Aeródromo militar de Santiago de Compostela

Aeródromo militar de Santiago de Compostela
IATA: SCQ – ICAO: LEST
Sumario
Tipo		Militar
Operador		Exército do Aire de España
Cidade/Illa		Santiago de Compostela
Localización		A Lavacolla, Sabugueira
Pista(s)
Dirección	Longo		Superficie
	metros	pés
17/35	3 200	10 498	asfalto

Dous Canadair CL-215T do Exército do Aire estacionados.

O aeródromo militar de Santiago de Compostela (código IATA: SCQ, código ICAO: LEST) é un aeródromo militar situado na Lavacolla, a 10 km da capital galega, Santiago de Compostela, a carón do aeroporto da Lavacolla.

Características

Ocupa uns 94 000 m², incluíndo unha plataforma de aparcadoiro de aeronaves de 35 000 m² e diversas instalacións, como a xefatura, aloxamento e tripulacións destacadas, edificio multiúsos, hangar de cocheiras e pista polideportiva^{[Cómpre referencia]}.

Misión

A súa principal misión é proporcionar apoio loxístico e seguridade ás Unidades Aéreas das Forzas Armadas de España que se despreguen nel, entre as cales están as seguintes:

Permanentemente:

• Ala 37: Servizo de Vixilancia Aduaneira
• 43 Grupo de Forzas Aéreas: Campañas contra incendios forestais

Habitualmente:

• Brigada de Infantería Ligera Aerotransportable (BRILAT) (desde Pontevedra)
• Grupo de Adiestramiento (desde a Base Aérea de Salamanca)
• 45 Grupo de Forzas Aéreas (desde a Base Aérea de Torrejón)
• Ala 31 (desde a Base Aérea de Zaragoza)
• Ala 35 (desde a Base Aérea de Getafe)
• Centro Cartográfico y Fotográfico (CECAF) (desde a Base Aérea de Cuatro Vientos)
• Cuarta Escuadrilla da Armada (dende a Base Naval de Rota)
• Patrulla Águila (desde a Base Aérea de San Javier)

Historia

O 29 de xullo de 1935 inaugurouse o campo cun festival aéreo. O 21 de setembro de 1937 chega o primeiro avión regular, pertencente á liña Sevilla-Salamanca-Santiago-Zaragoza, que opera até a finalización da guerra civil.

En 1945 créase a Xefatura do Servizo de Obras do Sector Aéreo de Galicia, a cargo do piloto do "Jesús del Gran Poder", o Tenente Coronel Francisco Iglesias Brage, para acometer as obras de ampliación e mellora. Establécese o destacamento militar.

Entre 1953 e 1954 realízase a pista de rodamento e estacionamento, na actualidade plataforma militar. En 1957 constrúese a terminal de pasaxeiros, hoxe edificio de Aloxamento, e afírmase o estacionamento.

Entre 1964 e 1967 amplíase a pista N-S até os 2 500 m e constrúese a nova terminal do aeroporto da Lavacolla, quedando a antiga zona só para o Exército do Aire.

En xuño de 1993 fírmase o acordo de transferencia MINISDEF-AENA, no que se contempla, entre outros, o deslinde patrimonial dos actuais terreos. En setembro o antigo Destacamento de Santiago clasifícase como Aeródromo Militar.

En xullo de 1995 o aeródromo clasifícase como aeródromo de Utilización Conxunta, situación na que continúa na actualidade.