Վարչական դատավարության իրավունք

Վարչական դատավարության իրավունը կարգավորում է պետական կառավարման ոլորտում անհատական վարչական գործեր քննելու և լուծելու ընթացքում առաջացած հասարակական հարաբերություններ։ Վարչական դատավարությունը պետք է սահմանել որպես վարչական գործի հարուցման, դատաքննության նախապատրաստման, դատաքննության և գործի լուծման կապակցությամբ դատարանի և վարչական դատավարության մասնակիցների գործողությունների (անգործության) կապացությամբ առաջացող իրավահարաբերությունների ամբողջություն:Վարչական դատավարությունը սերտորեն կապված է հանրային իրավունքի բնագավառի հետ: Վարչական դատավարության իրավունքի նորմերը որոշում են պետական կառավարման ապարատում քաղաքացիների դիմումների ու բողոքների ընդունման և քննարկման, վարչական որոշ (այդ թվում՝ վարչական հարկադրանքի կիրառման) ակտերի հրապարակման կարգը, ամրապնդում են վարչաիրավական հարաբերությունների մասնակիցների միջև առաջացող վեճերի լուծման կարգը, սահմանում քաղաքացիների և վարչական դատավարության այլ մասնակիցների իրավունքների երաշխիքները, որոշում են վարչական իրավախախտումների վերաբերյալ գործերի քննարկման և ընդունված որոշումների կիրառման կարգը։ Իրավաբանական գրականությունում տարբերում են Վարչական դատավարության իրավունքի հետևյալ նորմերը՝

վարչական իրավունքի ընդհանուր սկզբունքներ,
վարչական դատավարության մասնակիցների կոնկրետ իրավունքներ,
վարչական գործեր քննող մարմինների իրավասություններ և այդ գործերի քննության կարգը,
վարչական դատավարության բոլոր փուլերի ժամկետները,
ընդունված որոշումների բողոքարկման և գանգատարկման կարգը սահմանող նորմեր

Վարչական դատավարության սկզբունքներն են՝

օրինականությունը,
արդարադատության իրականացումը միայն դատարանների կողմից,
դատարանների անկախությունը,
հավասարությունն օրենքի և դատարանի առջև,
դատավարությունը պետական լեզվով իրականացնելը,
փաստական հանգամանքներն ի պաշտոնե պարզելը,
դատավորների անփոփոխելիությունը,
դատական վարույթի հրապարակայնությունը,
քննության միանձնյա և կոլեգիալ կարգի զուգորդումը

Սա իրավաբանության մասին անավարտ հոդված է։ Դուք կարող եք օգնել Վիքիպեդիային՝ ուղղելով և լրացնելով այն։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 11, էջ 344)։