Անուշքա
Անուշքա արաբերէն՝ أنوشكا | |
---|---|
![]() | |
Ծննդեան անուն | արաբերէն՝ قرتانوس جاربيس سليم |
Նաեւ յայտնի է իբրեւ | Anoushka |
Ծնած է | 9 Մարտ 1960[1] (64 տարեկան) |
Ծննդավայր | Գահիրէ, Եգիպտոս |
Քաղաքացիութիւն |
![]() |
Մայրենի լեզու | Արաբերէն |
Ուսումնավայր | Գահիրէի Ամերիկեան Համալսարան |
Տեսակ | Եգիպտական երաժշտություն? |
Մասնագիտութիւն | երգչուհի, դերասանուհի |
Անուշքա (բուն անունով՝ Վարդանոյշ Սելիմ, արաբերէն՝ أنوشكا, 9 Մարտ 1960[1], Գահիրէ, Եգիպտոս), եգիպտահայ երգչուհի եւ դերասանուհի[2][3]։
Կենսագրական գիծեր
[Խմբագրել | Խմբագրել աղբիւրը]Ծնած է Գահիրէ, դուստրն է հայազգի Կարպիս Սելիմի[4]։ Անուշքա յաճախած է Գահիրէի Պուլաք Ապուլ Աալա ( بولاق أبو العلا ) թաղամասին մէջ գտնուող Գալուստ Կիւլպէնկեան վարժարանը՝ մանկապարտէզէն մինչեւ երկրորդական, որմէ ետք ուսումը շարունակած է Գահիրէի Ամերիկեան համալսարանին մէջ՝ հետեւելով գործարարութեան կառավարման ճիւղին։
Գործունէութիւն
[Խմբագրել | Խմբագրել աղբիւրը]Աւարտելէ ետք, աշխատած է օտարերկրեայ ներդրումային ընկերութեան մը մէջ, իսկ աւելի ուշ՝ «Թարեք Նուր» ( طارق نور) ծանուցումի ընկերութեան մէջ՝ իբրեւ գովազդներու երգչուհի:
Անուշքայի երգարուեստի ասպարէզը կը սկսի երբ ան կը մասնակցի միջազգային մրցոյթի մը, զոր կազմակերպած էր «Փառատօնային կազմակերպութիւններու միջազգային դաշնութիւնը»ը (International Federation of Festival Organizations, FIDOF), հանդէս գալով ֆրանսերէն երգով մը, որուն հեղինակն էր Ճամալ Ապտըլ Հալիմ Հասան, երաժշտութիւնը՝ Քամէլ Շերիֆի։
Անուշքայի մեկնաբանած երգը շահած է առաջին մրցանակ, եւ ըստ այդ մրցանակին պայմանին, Եգիպտոսի ռատիոյի եւ պատկերասփիւռի ընկերութիւնը հովանաւորած է Անուշքայի առաջին երգերուն ձայնագրութիւնը պատկերասփիւռի համար, ինչպէս նաեւ՝ պատկերասփիւռային «Արաբերէնի ուսուցում» ծրագիրին համար նախատեսուած երգը: Ծրագիրը ղեկավարած է բեմադրիչ Ֆեհմի Ապտըլ Համիտ:
1987-1988 տարիներուն, երգչուհի Անուշքա մասնակցած է երգի միջազգային մրցոյթներու, Ֆինլանտայի, Չեխոսլովաքիոյ, Պուլկարիոյ, Թուրքիոյ, Ֆրանսայի եւ Լատինական Ամերիկայի մէջ տեղի ունեցած երգի միջազգային փառատօներուն: Թուրքիոյ մէջ, ան իր «Հապպայթէք» («Սիրեցի քեզ») երգով նուաճած է երրորդ մրցանակը։
1995-ին, Ֆրանսայի մէջ շահած է առաջին մրցանակը` Ֆրանքոֆոն երկիրներու փառատօնին, ուր մասնակցած է իր հեղինակած երաժշտութեամբ` Mon Amour («Իմ սէր») երգով, նաեւ՝ Ya leil երգով, որուն երաժշտութեան հեղինակն է երաժշտահան Միտհադ Էլ Խաուլի (مدحت الخولى): Որպէս փառատօնի նախադրեալ պայման, երկու երգերն ալ ֆրանսերէն եղած են: Հետագային, ան նաեւ կատարած է նշեալ երգերուն արաբերէն տարբերակը:
Երգչուհին իր ելոյթներով ոգեւորած է FIFA U-17 World Cup 1997-ի՝ ֆութպոլի աշխարհի պատանեկան ախոյեանութեան բացման արարողութիւնը, ինչպէս նաեւ՝ Handball World Cup-ի փակման արարողութիւնը եւ Windsurf World Cup 2000-ի աշխարհի ախոյեանութեան բացման արարողութիւնը:
Երգչուհի Անուշքա պարգեւատրուած է Եգիպտոսի Զբօսաշրջութեան նախարարութեան կողմէ, եգիպտական երաժշտութիւնը խթանելու եւ համաշխարհային ասպարէզներ հասցնելու իր ջանքերուն համար:
Դերասանակն կեանք
[Խմբագրել | Խմբագրել աղբիւրը]Անուշքա օժտուած նաեւ դերասանական ունակութիւններով, ճամբայ հարթած է նաեւ դերասանական մարզին մէջ․ բեմադրիչ Սալահ Ապու Սեյֆ զինք կ’ընտրէ «Պարոն Քաֆ» (السيد كاف) ֆիլմին համար, որմէ ետք ան դերեր ստանձնած է՝
- «Ով արձակած է այս գնդակը (من أطلق هذه الرصاصة) ժապաւէնին,
- «Սիրամարգ» (الطاووس) , “الرشيق” , “جراند أوتيل” ,”حلاوة الدنيا ֆիլմաշարերուն,
- Մանուկներու համաշխարհային օրուան նուիրուած «Վարդը եւ իր եղանակները» (الورد وفصوله) օփերեթին մէջ:
2012-ի «Ռամատանիաթ» ֆիլմաշարին մէջ, դերասանուհի Անուշքա մարմնաւորած է ՄԱԿ-ի աշխատակից դիւանագէտ կնոջ մը դերը՝ ժապաւէնի խաղընկեր ունենալով հանրածանօթ եգիպտացի դերասան, կատակերգակ Ատէլ Իմամը:
Ալպոմներ
[Խմբագրել | Խմբագրել աղբիւրը]Երգչուհի Անուշքան կը հրապարակէ ալպոմներ արաբերէնով՝
- «Հապպայթէք» («Սիրեցի քեզ», حبيتك 1988),
- «Նատանի» (ناداني, 1989),
- «Թիկի Թըղաննի» (تيجي تغنّي 1990),
- Ապայյան Զէյն (1992 أبيّن زين),
- Քատտապ (1994 كدّاب),
- Նֆսի Աքուն (2001 نفسي اكون)[4]:
Ծանօթագրութիւններ
[Խմբագրել | Խմբագրել աղբիւրը]- ↑ 1,0 1,1 أنوشكا
- ↑ Ayoub-Geday, Paul, McLure, Mandy, et al (2002) Egypt Almanac: A Yearly Review of the Egyptian Scene, The American University in Cairo Press, 978-977-5893-02-4, p. 332
- ↑ Mazhar, Inas (1999) "The Vikings' revenge Archived April 4, 2011, at the Wayback Machine.", Al-Ahram Weekly, 17–23 June 1999, Issue No. 434, retrieved 2011-04-29
- ↑ 4,0 4,1 «Եգիպտահայ երգչուհի եւ դերասանուհի ԱՆՈՒՇՔԱ - Darperag21» (en-US)։ 2021-10-22։ արտագրուած է՝ 2023-07-08