꦲꦤꦧ꧀ꦭꦼꦤ꧀ꦠꦺꦴꦁꦔꦺ꧈ꦱꦶꦁꦠꦸꦠꦸꦭ꧀ꦲꦸꦠꦮꦱꦶꦁꦲꦶꦉꦁ꧉ꦱꦿꦤꦩꦼꦁꦏꦺꦴꦤꦺꦴ꧊ꦪꦏꦸꦧ꧀ꦢꦸꦮꦺꦥꦼꦥꦤ꧀ꦛꦤ꧀ꦮꦼꦝꦸꦱ꧀ꦝꦺꦮꦺ꧈ꦭꦤ꧀ꦲꦺꦴꦫꦢꦶꦲꦼꦩꦺꦴꦂꦫꦏꦺꦏꦫꦺꦴꦥꦼꦥꦤ꧀ꦛꦤꦺꦮꦼꦝꦸꦱ꧀ꦱꦺ꧊ꦭꦧꦤ꧀꧉

^30:41 ꦲꦶꦁꦏꦭꦤꦺꦏꦺꦮꦤ꧀ꦏꦺꦮꦤ꧀ꦱꦶꦁꦫꦺꦴꦱꦲꦉꦥ꧀ꦥꦝꦏꦮꦶꦤ꧀ꦤꦤ꧀꧈꧊ꦪꦏꦸꦧ꧀ꦩꦱꦁꦥꦁꦥꦁꦱꦶꦁꦏꦸꦭꦶꦠ꧀ꦠꦺꦱꦥꦺꦫꦁꦔꦤ꧀ꦢꦶꦏ꧀ꦭꦺꦛꦺꦏ꧀ꦏꦶꦲꦤꦲꦶꦁꦔꦉꦥ꧀ꦥꦺꦏꦺꦮꦤ꧀ꦏꦺꦮꦤ꧀ꦩꦲꦸꦭꦤ꧀ꦲꦤꦲꦶꦁꦮꦝꦃꦥꦏꦤ꧀ꦤꦺ꧉

^30:42 ꦤꦁꦔꦶꦁꦥꦁꦥꦁꦩꦲꦸꦲꦺꦴꦫꦢꦶꦥꦱꦁꦲꦤꦲꦶꦁꦔꦉꦥ꧀ꦥꦺꦏꦺꦮꦤ꧀ꦏꦺꦮꦤ꧀ꦱꦶꦁꦫꦶꦁꦏꦶꦃ꧉ꦩꦸꦭꦤꦺ꧊ꦭꦧꦤ꧀ꦩꦸꦁꦲꦺꦴꦭꦺꦃꦏꦺꦮꦤ꧀ꦱꦶꦁꦥꦸꦠꦶꦃꦭꦤ꧀ꦫꦶꦁꦏꦶꦃ꧈ꦢꦺꦤꦺ꧊ꦪꦏꦸꦧ꧀ꦲꦺꦴꦭꦺꦃꦏꦺꦮꦤ꧀ꦱꦶꦁꦫꦺꦴꦱ꧈ꦱꦶꦁꦫꦸꦥꦤꦺꦲꦶꦉꦁ꧈ꦲꦤꦧ꧀ꦭꦼꦤ꧀ꦠꦺꦴꦁꦔꦺ꧈ꦲꦸꦠꦮꦲꦤꦠꦸꦠꦸꦭ꧀ꦭꦺ꧉

^30:43 ꦱꦿꦤꦩꦼꦁꦏꦺꦴꦤꦺꦴ꧊ꦪꦏꦸꦧ꧀ꦢꦢꦶꦮꦺꦴꦁꦱꦸꦒꦶꦃꦧꦔꦼꦠ꧀꧉ꦢꦸꦮꦺꦧꦠꦸꦂꦲꦏꦺꦃ꧈ꦭꦤꦁꦭꦤ꧀ꦮꦢꦺꦴꦤ꧀꧈ꦱꦂꦠꦮꦼꦝꦸꦱ꧀꧈ꦲꦸꦤ꧀ꦠꦭꦤ꧀ꦏꦸꦭ꧀ꦢꦶꦱꦼꦥꦶꦫꦁꦥꦶꦫꦁ꧉